Sikaraya 14:8 - Udél Dwata: Gna Kesfasad ne Lomi Kesfasad

⁸ Bè yóm kdaw yó, wen él hlowil mlel lemwót gu bè Jirusalim. Yóm sóól yóm él yó mlel ebè Mohin Héét ne yóm sóólen mlel ebè Mohin Miditiranyan. Tódô senflósen mlel, baluen ke bulónen kinì duhen ke bulónen tnaw.

Sikaraya 14:8 Referans Kwoze

Kun Snulat Jan 7:38

Lómón yóm monen bè Sulat Dwata, ‘Yó se tau hemtahu ebéléu, hol lómón ke wen tbul él gu béléen, yóm él hlowil tau.’ ”

Kun Snulat Jan 4:14

Okóm yóm tau minum yóm él dou blay, là kóen na a bud meeng. Yóm él blayu yó, baling sfut él mò gónó gmuta yóm klowil laen dù sónen.”

Kun Snulat Jan 4:10

Ne bnalà Jisas se yóm libun yó koni, monen, “Ke deng tngónem yóm tô blay Dwata kóm, ne ke tngónem yóm tau mni él béléem, dengi bud semwì mni él béléen ne anì benlayen uu yóm él hlowil tau.”

Juwél 3:18

Bè yóm kdaw yó, tódô hono lefà grép bè yó kem bulul lembang ne bè yó kem bulul lemnek, tódô hono safì mótób bè yó. Angat bud wen él mlel bè yó kem sbong deng kti bè Juda. Ne angat wen él tembul gu lem yóm kun Gónô Dwata, gotu hnéféen yóm Datal Koyu Akasya yóm datal mékéng tonoken.

Juwél 2:20

Angat kóhu lem blóng ye yó kem tey lememek lemwót fi gu bwak, gotu dkolu lu mayuk ebè tum benwu là hyu menwu du. Yóm lumbuk le tukô gna, gotu dkolu ebè Mohin Héét. Yóm lumbuk le huli, dkolu ebè Mohin Miditiranyan. Tódô lenngeben nim benwu ni yóm boo bolok le.” Tahu se, tey bong hentaw yóm deng nmò Dwata.

Isaya 49:10

Laen dù bud angat gónó le bitil ne laen kô dù bud gónó le meeng. Balù yóm alì sidek kkinien bè yóm benwu là hyu menwu du, là kô gehsideken kul abay se eles nalaken lu yóm kembong nawa kul. Angat gel nalaken lu ebè yó kem tbul él.

Deng Hegfan 22:17

Yó udél yóm Tulus Dwata dalang se yóm libun yehen yóm Ngà Ubiha, mon le, “Géhél ye ne.” Ne yó kem tau mungol du, yake bud mon le kul, “Géhél ye ne.” Géhél le edini ne yó kem tau meeng na le e minum bè yóm él hlowil tau, yóm él là kô feng benli du. Yóm tau móyô, géhél minum ne.

Isaya 35:7

Angat baling lanaw yóm helek tehe alì sidek kkinien. Ne yóm benwu tehe alì mékéng tonoken, angat dê tbul élen. Bè yóm tehe gónón mékéng gónó le nô yó kem ógóf mayal, tódô angat wen sed tmowok bè yó, dalang se yó kem dumu hulu gel tmowok lem hitok.

Kun Snulat Luk 24:47

Lemwót bè kun boluy, wen lan Dwata hmifót salà yó kem tau deng hegsel.’ Ni se,” monen, “yóm tulón angat hlós sensból ye bè klamangen benwu. Bè ni bè Jirusalim gónó ye mbut hból du.

Isaya 58:11

Ne tendo gel sen-galaku yu ne hegsengelu nawa ye bè yó kem hyu blayu kuy. Tendo gel hekgisu lówó ye ne hlayuku bélê ye yó kem des. Lómón ke yu yóm gónó mò hulu eles tendo héfê tonoken ne lómón ke yu yóm tbul él là ktihen.

Mika 4:2

Tey dê but tau angat mógów ebè yó, yó udél le, “Lemwót tekuy ne mneged eta yóm bulul Dwata, mógów tekuy etu bè Gónô yóm Dwata yó kem tau Israél. Bè yó gónón tmolok du tekuy yóm kun kóyô anì lolò tekuy yóm kun lan.” Abay se bè yó kem kdaw yó, lemwót bè Jirusalim yóm kun tolok Dwata ne yóm kun udél.

Sikaraya 14:4

Bè yóm kdaw yó, angat mdà ta Bulul Ulib Dwata, yóm bulul fi dmata kdaw Jirusalim. Ne yóm Bulul Ulib yó, tódô meskang bè gónón sóól, baling datal lamang lenwóten fi dmata kdaw kól desdef. Yóm sóól yóm bulul yó tódô mili fi bwak ne yóm sóólen tódô mili fi leged.

Kun Snulat Jan 5:4

Gel wen kdawen kun mógów elaan yóm hógów Dwata gu bè longit nan e gel hewók yóm busung. Yó se tau gegna kmó elemen igoen tolo lemwók, tódô mkó yóm desen, balù kihu kay desen.)