Sikaraya 7:11 - Udél Dwata: Gna Kesfasad ne Lomi Kesfasad

¹¹ Yó kem tehe fù ye ekni, là kô hnungol le du yóm udélu ni. Tey kehgel le kulu le, mom nseng le klingu le anì là gungol le du.

Sikaraya 7:11 Referans Kwoze

Nihimaya 9:29

Deng eles hetgamahem kul, Dwata, yóm angat ktafakem kul ke là nimón le du yó kem hlauhem. Okóm lemwót bè yóm tey keheklabak le, deng mom nulé le yó kem hlauhem igò le temngón du lemwót bè yóm kimón le du gónó le mowil. Tey kem tau mgel kulu, deng mom knogol le uu, là kô dog hnungol le kóm.

Husiya 4:16

Tey mgel kulu le yó kem tau Israél, mkél le bè yóm ngà safì tolo nungel. Angat tódô bayau lu ditu bè gónó le mótób. Angat le mkél bè yó kem ngà ubiha tódô mótób bè gónón lamang bnes ne laen dù mofin kul bè yó kem hohon le.

Kul Nmò 7:57

Bè yóm kungol le du yóm udél Stéfén yó, tódô nseng le klingu le yó kem tau hol geta mogot kukum yó, tódô le gotu hetê demlu ebéléen.

Sikaraya 1:4

Bê ye abay dnalang kul kmò yó kem tehe fù ye ekni, balù udì ke hnungol le yóm gel tulón le kul yó kem tehe gel tugodu elem blóng le, yóm tehe kmon le du mò kul, ‘Ni se udélen ebélê ye yóm Dwata laen dù là gbeken du, monen, Knogol ye ne yó kem sidek gel nmò ye, hol tenflok ye ne.’ Okóm balù udì ke hnungol le o duhen ke nimón le o.

Isikél 3:7

Okóm hógówu uu ebè yó kem tau Israél ne là kô na le e hnungol kóm. Balù sem ou du, là kô hnungol le do, abay se hono le tau mgel kulu yóm kdê le.

Jirimaya 35:15

Són moen wen kem tugodu hógówu elem blóng ye anì hol tebel ye yó kem sidek gel nmò ye ne tenflok ye tmaba ebè yó kem dwata kéng anì menek klowil ye ta yóm tonok blayu kuy dalang se bè yó kem tehe fù ye. Okóm là kô hnungol ye dou ne là se kô nimón ye do.

Hibru 12:25

Duhen yó, hol tekuy temgama. Hol bê tekuy là hnungol ke mudél ebélê tekuy Dwata. Ngem yó dé kem tehe tau gnan ekni, tey kegtafak le lan le là hmungol yóm udél Dwata hlanen bè Musis ekni dini te tonok. Sélét mom tekuy ne là megtafaken ke knogol tekuy yóm mudél ebélê tekuy gu bè longit.

Kul Nmò 7:51

Henlós Stéfén kudélen, monen, “Tey bong mgel kulu ye yóm yu. Là kóen nô bè nawa ye yóm kimón ye ke Dwata. Là kô dog hnungol ye du yóm udél Dwata, mo ye mom hbokong. Hol ye mkél bè yó kem tehe fù ye ekni. Ke wen tô tulónen kul yóm Tulus Dwata, deng mom nseng le klingu le.

Sifanaya 3:2

Laen dù udél hnungol le, balù udél Dwata. Là kô le móyô ke wen tô hemtedeng kul. Là smalig le bè Dwata ne là se kô le hloni ebéléen.

Danyél 9:5

Okóm nim mi deng me gemsalà béléem, nmò me yóm là hyuhen. Deng natù me uu ne deng knogol me yó kem hlauhem ne yó kem hloloem kum.

Jirimaya 36:31

Tnafaku yóm tau hol geta yó dalang se yó kem fes lówóhen ne yó kem genlalen lemwót bè yó kem salà le. Gotu koku eta le ne eta yóm kdéen tau bè Juda ne bè Jirusalim yóm kdê glumfak deng eles oluhu eta le, abay se là kô hnungol le du yó kem deng eles hetgamahu kul.’ ”

Jirimaya 17:23

okóm là kô le hmungol ne là kô nimón le do. Tey mgel kulu le, là kô kenmón le du yóm hlolou kul ne là kô le medlà ke wen tafaku kul.

