Sikaraya 4:6 - Udél Dwata: Gna Kesfasad ne Lomi Kesfasad

⁶ Ominen mon du mò dou, “Ni se udél Dwata ebè Sirubabél. Yóm nmoem là lemwóten bè kegbek tau duhen ke bè kgis tau, okóm lemwót bè dou Tulus, udél yóm Dwata laen dù là gbeken du.

Sikaraya 4:6 Referans Kwoze

Kem Lingón 33:16

Là kô yó du gónón gemmò bè gida yóm tau hol geta mogot benwu ke mlan bè kgis yó kem sendaluen. Senged se yóm sendalù, là lemwóten bè kun kgis gónón gemmò se kun.

Husiya 1:7

Okóm yó kem tau bè Juda, angat hegfanu bélê le yóm kkoduhu kul. Tódô ou angat lemwà kul lem tdok yó kem hohon le, bede là mlanen bè gida ne là mlanen bè boho le duhen ke bè sudeng le. Là mlanen bè yó kem tey kudà le duhen ke bè yó kem sendalù smakay kudà, bede mlan bè yóm dou kfasang yóm sana kul Dwata hol gónó mogot.”

2 Tutul Israél 14:11

Yó udél Asa hkodu bè Dwata yóm kun Dwata hol gónó mogot, monen, “Ó Dwata, tek són uu gembek tmóbóng kul yó kem sendalù laen hol gmò le bè yó kem sendalù alì layam. Hol tnóbóngem mi, Dwata yóm kum Dwata hol gónó mogot, yakà uu du yóm kum snalig. Ne mlan bè boluyem gónó me mógów ebè ni smolu ni kem tey sendalù wen ni. Ó Dwata uu se yóm kum Dwata, hol béem hlus ke gemmò béléem yó kem tau tonok.”

Isaya 32:15

Bede angat bud hwit Dwata elem blóng tekuy yóm kun Tulus. Yó kem tonok là bud hyu mò hulu tahen, angat bud baling tonok hyu ne angat tey bong nuta le du.

Isaya 30:1

Ni se deng udél Dwata, monen, “Deng le gotu golu elem hatay ne yó kem tau malak bè Juda lemwót bè yóm kkogol le do. Tódô lolò le yóm atul là lemwóten béléu. Sundu dou kóyô du yóm gel senkotuk le bè dumu benwu. Lemwót bè yóm nmò le yó tendo temnù yóm salà deng gel nmò le.

Lista 27:16

“Ó Dwata, yóm dou gónó mogot. Uu se gónón lemwót yóm kdéen mowil. Mnihe béléem anì méléki sotu tau mò hlós malak kul ni kem tau ni,

1 Pitér 1:12

Ne bud hetngón Dwata bè yó kem tehe tugoden yó, là bè kul kehyu du yóm hennagì le yó, okóm bè kuy kehyu. Ne tahu se. Yóm tehe gel tulón le yó ekni, deng gel gungol ye se kuy nim kmoen ni lemwót bè yó kem tau gel tmolok bélê ye yóm Tulón Hyu hlan le bè kfasang yóm Tulus Dwata gu bè longit. Yóm kegewà tekuy gu lem hatay, balù yó kem hógów Dwata gu bè longit, tey tô kóyô le temngón du se kul yóm kmò Dwata du.

Ifisus 6:17

Yó henged sloung tók eles tendo gel sudù tekuy, duhen yóm deng kegewà tekuy. Ne yó kfilan blayen tekuy yóm Tulus Dwata, duhen yóm Udél Dwata.

Tekang Kbuten 41:16

Omin Jusif malà du, monen, “Là. Tek són Dwata gembek tmulón du kóm lan yóm knahem anì hol gsengel nawahem.”

1 Samwél 14:6

Yó udél Junatan ebè yóm tau mit klungen, monen mò du, “Géhéli, hnusek te kamfù yó kem Flistin là hemtahu bè Dwata yóó. Là tngónem du déke tnóbóngen tu Dwata. Ke tnóbóngen tu, laen kô dù hemseng du bè yóm kehegmoen kut baluen ke tek sónen tu.”

