Sifanaya 3:11 - Udél Dwata: Gna Kesfasad ne Lomi Kesfasad

¹¹ Bè yóm kdaw yó, laen dù gónó ye myak béléu, abay se deng nimón ye ou. Angat kóhu lem blóng ye yó kem tau alì heklabak. Bè yóm dou bulul, laen kô dù bud tau heklabak bè yó ne.

Sifanaya 3:11 Referans Kwoze

Isaya 54:4

Hol béi abay bud hlikò, laen kô dù gónóm myak. Ne laen kô dù tau hemyak kóm. Tódô klifótem yóm tehe là kgulitem bè yóm hanà tolo klomihem tau. Ne bud klifótem snéen yóm alì sidek keblat nawahem bè yóm klibunem bolu.

Isaya 11:9

Bè yóm bulul Sayun yó yóm kun bulul Dwata, là kô wen tonem fen hemsidek bè yó, tódô hono hyu kdéen. Bè klamang yóm benwu yó, laen kô dù tau tonem là temngón ke Dwata. Yóm ketngón le ke Dwata tódô lengeben yóm klamang benwu le, hol lómón yóm mohin tódô tfeng él. Là gomongen bè nili yóm bérs 10 kól bè 16. Yó htulón Dwata ke Isaya bè ni kem bérs ni, yóm kmoen bè yóm kdaw deng monen yó koni, yóm gotu bud kógów yóm kdéen but tau talak tonok ebè yóm ból tehe Dabid, duhen yó yóm Misaya, yakà teyen knóón yóm kun benwu. Yó monen bè bérs 11-13, “Bè yóm kdaw yó, ni se yóm gewuhen dulék bud kehfulék Dwata ebè benwu le yó kem tau dù tebel. Gotu bud sentifunen lu yó kem tau Juda deng sekla ebè són tonok. Ominen yó he tódô lana yóm ksélés nawa yó kem tau Israél ne yó kem tau Juda. Là bud le sfatay ne honon lu. Gotu senlomong le yóm kdê sendalù le,” ne gotu nundug le yó kem benwu lenwóten fi dmata kdaw kól desdef. Gotu nwa le kdê kem tonok bè yó kem tau bè Idom ne Muab ne Amun.

Isaya 61:7

Là bud wen gónó ye myak ne, ne laen se dù tau bud hemyak kuy. Angat ye tódô henek bè yóm kuy benwu. Tódô sónmoen temnù yóm kendengen ye ne laen kô dù sónen yóm kligal ye.

1 Pitér 2:6

Yakà wen yóm monen bè Sulat Dwata, yóm monen, “Wen botu alì mebtes deng tehe eles néléku. Yó se yóm botu alì bong muhen bè yóm gónô hdau bè Sayun. Deng suu bè yó ne. Ke wen tau hemtahu béléen, là kô wen gónón gsel béléen.”

Sulat Pol Ebè Yó Kem Tau Hemtahu Bè Rom 9:33

yóm tehe tulónen bè sulaten, yóm monen, “Ngem deng wen botu suu lem blóng le bè syudad Sayun. Yó se yóm botu geslob yó kem tau, ne hlós le glokob du. Okóm yóm tau hemtahu béléen, là kô wen gónón gsel du.”

Matyu 3:9

Ne bê ye abay tô ken-gel nawa yó dum kesfu ye gu bè yóm tehe Abraham ke yó tô lan ye gewà. Tódô tulónu kuy, balù ni he kem botu ni dé, botong gbek Dwata hembaling du tau mò semfu gu bè Abraham.

Danyél 9:16

Ó Dwata, lemwót bè yóm tey kehyu yóm tehe gel któbóngem kum, yó gónó me mni béléem anì béem bud lenbut ne yóm syudadem Jirusalim yóm kóm bulul. Lemwót bè yó kem salà me ne salà yó kem tehe fù me but gónó le alì hemnê yóm benwu Jirusalim ne yó kem tauhem yó kem tau menwu hmilol kum.

Jirimaya 7:4

Hol bê ye abay snalig yóm udél yó kem tau gel mon du mò kuy lemwót bè yóm knóen lem blóng tekuy yóm Gónô Dwata, laen kô dù dumu tau hemsidek tekuy. Kéng yóm yó.

Isaya 45:17

Okóm yó kem tau Israél deng lenwà Dwata lu kul. Yóm kegmò le bè yó kem hohon le laen kô dù tul sónen. Laen kô bang gónó le bud myak bè kem dumu le tau.’ ”

Sulat Pol Ebè Yó Kem Tau Hemtahu Bè Rom 2:17

Bélê ye kuy, kem dumuhu Ju, tey ksalig ye du yóm hlau Dwata, ne gel ye heklabak lemwót bè yóm ketngón ye ke Dwata.

Mika 3:11

Yu kem tau gel malak, là kô ye kmukum ke là wen mò wa nawa ye. Yu kem tau gel blóng ebè Dwata, là kô ye tmolok udél Dwata ke là wen bayad le kuy. Yu kem tugod Dwata, laen dù tulón ye ke là bnayad le kuy, igò ye sem gel mon du són bè Dwata yóm gónó ye smalig. Gel mon ye, “Kaem nô bélê tekuy Dwata. Laen dù sidek sut bélê tekuy.”

Danyél 9:20

Tódô henlelu mni bè Dwata yóm sana kum Dwata hol gónó mogot ne benkasu ebéléen yó kem salà me mi kem tau Israél ne henkoduhu béléen yóm bud ketloben Jirusalim yóm kun bulul gónó nô bè yó.

Kem Lingón 49:5

Béléu dou, là kóe na a likò anien ke deng snibut le ou yó kem hohonu.

Lista 16:3

Gotu le mógów ebè le Musis lewu le Aron ne yó mon le mò kul, “Deng tey gulé ne yóm nmò ye. Kdê tekuy se kem tau Israél hono kem kun tau Dwata ne bélê tekuy se gónóhen nô. Moen du, Musis, ke fen ye hegeta senta yó kem dumu tau Dwata?”

Kem Lingón 59:12

Lemwót bè yó kem udél le alì sidek gel btang gu lem bak le, yó se gónó le gekfô mlan bè yóm alì kehegmón le, ne bè kehedwata le bak, ne bè alì kmò le kéng.

Kem Lingón 131:1

Ó Dwata, deng tebelu ne yóm kehegetahu knô, ne deng knogolu ne yóm keheklabaku. Là bud ktesu du ne yó kem nmò alì geta, duhen ke yó kem dumu nmò là bang gbek du.

Isaya 2:12

Bè yóm kdaw yó, gotu heglaan Dwata yó kem tau alì mfasang, yó kem tau hegmón, yó kem tau hegeta knô. Yó se angat nmò yóm Dwata laen dù là gbeken du.