Sikaraya 10:1 - Udél Dwata: Gna Kesfasad ne Lomi Kesfasad

¹ Bè yóm kdaw ye mò hulu, mni ye bè Dwata kulón. Dwata se mò du yó kem lobun mit kulón ne gel hkulónen ebè yó kem hulu ye.

Sikaraya 10:1 Referans Kwoze

Isaya 44:3

Angat nmou él gu lem yóm benwu balù udì ke tehe wen élen. Ne wen él hlelu bè yóm tonok alì sidek kékéngen. Ne tódô suu bè yó kem ngà ye yóm dou Tulus ne tey któbóngu yó kem sfu ye.

Sulat Jim 5:7

Duhen yó, kem dumuhu setwoli, hol hanay ye nawa ye efet kkól yóm gónó tekuy mogot. Lómón yóm tau tmiba, sal hanayen nawan efet gutahen bungu yóm huluhen. Hanayen se nawan hmatan kulón mò htowok ne hbungu yó kem huluhen.

Isikél 36:37

Yó bud udél yóm sana Dwata hol dandónen geta, monen, Hyu béléu ke bud wen sotu hni le béléu yó kem tau Israél, duhen yóm kehwenu ból le lómón kwen yó kem tehe ubiha le.

Isaya 30:23

Duhen yó, ke wen hulu ye tódô hkulón Dwata etahen anì tey wen angat nuta ye. Ne yó kem ógóf ye tey wen gónó le mótób.

Kem Lingón 65:9

Tey kehedemem du yóm tonok, Dwata. Sal gel hkulónem etahen anì hyu, ne anì hol mabù huluhen. Ne senflósem hlel kul yó kem él. Ne wen se kem hulu htowokem te tonok mò hlowil tau, yó se kmoem du.

Dwata 28:23

Angat là kô hkulón Dwata du eta yóm tonok ye efet gotu baling mgel, hol lómón kgelen bala tók.

Kun Snulat Jan 16:23

Bè yóm kdaw yó, là bud wen hni ye béléu ne. Tódô tulónu kuy ktahuhen,” mon Jisas, “balù kihu hni ye bè Mà hlan ye bè dou boluy, tódô blayen kuy.

Mika 5:7

Ominen lemwót yó kem dù mowil bè yó kem tau Israél menwu lem blóng yó kem tólóng benwu, hol lómón kmò le ke amù hwit Dwata ebè yó kem dumu tau, duhen ke kulón mò hméfê bnes. Són Dwata snalig le, là kô le smalig bè tau.

Amus 4:7

“Là kô hkulónu du bè yóm kdaw alì kwen muhen bè yó kem hulu ye ne gotu sidek yó kem hulu ye. Deng hkulónu bè yóm sotu syudad, okóm là hkulónu du bè yó kem dumu syudad. Kmulón ebè sotu tonok gónó mò hulu, fen là bè yó kem dumuhen, hlós tódô mékéng.

Isikél 34:26

Tendo nuyagu lu yó kem dou tau ne suu lu hilol yóm dou bulul, bè yó gónóhu tmóbóng kul. Hkulónu elem benwu le bè yóm kdaw wen mu le du. Bud lómón yó se angat tendo kehkulónu du ebélê le yóm tóbóngu kul.

Jirimaya 14:22

Laen kô dù bè yó kem dwata kéng ke gbeken hkulón. Balù longit, là kô gbeken du hkulón ete tonok. Són uu, Dwata, ken-gel nawa me yóm hol kum gónó mogot. Tek són uu gembek mò du ni kem hni me béléem ni. Nangat me yóm któbóngem kum.

Jirimaya 10:13

Ke mudél Dwata gel lemugung gu bè longit, gel hlobunen gu ta kmawang. Gel heksilaen mung bè kulón ne wen lenos hwiten gu bè yóm gónón gel hemyu.

Isaya 5:6

Là bud hnayahu du ne yó kem huluhu yó. Là se bud hen-gifatu du ne là kô bud lenbudu du. Kihu ne ke tfeng kluon semnual tmowok lemen. Balù lobun, sana kdóku kul anì là kmulónen bè yó.”

Kem Udél Hlalak Tehe Selumun 16:15

Sok lingas lem uyóhen yóm tau hol geta uka wóyón hlowilen u ne yóm kehyu nawahen ebéléem lómón se yó nem kehyu yóm kulón bè yó kem hulu.

Kem Lingón 104:13

Gel hkulónem gu bè longit eta yó kem bulul, yó se mò lanem tmóbóng yóm tonok.

1 Bok Kem Tau Hol Geta 17:1

Wen sotu tugod Dwata boluyen Ilaydya lemwót bè Tisbi yóm sotu benwu snakuf Gilyad. Sotu kdaw, yó monen mò ke Ahab, “Mlan bè boluy yóm Dwata là matayen yóm Dwata yó kem tau Israél, yóm Dwata gel hógów do, wen tulónu kóm. Nbuten ni, laen dù amù duhen ke kulón lem yóm hilu halay efet bud monu mò kóm.”

1 Kurin 3:6

Ke hningónu yóm nmò me lem blóng ye, lómón ke ou yóm tau fen mò hulu, ne Apulus fen temwél du él. Okóm Dwata fen htowok du.

Husiya 6:3

Tey hyu dé ke hol tngón tekuy Dwata. Henlel tekuy hloni ebéléen anì hol tngón tekuy. Ke yó nmò tekuy, angat dohò yóm kehegfanen bélê tekuy lómón kdohò kebtù mata kdaw ke hlafus ne lómón kdohò yóm kulón bè bulón mò hulu.”

Kem Lingón 72:6

Ke tilob kwiten kukum yóm tau hol geta, hol lómón ke kulón demsù eta yó kem dnadu, ne lómón ke blanas etalak tonok.

Kem Lingón 135:7

Gbeken hlobun gu te tonok, ne heksilaen mung bè kulón. Gbeken hbel lenos gu bè yóm deng gónóhen e semtifun du.