Sulat Jim 1:14 - Udél Dwata: Gna Kesfasad ne Lomi Kesfasad

¹⁴ Okóm yó gónón gsindil yóm tau ke henbeyenen yóm kun knóyô là hyuhen.

Sulat Jim 1:14 Referans Kwoze

Ifisus 4:22

Yó gónóm mon, hol kó ye dé yóm gna nmò ye tganay, yóm gel mit kuy mò sidek. Yóm nmò ye yó, megtondo ye du, mom hensideken knô ye.

Matyu 15:18

Okóm yóm sidek kebkó gel btang bè sumóng yóm tau, hono lemwót lem hendemen, ne yó se mit du là mólós bè Dwata.

Hibru 3:13

Okóm yó dé yóm hol tnana nmò ye yóm igoen tolo wen kdaw blay Dwata tekuy, hol ye setgel ket kdaw anì laen dù bélê ye gtondo bè yóm sidek, ne hlós baling tau là mimón.

Isaya 44:20

Yóm nmoen yóm tau yó, lómón ke mken kohù laen dù gónón mowil du. Ungel nmoen yóm yó, olon tmondo knóen. Laen dù lanem tmóbóng du yóm tau yó. Là kô dilóen du yóm koyu lennged nogoten, sundu tahu dwata du.

Sulat Pol Ebè Yó Kem Tau Hemtahu Bè Rom 7:13

Là kô yóm hlau hyu ni yóm mit do elem hatay. Okóm yó mit do elem hatay duhen yóm alì óyóu mò sidek ne mulé du yóm hlau. Ni se gónóhu mton du ksideken yóm salà hlanen bè yóm hlau hyu anì megtulede lem hatay. Duhen yó, yó muhen yóm hlau mò gónóhu temngón du yóm alì ksideken yóm salà.

Kem Udél Hlalak Tehe Selumun 4:23

Hol ten-gamahem bè kdéen yóm kmò kógów kehedemem, yakà bè kóm kehedem du gónón lemwót yóm kóm kmò.

Matyu 5:28

Okóm ni dou tulón kuy, balù bè olo ketngelem ebè yóm libun ke wen óyóem du gu lem, deng timbang snamukem ne, abay se deng deng bè yóm kehedemem du.

Sulat Pol Ebè Yó Kem Tau Hemtahu Bè Rom 7:11

Tey sidek kegtondohu bè yóm nawahu móyô mò sidek, abay se sónmoen kemteng dou anì nuléhu yóm hlau. Mom yó uléken yóm nmou yó, hatay.

Job 31:27

ke deng nô bè nawahu tô mtud bukol tmaba ebélê le, duhen ke mlan bè keleku henmù bè yóm kadatu kul,

Job 31:9

Ke deng niwolu yehen kem dumuhu ne ke deng gel nangatu bè bak dólen yóm yehen yóm dumuhu sebét

Matyu 15:20

Yó se yó kem nmò gónó tau là mólós bè Dwata. Tek élél yóm là na kolob tdok gu laan là deng mken.”

Tekang Kbuten 6:5

Bè yóm kton Dwata du yóm alì kmò le sidek yó kem tau talak tonok ne yóm là kólós yó kem gel nô lem hendem le,

Tekang Kbuten 8:21

Yóm boo yóm dsuen yó, tey hyu nawa Dwata du ne yó hendemen, “Là kô bud genlau du ne yóm tonok ne yóm kentihen nô tahen lemwót bè sidek gel nmò tau. Tódô tngónu yóm tau, lemwót bè hanà kudien yóm kwen sidek nô lem hendemen. Là kô naw e bud genlà kul ne yóm kentihen mowil talak tonok lómón yóm deng nmou bélê le ni.

Husiya 13:9

Ó kem tau Israél, móyón genlau yu ne. Tau du de tô gembek tmóbóng kuy?

Tekang Kbuten 3:6

Timbow henklol hnunu yóm libun yóm koyu yó, tey minggel ktonen du ne hendemen dô hyu mken du bunguhen, lelen hemdem du tey hyu ke baling temngón. Yó gónón wen nwahen bè yó kem bunguhen ne kenen. Ominen wen blayen ke tuha logihen ne kenen se kun.

2 Samwél 11:4

Omin Dabid mdók kem tau anì na le e nangay. Tahu se, mung kul, ne sentungô Dabid. (Blaem lomi hólós Batsiba knóen, abay se lomi wen hen-gifaten.) Ominen mulék.

Matyu 4:1

Bè yóm deng kehbabtays Jisas, omin yóm Tulus Dwata mit du etu bè yóm benwu laen dù tau menwu du. Ditu gónó Seitan tendo tô tmilów du.

Sulat Jim 1:13

Ke wen gónón gsindil yóm tau lemwót bè yó kem tilów gel sut, béen abay dnelem Dwata ke du mò du. Abay se yóm Dwata, laen kô dù tau snindilen ne là kóen megsindil se kun.

Sulat Jim 1:15

Ngangen hembeyen du efet gmoen, ne yó gónón baling salà. Ne ke henlelen mò salà yóm tau, yó se mit du elem hatay laen dù sónen.