Sulat Jim 1:12 - Udél Dwata: Gna Kesfasad ne Lomi Kesfasad

¹² Hligal kun yóm tau ke hulung hembala yó kem tilów mgel gel sut béléen. Yó ofolen yóm khulungen hbala yó, duhen yóm klowil laen dù sónen, yóm deng fasad Dwata bè yó kem tau kembong nawa du.

Sulat Jim 1:12 Referans Kwoze

1 Pitér 5:10

Okóm ke deng legen udì yóm keglayam ye, tey któbóng Dwata kuy. Du se hol hbegel kuy ne tendo ten-gelen yu efet là buden sliwo yóm kehtahu ye. Yó gónón tehe tmaba kuy anì gbót ye bè yóm tey kegetahen ditu bè longit hlanen bè yóm deng kessotu ye bè Krays. Ne yóm kegetahen yó, laen kô dù nan e són.

Deng Hegfan 2:10

Hol bê ye abay knikò yóm hlayam móyón sut bélê ye. Ngem móyón wen bélê ye geblanggù lan Seitan tmilów yóm kehtahu ye. Bede olon gefet bè sfolò kdawen yóm keglayam ye yó. Bê ye abay honol nawa ye ebéléu, baluen ke matay ye du, abay se angat benlayu yu yóm klowil laen dù sónen mò ofol ye.

Sulat Jim 5:11

Tódô tngón tekuy wen tey kligal le lemwót bè yóm kegbek le hbala. Deng gungol ye ne yóm tey kegbek Job hbala ekni, ne tngón ye se yóm tey któbóng Dwata du kogolen, abay se yóm gónó tekuy mogot, tey bong kkoduhen tau.

Sulat Pol Ebè Yó Kem Tau Hemtahu Bè Rom 8:28

Deng tngón tekuy se, balù kihu sut bè klowil tau, sal gel nmò Dwata gónón hyu bè yó kem tau kembong nawa du. Lu se yó kem tau deng tnabahen, yakà wen muhen kul.

Matyu 10:22

Angat tey dê tau kmutó nawa kuy lemwót bè yóm klolò ye do. Okóm yóm tau ke gbeken hembala du yó kem gónóhen glayam efet kól bè hol sónen, du se gmuta du yóm klowil laen dù tul sónen.

1 Kurin 9:25

Yóm tau mung bè yóm skuya mlóy, tey khotuhen gelen mò du yóm gónón kemgis lem lówóhen anì angat matù. Ewenem yó, yóm ofolen bè yóm katuen, là kóen dog legen, sana sidek. Okóm yó dum ofol guta tekuy kem tau hemtahu, laen kô mtukul ksideken.

1 Pitér 3:14

Okóm baluen se ke wen hemsidek kuy lemwót bè yóm hyu gel nmò ye, wen kligal ye du myó. Bê ye hlikò, ne bê ye htafa nawa ye.

2 Timuti 4:8

Ne ni, wen deng eles henyu yóm gónó tekuy mogot mò ofolu, yóm ofol blayen bè yó kem tau deng tedeng kmò le. Angat suen béléu bè yóm kdaw kekukumen tau, ne tey tedeng yóm kkukumen. Là kô són du ou se yóm wen ofolen, senged nóm se yóm kdéen tau deng eles tendo hemdón du yóm ksuten.

Sulat Jim 2:5

Ni hol hnungol ye, kem dumuhu sogot nawa. Mom monem yó ne kem tau élél lem nim benwu ni yóm nélék Dwata mò baling mdengen bè kehtahu le, ne gmung le bè yó kem tau nogoten, yakà yó du yóm deng tehe fasaden bè yó kem tau kembong nawa du.

1 Pitér 5:4

Ne ke bud semfulék edini Jisas, yóm semgyok ubiha hol geta bè kdéen, wen tey ofol blayen kuy, yóm ofol là kóen monol yóm alì kehyuhen.