Jirimaya 7:24

Okóm yó kem tehe fù ye yó, là kô hnungol le dou ne là se kô kenmón le do. Deng mom yó nmò le yóm sidek lemwót bè yóm kgel kulu le ne yó kem sidek gel nô bè nawa le. Són moen temnù yóm ksidek nmò le, deng lana yóm hyu tehe tonu bélê le.

Isaya 6:10

Omin Dwata bud mon du mò do, “Yó kem tau alì mgel kulu le yó, henbalingem lu tau là hulungen hedem. Hol hbokongem lu, hol hbutóem lu anì là getnef le du lanen yóm ton le ne yóm gungol le. Abay se ke getnef le, déke beklil le ebéléu na le e hkó béléu salà le.”

Nihimaya 9:26

Okóm yó kem tauhem, Dwata, là kô dog nimón le kóm, deng mom kenbê le uu. Knogol le yóm hlauhem kul. Tódô hnatay le yó kem tugodem gel tô mit kul semfulék ebéléem. Ne deng mom nmò le yó kem alì kenbéem.

Nihimaya 9:17

Là móyô le hmungol, gotu klifót le yó kem dê hentaw ton deng tehe nmoem lem blóng le. Deng kenbê le uu, deng le mom mélék tau mò malak kul mulék ghesek bè Idyip. Okóm uu se yóm Dwata hulung hmifót, tey minggel nawam ne tey bong nawam yó kem tauhem, là kói mahil lembut. Tey kkoduhem kul yó kem tauhem, là kô nam e tódô bayà kul.

2 Tutul Israél 33:10

Wen udél Dwata ebè Manasi ne ebè yó kem tauhen, okóm là kô hnungol le du yó kem eles hetgamahen kul.

Kehewà 10:3

Tahu se, bud le mógów ebè Faro le Musis ne Aron, mon le mò du, “Yó udél yóm sana Dwata yó kem tau Hibru, yóm hol gónó mogot, monen, ‘Deng tey kegenen ne yóm là keheglaanem béléu. Hol hewótem lu ne yó kem dou tau anì na le e tmaba ebéléu.

Matyu 13:15

Abay se là móyô le dmalang ni kem tau ni, deng mom nseng le klingu le, deng le mom hidong. Ke bê le nmò yó dum yó, dilô le yóm gel ton le ne glileb le lanen yóm gel gungol le. Ngangen ne efet le mimón béléu,’ mon Dwata, ‘ne gotu hnifótu yó kem salà le.’

Isaya 46:12

Hol hnungol ye ou yu kem tau mgel kulu. Ofo kuy ke tolo mima he yóm kegmò ye bè yó kem hohon ye.

Jirimaya 7:26

Okóm balù sotu bélê ye ke wen hmungol kul duhen ke kemmón kul. Mom hgel ye kulu ye ne knogol ye o senta yóm kul kkogol do yó kem tehe fù ye.

Jirimaya 17:27

Okóm, mon Dwata, ke là nimón ye do ne ke là hetfing ye du ebéléu yóm Kdaw Kehegnô ne ke mit ye hbalù mlan bè yó kem bak tikeb bè Jirusalim lómón yóm gel nmò ye bè yó kem dumu kdaw, angat gotu ntemu yó kem bak tikeb bè Jirusalim. Yóm ofi yó, ngangen mken efet kól bè gónô bong yóm tau hol geta mogot kuy ne laen kô dù gembek hmatay du.’ ”

Jirimaya 42:21

Nim kemdaw ni deng gotu tulónu kuy se yóm hol udélen ebélê ye yóm sana kut Dwata hol gónó mogot, okóm là kô nimón ye du. Yóm là kimón ye nim kmoen ni, hol mkél bè yóm tehe gna là kimón ye.

Isaya 28:12

Yó tô blay Dwata kuy, yóm benwu gónó ye henek nô ne yóm udél hemyu nawa ye. Okóm là kô ye móyô hmungol du.

Jirimaya 19:15

“Ni se udél yóm Dwata laen dù là gbeken du, yóm sana kuy Dwata kem tau Israél, monen, angat wen tey heglumfaku du yóm syudad ni dalang se yó kem benwu hmilol du, hol lómón yóm deng monu mò kuy, abay se tey mgel kulu ye, là kô hnungol ye dou.”