Sikaraya 9:12 - Udél Dwata: Gna Kesfasad ne Lomi Kesfasad

¹² Ó kem tau negef, deng wen nefet nawa ye ne ni, hol ye bud semfulék ebè yóm sana kuy benwu, yóm benwu gónón laen dù hemen ye. Wen fasadu kuy kemdaw ni, lewu duléku he bud hulék du ebélê ye yóm tóbóngu kuy bè ket keglayam ye.

Sikaraya 9:12 Referans Kwoze

Job 42:10

Timbow deng kogol yóm kni Job bè yóm tlu kem ween, ya tey bud kehdengen Dwata du. Botong lewu duléken bud hulék du ebè Job yó kem deng lana béléen.

Isaya 61:7

Là bud wen gónó ye myak ne, ne laen se dù tau bud hemyak kuy. Angat ye tódô henek bè yóm kuy benwu. Tódô sónmoen temnù yóm kendengen ye ne laen kô dù sónen yóm kligal ye.

Hibru 6:18

Duhen yó, nim lewu tehe nmò Dwata ni, duhen yóm fasaden ne yóm kehgeten du, là kóen na a megetles, abay se yóm Dwata là kóen mò kéng. Yó gónóm mon, bè yóm kdê tekuy deng mlóy ebéléen, deng tey mgel nawa tekuy du ne yóm hendón nangat tekuy deng fasaden tekuy.

Jirimaya 31:17

Ni wen bud nefet nawa ye, abay se angat le bud semfulék ebè yóm hol kul benwu yó kem ngà ye.

Nahum 1:7

Tey hyu yóm Dwata. Ke wen hlayam sut, tek sónen du yóm gónó e mlo alì mbegel. Gotu nofinen yó kem tau smalig béléen.

Husiya 2:15

Ke deng semfulék ebéléu, angat bud huléku ebéléen yó kem tehe gónón mulu grép. Ne yóm benwu boluy le du Datal Gónô Glayam, angat henbalingu benwu gónón lemwót yóm kwen nefet nawahen. Bè yó angat gónón bud semfulék ebéléu lómón yóm tehe nmoen bè yóm hanà kegenen lomi libun bè yóm tehe kehewau du gu bè Idyip.”

Isaya 40:2

Hol genduf ye lu yó kem tau bè Jirusalim. Tulón ye kul deng geblaen yó ne yóm keglayam le ne deng gotu hnifótu ne yó kem salà le. Yóm deng ktafaku kul, tódô geblà du ne bè kdê yó kem salà tehe gel nmò le.”

Juwél 3:16

Tey lungkulen gu bè Sayun yóm udél Dwata ne lemték gu bè Jirusalim. Tódô gotu msinsig tonok ne longit. Okóm bè yó kem kun tau Israél, Dwata se gónó le e mlo mò gónó le e heklung.”

Isikél 37:11

Yó bud udél Dwata ebéléu, monen, “Ó Tau Tonok, ni kem tiol nii hnigaden yóm kdéen tau Israél. Yó tendo gel mon le, ‘Yóm klowil tekuy yóm kmoen ni, hol lómón ke tiol deng legen, laen dù bud nefet nawa tekuy ne, ne laen dù bud gónón e kól yóm klowil tekuy elem hulin kdaw.’

Mika 4:8

Ne uu Jirusalim, yóm benwu gónó Dwata tendo mentey yó kem kun tau, angat bud mulék ebéléem yóm tehe któtólem ne yóm tehe kfasangem. Ne bud uu se hol yê yó kem syudadem ne béléem gónón nô yóm tau mogot yó kem dou tau.

Isaya 52:2

Mdai dé, Jirusalim, kenfungem knóem, béi bud myón lem kfung. Myóni bè yó dém gónóm myón kmamal. Lenkas ye yóm tehe kedina le kuy, yu se kem tau Sayun tehe negef le.

Jirimaya 31:6

Angat bud kól yóm kdawen angat bud tmaba yó kem tau mentey gu ta yó kem bulul lemnek bè Ifraim. Yó taba le, mon le, ‘Géhél ye ne mneged tekuy ebè Jirusalim, tmaba tekuy ebè yóm sana kut Dwata hol gónó mogot.’ ”

Isaya 49:9

Yó udélu ebè yó kem tau geblanggù, monu mò kul, ‘Hewà ye ne.’ Ne yó kem tau nô bè gónón kmifu, yó bud monu mò kul, ‘Hewà ye ebè layag ne.’ Kehlingónu kul bè yóm deng kegewà le, lómón ke ubiha mótób bè talak bilil.

Hibru 6:19

Yóm hendón nefet nawa monu yó koni, hol lómón ke hihol yóm klowil tekuy. Angat dohò kton tekuy du, abay se deng eles nô ditu Jisas bè yóm hol gónóhen nô Dwata. Yó gónón là megewu nawa tekuy mangat du.

Jirimaya 14:8

Tek són uu se yóm nefet nawa me kem tau Israél. Tek són uu se yóm gembek lemwà kum bè yóm gónón wen hlayam. Moen de ke lómón ke tauhi milo bè benwu me, lómón ke tauhi mógów tek suloyen?

Jirimaya 17:13

Ó Dwata, uu se yóm nefet nawa yó kem tau Israél. Angat le gotu mulék myak yó kem tau kmogol kóm. Angat le tódô lana lómón yóm boluy snulat le bè kfung, yakà deng tebel le kóm yóm tbul él hol gónó mowil.