1 Kurin 2:9

Nim gel tolok me ni, hol segtón bè yóm tehe monen bè Sulat Dwata, yóm monen, “Deng wen hentifes Dwata bè yó kem tau kembong nawa du. Yóm hentifesen yó, là kô deng wen hnikót mton du he, ne là se wen deng mungol du. Là kô deng wen hnikót hemdem du yóm mò kmoen.”

Dwata 8:2

Hol hentulón ye nawa yóm kmò kwit Dwata kuy bè yóm tey nógów mayuk lem yóm benwu laen hol wen tauhen lem yóm fat folò halay. Gel henwit Dwata yu tilów mgel mò gónón temngón du yóm hol nô bè nawa ye ke nimón ye yó kem kun hlau kuy duhen ke là.

Kem Udél Hlalak Tehe Selumun 17:3

Bè ofi gónó tau tmilów du yóm tembaga futì ne yóm tahu blówón ne Dwata se fen tmilów du yóm nô lem but blutut tau.

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Deng Hegfan 3:21

Yó kem tau gel matù bè yó kem sidek gel sut, angat wen kwalis blayu kul anì gemyón le klohoku bè yóm gónóhu myón kmamal yóm klamangen. Yóm katù le yó, hol lómón se yóm deng dou katù, ne kyónu klohok Mà bè yóm gónóhen myón kmamal se kun.

1 Pitér 4:13

Yake hligal ye dé ke wen gónó ye glayam, abay se deng ye gbót ne bè yóm tehe keglayam Krays. Ke gbek ye hembala du, bong kehligal ye bè yóm kdaw kehegfan Dwata du bè kdéen tau yóm tey kegeta Krays.

1 Kurin 8:3

Okóm ke bong nawahen ke Dwata yóm tau, yó se yóm tau hol dilô Dwata.

Deng Hegfan 3:19

Yó kem tau kenbong nawahu, sal gel bnólówu ne tnafaku lu anì gulit le. Duhen ni, hol knogol ye ne yó kem salà gel nmò ye.

Dwata 13:3

Hol bê ye abay kenmón yóm udélen ebélê ye yó. Yóm nmoen yó mò gónó Dwata tmilów kuy, yóm sana kuy Dwata hol gónó mogot, mò gónón hménég du ke hol lemwót lem nawa ye yóm kbong nawa ye du.

Hibru 10:32

Okóm tekuy, hol hentulón ye nawa yóm tehe kdaw ye ekni, yóm kdaw tehe kehlayag Dwata lem hendem ye. Tey sidek tehe keglayam ye lemwót bè yóm deng kehtahu ye, okóm là gwiten kuy.

Kem Lingón 119:71

Tey hyu béléu yóm kehlayamem do anì dnalangu yó kem hlauhem.

Dwata 7:9

Yó gónóm mon, hol sù ye lem hendem ye nim ni. Yóm sana kuy Dwata hol gónó mogot, tek sónen du Dwata ne là kóen monol nawahen. Là kô klifóten du yóm tehe senfasad ye ditu bè Bulul Sinay ne gel hegfanen bè yó kem tau kembong nawa du ne mimón yó kem kun hlau yóm kbong nawahen kul efet kól bè hilu libu bud lugod le.

Hibru 6:15

Ne tahu se, là kóen tmakas Abraham mangat du efet gutahen yóm deng fasad Dwata du yó.

Matyu 25:34

Angat monen mò yó kem nô bè kwananen yóm Hol Geta yó, ‘Géhél ye ne, yu kem tau deng tendo gel tnóbóng Mà. Hlós ye ebè yóm benwu deng tehe eles hentifesen bélê ye lemwót bè hol kbut benwu.

Kem Lingón 119:67

Gu laanem là deng semtódô do, denge tlas, okóm ni, hol nimónu yóm kóm udél.

Nihimaya 1:5

“Ó Dwata yóm sana kum Dwata hol gónó me mogot nô bè longit. Uu se yóm hol dandónen geta, yóm Dwata knóón bang knikò. Là kóen mkó bè nawahem yóm tehe kesfasad ye yó kem tau kembong nawa kóm, yó kem tau mimón yó kem hlauhem.