1 Samwél 17:47

Ne gotu tngón le snéen là mlanen bè sudeng ne là mlanen bè buyus yóm kehewà Dwata yó kem tauhen. Bè yóm kesfatay me ni, Dwata mit du ne gotu blayen yu elem hólól me.”

1 Bok Kem Tau Hol Geta 19:12

Kogol yóm linol, bud wen tey ofi msut, okóm là kóen nô du Dwata. Ne kogol yóm ofi yó, wen ngà boyong gungol Ilaydya.

Isra 3:10

Timbow deng gotu deng kmò le begelen yóm Gónô Dwata yó, lemwót yó kem tau gel blóng ebè Dwata lesek le yóm nes gel lesek le bè yóm keseblóng le tau ebè Dwata, mogot le féw ne mdà le bè yóm kul gónó mdà mféw. Lemwót se kul yó kem sfu Libay lemwót bè tbong Asaf, bud le mdà bè yó snéen, sendofì le yóm kul gel nuni. Tey kdóyón le ke Dwata, tódô lolò le yóm hlolò bè yóm tehe kun kdaw Dabid.

Kehedem Tau Tmolok 9:11

Bud wen sotu tonu talak tonok. Yóm tau alì hlóng mlóy, là kô du du yóm gel gemmò bè skuya. Ne yóm sendalù alì kemgis, là kô du du yóm gel gemmò bè gida. Yóm tau alì hulung hedem, là kô du du yóm gel wen klowilen. Ne yóm tau wen kenhulungen, là kô du du yóm gel wen kendengenen. Ne yó kem tau alì wen hennagì le là kô són lu du yóm wen gónón e kól klowil le. Abay se tódô sut bè ket tau yóm kun bagì.

Danyél 2:34

Okóm bè yóm igoem temngel du yóm lennged yó, tódô tonem yóm botu lemkà gu bè yóm tey léhék lómón ke wen kemleng du, bede sundu tau du mò du. Ne tódô gdek te hólól ti yóm tau lennged mdà bè yó, yóm hólól tihen sbool bala tók ne tonok miket ne tódô gotu musok.

Hagay 1:1

Tehe yu ekni, wen tau hol geta kmamal bè Pérsya boluyen Daryus. Bè yóm hol tanay kdaw bè gnemen bulón bè yóm gewuhen halay kmamal bè yóm benwu yó, wen udél Dwata hlanen bè yóm sotu tugoden boluyen Hagay. Yóm udélen yó, hwiten ebè yóm gubérnor bè prubinsya Juda boluyen Sirubabél yóm ngà Syaltil logi ne ebè yóm geta bè yó kem gel demsù ebè Dwata boluyen Juswa ngà Jihusadak.

Hagay 2:21

ebè Sirubabél yóm gubérnor bè Juda. Yó udél hwiten, monen, “Móyón kninsigu longit ne tonok.

Sikaraya 6:12

Tulónem du udél yóm Dwata laen dù là gbeken du, yó monen, ‘Ngem, yóm sotu tau bnoluy Hanga. Tey angat ktubeden, du mò bud hemdà du yóm dou Gónô.Tahu se, du se angat hemdà du yóm kun Gónô Dwata ne tey kadat le du lómón kadat le yóm tau hol geta ne nogoten yó kem tauhen lemwót bè yóm gónón myón kmamal. Ne lenwóten bè yóm gónón myón kmamal, bud du se mò blóng le ebè Dwata ne tey tilob kessogot yóm lewu nmoen yó.

Isaya 59:19

Lemwót bè yó kem benwu fi dmata kdaw kól bè yó kem benwu fi desdef, gotu le likò du. Knikò le yóm alì kfasangen. Yó kmoen kul bè yóm kógówen elem blóng le, hol lómón ke dunuk yóm tey él bong, duhen ke mbel yóm hol yéen lenos bong.