Sikaraya 8:23 - Udél Dwata: Gna Kesfasad ne Lomi Kesfasad

²³ Ni se udél yóm Dwata laen dù là gbeken du, monen, Bè yó kem kdaw yó, wen sfolò tau lemwót bè yó kem tólóng benwu, hono kem tau stólóng udél le, angat le mógów bè yóm sotu Ju ne mon le mò du, ‘Yake hmungem mi béléem, abay se deng gungol me yóm knóen béléem Dwata.’ ”

Sikaraya 8:23 Referans Kwoze

Isaya 60:3

Lemwót bè yóm keslinangem yó, yó gónó le hloni ebéléem yó kem dumu benwu. Gotu le hloni se kul yó kem tau hol geta mogot kul bè yóm kdaw bud kehgulék Dwata klowilem.

Isaya 55:5

Ne ni, bud yu angat tminok yó kem tólóng tau bè dumu benwu. Tehe là tngón le kuy, okóm ni ne tódô le kendel sut bélê ye anì gomong le bélê ye. Ou se yóm Dwata gónó ye mogot yu kem tau Israél yóm Dwata laen kô dù belenen. Angat gotu hdohou ni kem ni. Angat tey kadat le kuy yóm kdéen tau ne angat hegetahu yu.”

1 Kurin 14:25

Ne angat gotu benkasen lem blóng ye yóm kun kehedem tehe gel bunihen bè tau, ne angat tódô hegluduk, ne dóyónen Dwata, yó udélen, “Tahu nô lem blóng ye bè ni Dwata.”

Isaya 45:14

Yó udél Dwata ebè yó kem tau Israél, monen, “Angat blayu kuy yó kem kendengen yó kem tau Idyip ne yó kem tau Sudan. Tódô le baling hesek bélê ye yó kem tau lembang tahà bè benwu Siba. Tódô le huli kuy, igò le kendina. Ne mtud le bukol bè solu ye, yó mon le, ‘Tahu Dwata yóm nô bélê ye, laen kô dù dumu dwata, són du.

Tekang Kbuten 31:7

Ewenem yó, mom snukaten ou ne botong sfolò duléken tendo temles yóm kmò ksukéyen dou. Okóm là hlus Dwata du béléen ke hensideken ou.

Kul Nmò 19:12

Balù yó hem olo mesalahen duhen ke kayaben, ke nit le bè yó kem tau wen des le, kaem tódô mkó se yó kem des le. Balù yó kem tau nalak busaw, tódô gel mdó se yó kem busaw malak kul.

Kehedem Tau Tmolok 11:2

Hdéem gónóm e mólól du yóm blayem, abay se là kô tngónem du ke wen sidek sut elem benwu hulin kdaw.

Job 19:3

Tódô ket kiwól ye hemyak dou ne là kô kenyak ye du mudél sidek etahu.

2 Bok Kem Tau Hol Geta 2:6

Omin Ilaydya bud mon du mò ke Ilaysa, “Tebeli bè ni ne, abay se bud hógów Dwata o etu bè Él Jurdan.” Okóm yó bud balà Ilaysa du, monen, “Safau bè yóm Dwata là matayen, ne safau bè yóm kóm klowil se kóm, là kô naw e tnagak kóm.” Tahu se, bud le hlós slomong yóm lewu le.

Mika 5:5

Ne du gónón lemwót yóm kenek kbenwu le. Ke sok nundug kem sendalù Asirya yóm benwu tekuy ne ke tódô le hlós elemen, angat wen hitu tau malak nélék tekuy mò mit kul sfatay ne wen wolu kem ngà tau hol geta malak tekuy.

Tekang Kbuten 31:41

Yó se yóm kdê deng glanu béléem lem yóm lewu folò halay knóu béléem. Botong sfolò fat halayu kegenu mò nmò béléem anì gyehenu yó kem lewu ngaem libun, ne bud nem halayu he na bud mò nmò béléem mò semgyok yó kem ógófem. Lelen yó he, botong sfolò dulékem tendo temles du yóm kmò ksukéyem dou.

Kun Snulat Luk 8:44

Mógów huli ke Jisas nim libun ni, ten-gafit nduen yóm nesen. Mung unihen gemdù du, tódô sennganen se teflok yóm litô gu béléen.

Lista 14:22

Bud tahu snéen nim monu ni, balù sotu bè ni kem tau là mimón ni ke gehlós edu tum benwu deng fasadu kul. Igò le deng hónô mton du yóm tey keslinangu bè yóm knóu lem blóng le ne deng hónô ton le snéen yó kem hentaw ton tehe nmou bè Idyip dalang se bè ni bè nim benwu laen hol wen tauhen. Okóm deng mom sónmò le tendo gel htakas do ne là kô nimón le do.

Juswa 8:35

Tódô gotu senfala Juswa bè yóm kdéen tau Israél, gomong kem libun ne kem ngà ne yó kem tólóng tau menwu lem blóng le. Gotu senfalahen bélê le yóm kdê hlau Dwata tehe snulat Musis.

Isaya 45:24

Ne yó angat mon le, ‘Són uu, Dwata, gónón mlan yóm kegmò me bè kem hohon me, són uu bemlay kum kgis.’ Okóm kdê yó kem kmutó nawa dou, angat tey sidek kehyaku kul.

Isaya 60:14

Yó kem ngà logi yó kem tau tehe hemgnok kóm, angat le mógów ebéléem na le e heglaan béléem, yó se mò lan le hol hegfan du yóm kadat le kóm. Kdê yó kem tau tehe kemhisik kóm, angat tey keheglaan le béléem. Yó angat boluy le kóm, ‘Syudad Dwata.’ Sotu bud kboluy le kóm, ‘Sayun, syudad yóm kul Dwata yó kem tau Israél yóm Dwata laen dù belenen.’

Sifanaya 3:19

Bè yóm kdaw yó, tey angat sidek ktafaku kul yó kem tau gel hemgnok kuy. Lenwau yó kem tugô bélê ye ne gotu bud sentifunu yó kem tauhu deng sekla. Kóhu bélê le yóm tehe kyak le, tlesu du yóm gónó le megdóyón. Angat tey kadat le kul bè klamang yóm benwu tehe gónó le myak.

2 Tutul Israél 15:9

Omin Asa gotu semtifun kul yóm kdê tau bè Juda ne Bindyamin, gomong yóm kdê tau bè Ifraim ne bè Manasi ne bè Simyun deng menwu lem blóng le. Tey dê tau lemwót bè Israél fi bwak mili ebè Juda bè yóm kton le du yóm knô Dwata bè Asa yóm kun Dwata hol gónó mogot.

Istér 8:17

Bè ket syudad ne ket prubinsya gónón e glalag yóm lomi udin yóm tau hol geta yó ya tey kehligal yó kem Ju nô bè yó. Gotu le hligal mò ken. Bè ktahuhen, bè yóm kdaw yó tey dê tólóng tau hbaling Ju lemwót bè klikò le kul.