Taytus 1:5 - Udél Dwata: Gna Kesfasad ne Lomi Kesfasad

⁵ Yó gónóhu tmebel kóm dyó bè Krit abay se tolo wen gónó le là deng hol ket yó kem tau hemtahu bè yó. Uu fen mit kul hekteng. Ne holi mélék kem tuha bè ket benwu mò fen malak kul bè simbahan. Hol hentulónem nawa yóm tehe hlolou kóm bè yóm kélékem kul.

Taytus 1:5 Referans Kwoze

Kul Nmò 14:23

Tódô ket yó kem benwu gónó le tehe tmolok, sal gel wen kem tau tuha nélék le mò fen malak yó kem tau hemtahu bè yó. Sok deng gel kélék le kul, glok le fasting, ne mni le bélê le bè Dwata, ne hogot le lu bè Jisas, yóm gónó le mogot deng snalig le.

1 Timuti 1:3

Yó hol nóyóu béléem ke nam na tódô henek nô bè Ifisus, hol lómón yóm tehe tulónu kóm ekni bè yóm tehe kewótu ebè Masdunya. Yakà wen yó kem dumu tau tmolok sekban bè yó. Hol bnólówem lu anì bê le abay henfu yóm ktolok le yó.

Kehedem Tau Tmolok 12:9

Lemwót bè yóm khulungen hedem yóm tau tmolok du nim ni, gotu toloken bè yó kem tau kdê yó kem deng tngónen. Gotu hennagien yóm lan yóm kdéen udél hlalak, ne gotu sentifesen lu.

1 Kurin 14:40

Bede bè yóm kdê nmò ye bè yóm gel ksimba ye, hentilob ye mò du anì gdilô yóm kessadat ye.

2 Timuti 2:2

Deng hónô gungolem ne yóm tehe gel toloku bè gónón wen, ne bud yó se hol sigangem ta yó kem tau genléd nawam anì duhe kóm, lu he fen hból du ebè kem dumu tau.

1 Kurin 11:34

Ke wen tau bitil bélê ye, yake tódô mken bè gónóen anì là wen gónó Dwata tmafak du bè yóm gel kestifun ye. Bè yó kem dumu snólók ye béléu, angat tulónu kuy he soke deng kól dyó.

Kul Nmò 27:21

Ya ni du kem tau mit du, là kô getngón le du mken. Mdà lem blóng le Pol, monen, “Ó kem dumuhu, ke tehe nimón ye yóm monu, là kô deng gtagak tekuy du he Krit, ne là kô ni du se gfà tekuy, ne là se wen gtudà ye elem mohin.

Kul Nmò 27:12

Yóm lusuk gónó me dmuung yó, là hyuhen ke geslà bè yó yóm bulónen alì sidek kdaw. Alì mlom óyô le hlós ebè Finik mò gónó le nô bè yóm bulónen sidek kdaw, abay se yóm Finik, sotu lusuk bè Krit malù geklung bè lenos, abay se smolu e desdef.

Kul Nmò 27:7

Timbow me lemwót bè yó, tey ganag yóm kafal snakay me, bà mon tey lenos te mohin. Tey deng dê ne kdaw me, omin me mius bè yóm benwu boluyen Snidus. Tódô tô henkteng me yóm lan me yó, okóm là gbek me du. Yó gónó me heklung bè yóm sotu hungul udì te mohin boluyen Krit. Ngangen ne mius me bè yóm benwu boluyen Salmun.

Kul Nmò 11:30

Fen hwit le kul le Barnabas lewu le Sol etu bè yó kem tau malak yó kem tau hemtahu bè yó.

Isaya 44:7

Wen kô gembek mò du yó kem deng tehe nmou bélê ye? Wen kô gembek eles tmulón du kuy yóm angat sut lemwót bè kbuten efet kól bè hol sónen?

Kulasi 2:5

Balù nim keslayuk tekuy ni, kaem tey tendo kehedemu kuy. Tey kehligalu yóm kungolu du yóm kesetgel ye mfi du yóm kehtahu ye bè Krays.

Kul Nmò 2:11

Wen se bélê tekuy tau Ju, ne wen se là Juhen, okóm deng gbót lolò le ne kul hentahu yó kem tau Ju. Wen se bélê kuy lemwót bè yóm sotu hungul te mohin boluyen Krit, ne wen se lemwót bè benwu Arab. Là bangen du botong gbek le tmulón du bè kut udél yóm tey nmò Dwata.”

Kul Nmò 27:13

Timbow mbel fi bè iwóng me yóm lenos hyu, omin le tnana tô lemwót ebè Finik, ofo kul ke géhél le gefet bè yó. Omin le kemteng eta yóm blangawen, ne tódô le mówóng hmilol Krit.

1 Kurin 4:17

Yó se gónóhu hógów ke Timuti edyó bélê ye anì hegtulónen bè nawa ye yóm kmò kekdolu bè nim lomi klowilu lemwót bè yóm deng kessotu nawahu bè Krays Jisas. Duhen ni se yóm alì gel toloku bè yó kem tau hemtahu bè ket benwu gel lanu. Nim Timuti monu ni, lómón ke du yóm hol ngau dumuhu sogot nawa lemwót bè kehtahu me, ne tey teneb nawahen.

Taytus 1:12

Bong tahu se yóm tehe mon yóm sotu tau lemwót bè yó bè Krit, yóm tau kul tugod bè kul hentahu, yó monen, “Mnawaw ni kem tau bè Krit. Hol gónón smala kéng, sidek balu le, tey bong kken le, lel le mduk.”