Sikaraya 9:10 - Udél Dwata: Gna Kesfasad ne Lomi Kesfasad

¹⁰ Bud mon Dwata, Angat gotu kóhu bè benwu Israél yó kem klitun tók gel nwit le sgida ne angat kóhu bè Jirusalim yó kem kudà gel nwit le ebè gida ne angat gotu genbau yó kem ngom sfatay gel nwit le ebè gida. Yóm tau angat geta bélê ye, du se mit kenek kbenwu bè klamangen. Yó klamang nogoten, tódô lenngeben klamang benwu ne bud lenwóten bè Él Yufratis efet kól bè són tonok.

Sikaraya 9:10 Referans Kwoze

Husiya 2:18

Bè yóm kdaw yó angat wen senfasad me yó kem ógóf lóbô liwà lem bnes ne yó kem onuk koyu ne kdéen mowil manaf talak tonok anì là hensidek le kuy. Bè yóm kuy benwu yó, gotu kóhu bè yó, yó kem ngom sfatay, kdê yó kem sudeng ne kem hanak, abay se laen dù bud gida bè benwu ye, anì yó tódô ye henek laen dù hemen ye.

Husiya 1:7

Okóm yó kem tau bè Juda, angat hegfanu bélê le yóm kkoduhu kul. Tódô ou angat lemwà kul lem tdok yó kem hohon le, bede là mlanen bè gida ne là mlanen bè boho le duhen ke bè sudeng le. Là mlanen bè yó kem tey kudà le duhen ke bè yó kem sendalù smakay kudà, bede mlan bè yóm dou kfasang yóm sana kul Dwata hol gónó mogot.”

Deng Hegfan 11:15

Ominen mféw yóm ghitu yó kem hógów Dwata, sen-gengu se mungol yóm tey udél gu bè longit, mon le, “Deng hto ne yóm kul kdaw mogot klamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.”

Mika 5:4

Bè yóm angat ksut yóm tau mogot benwu yó, tódô mdà lem blóng le, gotu nalaken yó kem kun tau mlan bè yóm kgis lemwót bè Dwata ne mung du yóm tey kegeta boluy yóm kun Dwata yó. Ominen yó kem tau nalaken, balù udì ke wen hemen le abay se tódô lenngeben klamang benwu yóm tey kegetahen.

Isaya 60:12

Okóm yó kem benwu là mimón kóm, angat gotu genbau.

Isaya 49:6

Bud mon Dwata mò dou, “Uu yóm mò tóbóng lówóhu, ni wen tey bong sigangu tahem mkay senta yóm gnan. Là són du yóm bud kulék kegeta yó kem dù tau Israél yóm hmou kóm, okóm nmou uu layag bè yóm kdéen tau bè klamangen benwu anì wen lan le gewà.”

2 Kurin 5:20

Ne duhen yó, mi se gel hógów Krays mò mit yóm kun tulón. Hol lómón ke Dwata fen mudél ebélê ye, okóm hlanen bélê me. Yó udél hwit Krays kum, monen, “Géhél ye mit sefyu ebè Dwata ne.”

2 Kurin 5:18

Tódô Dwata se mò du yóm monu yó koni. Hlanen bè Krays yóm lan nmoen mò lan tekuy mit sefyu ebéléen. Ne deng sigangen ta tekuy se yóm mò fen tmulón du bè dumu tau yóm lan nmoen yó.

Kul Nmò 10:36

Deng tngón ye yóm tulón hwit Dwata ebè yó kem tau Israél, duhen yóm Tulón Hyu mò lan tau mit sefyu ebéléen hlanen bè Jisas Krays, yóm hol gónó le mogot yóm kdéen tau.

Hagay 2:22

Angat genbau yó kem dumu benwu ne nmou sónen yóm kfasang le. Gotu hensideku yó kem klitun gel nit le sgida ne yó kem tau gel mit kul. Ne gotu matay yó kem kudà le ne yó kem tau tehe smakay kul, gotu le matay lan le tódô sfatay honon lu.

Kem Lingón 72:17

Yake laen dù kmifót du boluy yóm tau hol geta bélê me, ne anì laen dù tul sónen yóm któtólen, lómón yóm klaen dù tul són yóm nóng kdaw. Yóm kdéen dumu benwu, yake gotu le mni bè Dwata anì tnóbóngen lu, lómón yóm gel któbóngen yóm tau hol geta bélê me.

Kem Lingón 72:3

Yó hnihu béléem, Dwata, anì tilob kógów klowil le yóm kdéen tau knamalen, ne anì tedeng yóm kukum lem blóng le.

1 Bok Kem Tau Hol Geta 4:21

Gotu nogot Selumun yóm tau hol geta yóm klamangen, nbuten bè Él Yufratis fi dmata kdaw efet kól etu bè tonok yó kem tau Flistin bè kilil mohin fi desdef, ne efet bud kól etu fi leged bè kilil Idyip. Lemwót yó kem tau menwu bè yó kem benwu deng gled le, gel le mayad bwis bè Selumun, ne mogot le béléen bè yóm klawihen mowil.

Kem Lingón 85:8

Tey khungolu du ke tedu yóm udél Dwata yóm Dwata hol gónó me mogot, abay se fasaden tekuy kem kun tau yóm kenek nawa, syan ke là bud tekuy semfulék ebè yó kem sidek tehe nmò tekuy.

Isaya 2:4

Angat knukum Dwata yó kem gónó le seglius yó kem benwu lembang bè klamangen benwu. Lemwót bè yóm kkukumen kul angat tódô gotu hsól le lu dadu yó kem sudeng le. Ne yó kem buyus le angat gotu hsól le lu mò suk le hemgifat hulu. Yó gónó le mò du yóm yó abay se là kô le bud sgida ne yó kem tau bè klamangen benwu. Ne là bud tolok le du bè kem tau le yóm kmò kesgida.

Mika 4:8

Ne uu Jirusalim, yóm benwu gónó Dwata tendo mentey yó kem kun tau, angat bud mulék ebéléem yóm tehe któtólem ne yóm tehe kfasangem. Ne bud uu se hol yê yó kem syudadem ne béléem gónón nô yóm tau mogot yó kem dou tau.

Kem Lingón 89:26

Yó angat mon Dabid mò dou, ‘Uu se dou Mà, ne uu se yóm dou Dwata. Ne bud uu se yóm gónóhu gel heklung, ne yóm gel lemwà dou.’

Husiya 2:20

Htenebe bélê ye, nmou yu mò hol dou nfun ne angat tódô henmung tngón ye ou yóm sana kuy Dwata hol gónó mogot.”

Mika 5:9

Angat le gotu gemmò yó kem tau Israél bè yó kem hohon le ne gotu le meglà yóm kdê hohon le yó.