Sikaraya 8:12 - Udél Dwata: Gna Kesfasad ne Lomi Kesfasad

¹² Bè yóm bud kmò ye hulu, tey wen kenek nawa ye. Tey angat bud kbungu le yó kem grép, dalang se yóm tonok ye tey angat ketbasen ne angat gel hkulónu bè klamangen. Yóm kdéen ni, angat gotu blayu ebè yó kem dù dou tau tebel bè Juda ne bè Israél mò tóbóngu kul.

Sikaraya 8:12 Referans Kwoze

Dwata 33:13

Yó udél Musis gbak ebè yó kem sfu Jusif, monen, “Dwata he hol hkulón du eta yóm tonok le ne wen él hesuten gu laan tonok mò tendo hméfê du.

Tekang Kbuten 27:28

Dwata he bemlay kóm amù lemwót gu bè longit mò hméfê yóm tonokem anì bong tebasen. Dwata he hol bemlay du kóm yóm mò gel ken ye ne yóm mò gel ninum ye.

Matyu 6:33

Ni dé hol nmò ye. Hol hogot ye ke Dwata klowil ye, ne hol nmò ye yóm gel hmoen kuy. Ke yó se nmò ye, Dwata he angat bemlay du kuy yó kem kdê wen mu ye du.

Sikaraya 8:6

Ni se bud udél yóm Dwata laen dù là gbeken du, monen, Déke bè kuy kehedem du, yu kem dù tau tebel yóm kmoen ni, là dohoen yó kem tulónu kuy yó koni. Okóm béléu do, yóm Dwata laen dù là gbeken du, hol tahu dohò se yóm kdéen ni.

Hagay 2:19

Anien ke laen dù bud halay ye ne anien ke là deng le mungu yó kem grép ye ne yó kem koyu fig ye ne yó kem koyu ulib ye ne yó kem dumu koyu mungu ye, tódô lenwóten ni ne yóm któbóngu kuy.”

Hagay 1:10

Yó gónóm mon, là kóen bud kmulón bè benwu ye ne laen kô dù hol tmowok du yó kem hulu ye.

Juwél 2:22

Ó kem ógóf lem bnes, béen bud mónó nawa ye, abay se deng nbuten bud gulék yó kem bnes. Angat le gotu bud mungu yó kem koyu ne angat bud gengón yó kem bungu fig ne kem bungu grép.

Sulat Jim 3:18

Yóm tau ke hulung mit sefyu lem blóng kem dumuhen tau, hol lómón ke wen bnék huluhen. Ne yó nutahen du yóm huluhen yó, duhen yóm kehyu kmò.

1 Kurin 3:21

Duhen yó, là hyuhen bélê ye ke mtukul tau salù ye. Bè ktahuhen, ou ne Apulus ne Pitér, dumu me stóbóng mò du yóm kuy kehyu. Hono kuy kehyu snéen yóm klamangen benwu, ne yóm klowil ye ne balù yóm angat katay ye, ne yóm gel sut bélê ye nim kmoen ni duhen ke yóm angat sut elem hulin kdaw, ni kdéen ni, hono kem kuy kehyu.

Husiya 14:5

Yó kmou yó kem tau Israél, lómón ke ou yóm amù gotu hnéféen kdéen. Angat le mból lómón bulók. Angat nelem kdolil le lómón kem koyu sidar bè benwu Libanun.

Isikél 36:30

Yó kem koyu mungu ye, angat tey kehbunguhu kul kkólen bè yó kem dumu hulu ye. Yó kem benwu hmilol kuy, là bud hennê le kuy ne lómón yóm gnan lemwót bè yóm tehe kbel bitil bong bè benwu ye.

Isaya 61:7

Là bud wen gónó ye myak ne, ne laen se dù tau bud hemyak kuy. Angat ye tódô henek bè yóm kuy benwu. Tódô sónmoen temnù yóm kendengen ye ne laen kô dù sónen yóm kligal ye.

Isaya 30:23

Duhen yó, ke wen hulu ye tódô hkulón Dwata etahen anì tey wen angat nuta ye. Ne yó kem ógóf ye tey wen gónó le mótób.

Tekang Kbuten 26:12

Bè yóm knô Isak bè yó bè Girar, wen tey hulu nmoen. Lemwót bè yóm gel któbóng Dwata du tey bong yóm gel tebasen botong lematu bud gel ulék yóm huluhen.

