Sikaraya 14:7 - Udél Dwata: Gna Kesfasad ne Lomi Kesfasad

⁷ Tódô senflósen kemdaw. Són Dwata néen temngón du mò kmoen yóm ni. Là bud tngónem du ne ke kemdaw duhen ke kifu. Baluen ke deng kifu, sana klayagen.

Sikaraya 14:7 Referans Kwoze

Deng Hegfan 22:5

Laen kô dù kifuhen yóm benwu yó, ne laen se kô dù bud muhen ne yó kem nóng solok duhen ke nóng kdaw, abay se yóm Dwata gónó le mogot seflós mò layag le. Ne angat wen hogot Dwata kul, ne laen kô dù sónen yóm kogot le du.

Deng Hegfan 21:23

Ne laen kô dù nóng kdaw duhen ke nóng bulón bè yóm syudad yó, abay se yóm layag Dwata tódô seflós mnóng bè yó, ne yóm Ngà Ubiha henged soloken.

1 Tisalunika 5:2

Abay se deng hónô tngón ye se kuy yóm kektuten tau yóm kdaw kkól yóm gónó tekuy mogot, hol lómón kektuten tekuy yóm tau mnagaw kifu laen hemkól du.

Danyél 12:4

Okóm kóm, Danyél, hol bunihem yóm deng tngónem ni. Hol nmoem dketen yóm lenulun deng gónóm smulat du efet nan ne kól yó kem hol són kdaw. Tey dê kem tau elem hulin kdaw sónmò le mógów na le e smólók anì temnù yóm gel tngón le bè yóm gel sut e lem blóng le.”

Isaya 30:26

Yóm nóng bulón lómón ktatawen nóng kdaw. Ne yóm nóng kdaw alì mkay senta yóm gna gel knóngen. Ni se kmoen bè yóm kdaw angat kbulung Dwata du yó kem tehe halien kuy ne gotu hkóhen lu. Là gomongen bè nili yóm bérs 27 kól bè 33. Bud tulón Isaya yóm angat kkól Dwata mung du yóm tey sidek kebuten yó kem hohonen, kem tau Asirya. Ke uhayen eta le yóm sigelen alì kemgis mit du yóm ofi gónó meglà, mung du yóm hol yéen kulón bong, lel leték ne bulók kulón alì lembang mò na a gemlà kul. Bè yóm keglà yó kem hohon le, gotu le hligal semngal kdê yó kem tau Israél ne huni le yó kem tamburin le ne yóm sotu gel kenbit le. Yó monen bè bérs 33, “Yóm benwu Tufét, benwu gónó le gel mtem deng legen ne eles ketgama le du bè yóm tau hol geta bè Asirya, deng eles wen tey tumfuk koyu luduk le bè yó. Yó mò hdilóf du, yóm nawa gu lem bak Dwata, hol lómón ke ofi gu bè yóm bulul btù.”

Kul Nmò 17:31

Yakà dengen mdengen kbuteng Dwata du yóm angat kkukumen yóm kdéen tau, hlanen bè yóm tau deng néléken, ne tey tedeng yóm angat kkukumen kul. Wen gónó Dwata hdilô du bè kdéen tau yóm tau deng néléken yó, duhen yóm deng kehlowilen du.”

Kul Nmò 15:18

Ni se udél Dwata. Tehe yu ne ekni eles kehetngónen du nim ni.’

Kul Nmò 1:7

Bnalà Jisas lu, monen, “Deng eles tngón Mà yóm kdawen mò du bélê ye yóm snólók ye yó, abay se tek sónen du yóm wen kwalisen mò du. Laen dù tagad kuy hentngón du he.

Mark 13:32

“Laen kô dù temngón du yóm kdaw angat kesfuléku,” mon Jisas, “duhen ke tedu urasen. Balù yó kem hógów Dwata gu bè longit, là kô tngón le du se kul. Dalang se do, là kô tngónu du. Tek són Mà bè longit temngón du.

Matyu 24:36

“Laen kô dù tau temngón du yóm kdaw angat kesfuléku duhen ke tedu urasen,” mon Jisas. “Balù yó kem hógów Dwata gu bè longit, là kô tngón le du se kul. Dalang se do, là kô tngónu du. Tek són Mà bè longit temngón du.

Jirimaya 30:7

Móyónen kól ne yóm kdawen wen tey glumfak, kdaw laen dù bud gónóm e hmingón du, kdaw le hol glayam yó kem dou tau Israél, okóm bè hol sónen gewà le.”

Kem Lingón 37:18

Tendo sen-gifà Dwata yó kem tau mimón du, ne laen kô dù sónen kfun le du yóm tonok tehe fasaden kul.

Deng Hegfan 21:25

Ne yóm tikeben yóm syudad yó, tódô gel mngal ket kdaw abay se laen kô dù tul kkifuhen bè yó.

Deng Hegfan 21:3

Ne tódô gungolu se yóm mudél lemwót bè yóm bangkù gónón myón yóm fen kmamal, hgelen udélen, monen, “Ngem yóm kun gónó nô Dwata, deng eles nô lem blóng kem tau ne. Angat tódô hlós nô bélê le, ne lu se baling kem kun tau. Là kóen na a bud skó bélê le ne, yakà du se kul Dwata.

