Sikaraya 14:5 - Udél Dwata: Gna Kesfasad ne Lomi Kesfasad

⁵ Angat ye mlan bè yóm datal ni bè yóm klóy ye, abay se gefet ditu bè Asal yóm datal ni. Tódô ye gotu mlóy lómón yóm tehe klóy yó kem tehe fù ye ekni bè yóm tehe kbel linol bong bè Juda bè yóm tehe kun kogot Usiya. Ominen yó, sut yóm sana dou Dwata hol gónó mogot, mung du yóm kdê gel hógówen.

Sikaraya 14:5 Referans Kwoze

Amus 1:1

Bè yóm tehe kogot Usiya yóm benwu Juda, yó fen mogot yóm benwu Israél duhen Jirubuam yóm ngà Jihuas logi. Bè yóm kdaw yó, wen hton Dwata ke Amus yóm tau gel semgyok ubiha bè yóm sotu benwu boluyen Tikwa. Yóm hton Dwata du gbak ebè yó kem tau Israél. Yóm kwen htonen du ni, lewu halay he duen gu laanen là deng mbel linol bong bè benwu le.

Matyu 25:31

“Kesok bud kól yóm Ngà Tau mò mogot klamangen,” mon Jisas, “tódô kdéen hógów Dwata gu bè longit gotu semguyun du, ne angat myón bè yóm gónón myón kmukum.

Matyu 16:27

Yakà angaten bud semfulék edini yóm Ngà Tau,” mon Jisas. “Bè yóm kesfuléken yó, gfan béléen yóm tey kegeta Maen, ne gotu le mung du yó kem gel hógów Dwata gu bè longit. Bè yóm kdaw yó, tódô gotu blayen yó kem tau yóm balà yóm tehe deng gel nmò le.

1 Tisalunika 3:13

Ni se mò lanen hol temgel kuy anì hol ye gulit ne mólós ke mdà ye bè solu Dwata yóm Mà tekuy, bè yóm kdaw angat kesfuléken edini yóm gónó tekuy mogot, mung du yóm kdê kun tau.

Deng Hegfan 20:4

Ominu yó bud mton yó kem bangkù gónó le myón yó kem tau benlay le glal kmukum. Bud tonu se lóyóf yó kem tau deng tehe hnatay le lan le tmulón yóm ktahuhen tehe tolok Jisas, ne lan le tmolok Udél Dwata. Ni kem tau ni, là kô hentahu le du yóm lóbô tanay sut. Dalang se yóm lennged hmoen, là kô hentahu le du. Ne là se henmóyô le du yóm kun ilô yóm lóbô, yóm gel nmò le lem uyó le duhen ke te henmù le. Ni kem tau tehe hnatay le ni, gotu le bud mowil, ne gotu le mung kmamal bè Krays bè yóm lemibu halay.

Deng Hegfan 11:13

Ne tódô sen-gengen se yóm tey linol bong bè yóm syudad yó. Botong móyónen gbut bè yó kem gónô le, gotu gbà, ne botong hitu libu tau matay. Ne yó kem dumu tau là matayen, ya tey sidek klikò le, botong dóyón le yóm Dwata nô bè longit lan le mton yóm tey kfasangen.

2 Tisalunika 2:8

Ne yó he kehegfanen yóm tau alì hulung mò sidek yó. Okóm bè yóm kkól yóm gónó tekuy mogot Jisas, angat tódô hnatayen mlan bè kyufen du. Tódô mekto meglà yóm tau yó lemwót bè yóm tey keslinang yóm gónó tekuy mogot.

Kem Lingón 96:13

sok kól Dwata mò kmamal yóm klamangen. Angat tey tedeng yóm kkamalen kdéen tau, laen kô dù mtukul nfihen.

Dwata 33:2

“Hesut gu bè Bulul Sinay yóm sana Dwata hol gónó mogot. Lómó khesuten lómón khesut yóm kdaw eta benwu Idom. Lenwóten bè Bulul Paran, mnóng ebè yó kem kun tau. Botong sfolò libu hógówen mung du ne wen yóm ofi tendo dmilóf fi bè sigel kwananen.

Deng Hegfan 20:11

Ominu yó bud mton yóm bangkù alì sminang bukay gónón myón yóm fen kmukum, ne tonu se yóm myón tahen. Ne bè yóm ketngelu du, tódô lana bè yó bè soluhen yóm tonok ne longit, là kô bud tonem kul ne, bà udì.

Sulat Jim 5:8

Dalang se kuy, hol hanay ye nawa ye. Ne hgel ye nawa ye, yakà dengen moni ne kkólen yóm gónó tekuy mogot.

Kun Snulat Luk 21:27

Ominen yó he hegfan yóm Ngà Tau htuntun gu tta mung bè lobun. Angat ton le se yóm tey kfasangen ne yóm tey kegetahen.Ke sok nbuten sut ni kem tulónu kuy ni hol ye hbegel ne temngel ye ebè Dwata, yakà dengen móyón moni yóm kegewà yu.

Matyu 24:3

Ngang Jisas mógów efet kól bè Bulul Ulib, ne myón bè yó. Omin le mógów ebéléen yó kem gel lemolò du, són lu, snólók le béléen, mon le, “Ó Sér, kilón kdohoen yóm deng tulónem kum yó koni? Tedu de ilô me du yóm bud ksutem ne yóm hol són kdaw?”

Kem Lingón 98:9

bè solu Dwata. Yakà kól Dwata nan e knukum klamang benwu. Knukumen klamang benwu mlan bè ktedengen, ne laen kô dù mtukul nfihen.

Lista 16:34

Gotu le mlóy yó kem dumu tau Israél nô bè yó bè yóm kungol le yóm langat yó kem tau geblos etlaan. Gotu le lemangat se kul yó kem tau mlóy, mon le, “Mlóy tekuy, déke gotu tekuy gomong geblos bélê le.”

Juwél 3:11

Hgéhél ye ne yóm kdéen tau bè klamangen benwu, gotu ye stifun ditu bè datal.” Yó ne, Dwata, hol hwitem etu yó kem kóm sendalù.

Sikaraya 4:7

Baluen ke kbongen bulul he tô hemseng ke Sirubabél, botong sentunalu. Ominen yó, du hemsù du yóm hol són botu mò hdeng yóm dou Gónô ne yóm igoen mò du, angat le gotu mensag yó kem tau, yó tendo sensulit mon le, ‘Hol dóyón tekuy Dwata yóm deng kdeng yóm kun Gónô.’ ”

Mika 1:11

Ó kem tau bè Syafir, hol ye hyak bè yóm kegef le kuy laen dù nes. Yó kem tau bè Saanan, là kô le hewà gu lem syudad le, likò le. Yó kem tau bè Bit-isil, gotu le langag, abay se laen dù gónó le hofin bè yó.