Isikél 36:12

Angat tey wen kem dou tau Israél bud mógów ta ye ne bud lu mfun kuy. Là bud henus ye kul ne yó kem ngà le.

Kem Udél Hlalak Tehe Selumun 19:12

Yóm klikò tau du yóm alì ksidek kebut yóm tau hol geta hol lómón klikoen du yóm ngel yóm gel mon le liyun. Okóm yóm kun kehyu nawa ebéléen yóm tau hol geta lómón kehyuhen bè bnes yóm amù.

Kem Lingón 72:3

Yó hnihu béléem, Dwata, anì tilob kógów klowil le yóm kdéen tau knamalen, ne anì tedeng yóm kukum lem blóng le.

Dwata 33:28

Yó gónóm mon, menek kbenwu le yó kem sfu Jakub. Gsengel nawa le du yóm tonok le tódô hono hulu tahen, dalang se yó kem grép gónón lemwót yó kem tifas gel ninum le. Yóm tonok le yó, tendo hnéfê yóm amù lemwót gu bè longit.

Dwata 32:2

Kehlingónu du nim toloku ni, hol lómón ke kulón gdek ete tonok, ne hol lómón ke amù te tonok. Yóm udélu ebélê ye ni, hol lómón ke blanas eta yó kem hulu ne hol lómón ke blanas eta yó kem bnes.

1 Bok Kem Tau Hol Geta 17:1

Wen sotu tugod Dwata boluyen Ilaydya lemwót bè Tisbi yóm sotu benwu snakuf Gilyad. Sotu kdaw, yó monen mò ke Ahab, “Mlan bè boluy yóm Dwata là matayen yóm Dwata yó kem tau Israél, yóm Dwata gel hógów do, wen tulónu kóm. Nbuten ni, laen dù amù duhen ke kulón lem yóm hilu halay efet bud monu mò kóm.”

Kem Lingón 85:12

Tahu se, tódô kok Dwata ebélê tekuy yóm kun tóbóng, ne angat tey tembas yó kem tonok tekuy.

Husiya 13:3

Yó gónóm mon angat le gotu lana ni kem tau ni lómón lobun ke hlafus, tódô kmanas ne lómón ke amù, tódô lana bè nóng kdaw ne lómón ke ubek holis bè lenos, là bud tonem du ne lómón kebel ofi tódô lana.

Hagay 2:18

Nim kemdaw ni,” mon Dwata, “gewuhen folò fat kdaw bè yóm gesyómen bulón, kdaw kehdeng ye du yóm gónón mteg yó kem hehek yóm dou Gónô. Lenwóten ni, nénég ye yóm kmò kógów klowil ye.

Jirimaya 31:12

Angat le semfulék ebè benwu le ne tey kehligal le semngal ta yóm bulul bè Jirusalim gónó le tmaba ebéléu. Tey kehligal le lemwót bè yó kem deng basahu kul. Wen halay ne tifas grép le ne hnolo ulib ne wen tey ngà ubiha le ne kem ngà safì le. Yóm kmò klowil le hol mkél bè yóm tonok tendo wen élen. Laen kô dù bud gónó le élél. Ne laen dù bud knangag le.

Isikél 34:28

Là bud hnamfas le kul ne yó kem tólóng benwu, dalang se yó kem ógóf lem bnes là bud nsék le kul. Angat tey menek kbenwu le, laen dù bud hmikò kul.

Isikél 36:9

Ngem tey kfihu kuy kem bulul ne angate sut lem blóng ye naw e tnóbóng yu. Angat bud wen dmadu ta ye ne bud mò hulu ta ye.

Juwél 2:19

Yó balaen yóm hni le, monen, “Ngem, bud henwitu yu halay ne tifas grép ne hnolo ulib ne angat tey gsengel nawa ye du. Là bud ye tau gel sendekà yó kem tólóng tau bè dumu benwu.

Sifanaya 3:13

Yó kem dù tau Israél tebel yó, là kô le mò sidek bè kem dumu le, là kô le mò kéng ne là kô le smukat. Tey menek klowil le ne menek ktungô le ne laen kô dù bud tau hmikò kul.”

Malakay 3:11

Ke yó nmò ye, angat tey kbungu yó kem hulu ye abay se hensengu yó kem kuled hemsidek du. Ne yó kem grép hulu ye, là kóen skas tendo kbungu le,” udél yóm Dwata laen dù là gbeken du.