Deng Hegfan 14:6

Kogolen bè yó, tódô tonu yóm sotu hógów Dwata móyóng hegeta te kmawang. Yó nmoen, tulónen yóm Tulón Hyu laen dù sónen lemwót bè Dwata. Tódô kentihen tau bè klamangen benwu gónón e gefet yóm tulónen yó, tódô gefet bè ket but tau, bè ket kay udél, ne bè ket ból tau.

Deng Hegfan 11:15

Ominen mféw yóm ghitu yó kem hógów Dwata, sen-gengu se mungol yóm tey udél gu bè longit, mon le, “Deng hto ne yóm kul kdaw mogot klamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.”

Kul Nmò 17:26

Tek sotu tau nifil Dwata bè kbuten,” mon Pol. “Yó se gónón lemwót kdéen kay but tau. Hnóen lu bè klamang benwu nmoen. Eles tngónen snéen yó kem benwu gónón hemsù kul yó kem ket but tau, ne tngónen snéen yóm kegen le nô du.

Husiya 3:5

Okóm kogolen bè yó angat le bud semfulék ebè yóm sana kul Dwata hol gónó mogot yó kem tau Israél. Bud le semfulék ebè yóm tau sfu Dabid mò mogot kul. Lemwót bè yóm tey klikò le ke Dwata, angat tódô setbol kkel le bè yóm bud kesfulék le ebéléen, bede angat guta le yó kem hyu angat tóbóngen kul elem hulin kdaw.

Isaya 11:9

Bè yóm bulul Sayun yó yóm kun bulul Dwata, là kô wen tonem fen hemsidek bè yó, tódô hono hyu kdéen. Bè klamang yóm benwu yó, laen kô dù tau tonem là temngón ke Dwata. Yóm ketngón le ke Dwata tódô lengeben yóm klamang benwu le, hol lómón yóm mohin tódô tfeng él. Là gomongen bè nili yóm bérs 10 kól bè 16. Yó htulón Dwata ke Isaya bè ni kem bérs ni, yóm kmoen bè yóm kdaw deng monen yó koni, yóm gotu bud kógów yóm kdéen but tau talak tonok ebè yóm ból tehe Dabid, duhen yó yóm Misaya, yakà teyen knóón yóm kun benwu. Yó monen bè bérs 11-13, “Bè yóm kdaw yó, ni se yóm gewuhen dulék bud kehfulék Dwata ebè benwu le yó kem tau dù tebel. Gotu bud sentifunen lu yó kem tau Juda deng sekla ebè són tonok. Ominen yó he tódô lana yóm ksélés nawa yó kem tau Israél ne yó kem tau Juda. Là bud le sfatay ne honon lu. Gotu senlomong le yóm kdê sendalù le,” ne gotu nundug le yó kem benwu lenwóten fi dmata kdaw kól desdef. Gotu nwa le kdê kem tonok bè yó kem tau bè Idom ne Muab ne Amun.

Isaya 9:7

Angat sónmoen tendo temnù yóm kfasangen mogot tau ne angat senflósen menek yóm benwu nogoten. Du se mò tles Dabid bè yóm tehe kogoten benwu. Yóm kmò kogoten tau angat hlanen bè yóm tey kukum tedeng nwiten. Ni se angat kmoen lemwót bè kbuten kól bè hol sónen. Hol nô bè nawa Dwata mò du yóm kdéen ni yóm Dwata laen dù là gbeken du. Là gomongen bè nili yóm bérs 8 kól bè 21. Yó tulónen bè ni, yóm htulón Dwata ke Isaya bè yó kem tau Israél menwu fi bwak ne ebè yó kem tau Israél menwu lem syudad Samarya yóm yê yó kem syudad bè benwu le. Yó mon Isaya bè bérs 13, “Kogol yóm kdê tafak ni, ewenem sana là kehegsel yó kem tau ne là kô le mulék ebè yóm Dwata laen dù là gbeken du.” Mom yó udél yó kem dù tebel, mon le, “Deng tey kegbà nim benwu tekuy, okóm bud hol hbegel tekuy hemdà du mkay senta yóm gnahen.” Yó balà Dwata du yóm alì keheklabak le yó, duhen yóm bud kehwiten du elem blóng le yó kem benwu hohon le mò gemlà kul. Monen bè bérs 14-16, “Tek olo sendawen gemlà du Dwata yó kem gel malak bè Israél ne yó kem tugod Dwata gel mò kéng. Yakà yó kem malak bè Israél yóm mit kul meglà yó kem tau.”

Isaya 45:21

Géhél ye stifun anì snabà ye yóm kkukumu kuy. Eles ye stulón són yu. Tau du de deng gna eles tmulón du yóm kegbà Babilun yó? Kaem ou se yóm eles tmulón du, yóm Dwata gbeken lemwà yó kem tauhen. Laen kô dù dumu dwata bè klamangen, tek sotuhu.

Isaya 58:10

Hyu ke benlay ye ken yó kem bitil ne hegsengel ye nawa yó kem tau wen gónó le élél. Ke yó se nmò ye, angat baling layag yóm tey kkifuhen hmilol kuy, lómón layag kdaw gtungó.

Amus 8:9

Bè yóm kdaw yó,” mon yóm Dwata hol dandónen geta, “hesdefu kdaw anien ke tolo gtungó ne hkifuhu talak tonok anien ke tolo kemdaw.