Hibru 11:17

Lemwót bè kehtahu Abraham gónón tódô demsù ke Isak, yóm ngaen, bè yóm tehe ktilów Dwata du. Balù yóm deng kwen fasad Dwata du mlan bè yóm ngaen yó, tódô nimónen se yóm dók Dwata du, tódô kem tô hnatayen yóm hol són ngaen mò dsuen ebè Dwata.

Kem Lingón 119:75

Tngónu, Dwata, tedeng yóm kkukumem. Yó gónóm semtódô do abay se wen muhen béléu.

1 Jan 4:19

Deng gegna ne yóm kbong nawa Dwata tekuy, yó se lewót yóm gónó tekuy kembong du nawa.

Isaya 64:4

Laen kô deng tau mton du yóm Dwata lómón uu, duhen ke deng wen gmungol du yóm Dwata gembek mò du yóm tennga nmò bè yó kem tau kemgel du nawa.

Kem Lingón 5:11

Okóm yó kem tau mlo ebéléem, hligal le se kul. Lemwót bè yóm tey kligal le, tendo sngal le yó kem sngal dmóyón kóm. Nofinem lu anì yó hol le hligal kdê yó kem tau kembong nawa kóm.

Kehewà 20:6

Okóm bè yó kem tau kembong nawa do ne mimón yó kem dou hlau, hegfanu bélê le yóm tey nawahu kul efet kól bè hilu libu bud lugod le.

Hibru 12:5

Là deng klifót ye du kô yóm tehe udél Dwata mò gónón gemduf kuy bè kngaen kuy, yóm monen, “Ó Ngà, hol kenmónem ke wen gónóhen hemtedeng kóm yóm gónóm mogot, ne béem kenblat nawa ke wen gónóhen mólów kóm.

Job 5:17

Okóm hligal kun yóm tau ke wen gónó Dwata semtódô du. Hol béem tnagaw nawa ke wen gónó Dwata mólów kóm.

Kem Lingón 94:12

Ó Dwata, hligal le kul yó kem tau deng wen gónóm semtódô kul, dalang se yó kem tau wen gel tolokem kul lemwót bè kóm hlau.

Tekang Kbuten 22:1

Kogolen bè yó, tnilów Dwata Abraham ke tahu yóm kimónen du, tnabahen, monen, “Ó Abraham.” Mon Abraham se, “Hó. Ni ou.”

Job 2:10

Bnalà Job se, monen, “Kudél libun nungel. Bè yóm klawihen wen hyu blay Dwata kut tey kehmóyô te du. Moen se ke tô te tmalaw ke henwiten tu sidek?” Balù yóm deng tey kwen hlayam Job, ewenem laen kô dù udél sidek btang bè sumóngen.

Kem Lingón 11:5

Henklol tenngel Dwata yó kem tau tedeng kmò le dalang se yó kem tau sidek nmò le. Tey kutó nawahen kul yó kem tau alì móyô hemsidek tau.

Kun Snulat Luk 6:22

Tey kehyuhen bélê ye ke gel knutó nawa le yu yó kem tau lan ye lemolò yóm Ngà Tau. Mom hyu nawa ye he ke kenbê le yu, ne ke gel hennê le yu, ne ke gel sidek kestulón le kuy.

Sulat Pol Ebè Yó Kem Tau Hemtahu Bè Rom 5:4

Ne yó bud uléken yóm kehbala tekuy yó, duhen yóm kehyu nawa Dwata ebélê tekuy. Ne ke hyu nawa Dwata bè yóm kmò tekuy, yó gónón temnù kgel nawa tekuy du yóm hyu hendón tekuy yó.

2 Timuti 2:15

Hol hotuhem gelem mò du yóm hmò Dwata kóm anì hol gsengel nawahen kóm, ne anì laen bang gónóm myak bè yóm gel nmoem. Yake hol gulit ktolokem du yóm ktahuhen lemwót bè Dwata.

1 Pitér 4:14

Ke wen semdekà kuy lemwót bè yóm klolò ye ke Krays, hol ye hligal dé. Abay se yóm nmò le yó, yó se ilô yóm knóen bélê ye yóm Tulus Dwata, yóm hol mfasang bè kdéen.