Sulat Pol Ebè Yó Kem Tau Hemtahu Bè Rom 6:22 - Udél Dwata: Gna Kesfasad ne Lomi Kesfasad

²² Okóm ni, deng ye gewà bè yóm óyô mò sidek, baling ye ghesek bè Dwata. Yó uléken, baling ye tedeng bè ktonen kuy, ne angat blayen kuy yóm klowil laen dù sónen.

Sulat Pol Ebè Yó Kem Tau Hemtahu Bè Rom 6:22 Referans Kwoze

1 Pitér 2:16

Ya mon ke tau talak tonok yóm tahu gónó ye mogot. Syan dé bê ye nmò yóm sidek bè yóm là kogot ye bélê le. Hol henyu ye kmò ye bè kem dumu tau, abay se tauhen yu Dwata.

Sulat Pol Ebè Yó Kem Tau Hemtahu Bè Rom 6:18

Ni deng ye gewà gu lemen yóm salà tehe gónó ye ghesek. Ne deng ye ghesek bè yóm kmò yóm tedeng.

Sulat Pol Ebè Yó Kem Tau Hemtahu Bè Rom 8:2

Abay se deng nô bè klowil tekuy yóm kfasang yóm Tulus Dwata mlay klowil ne mlan bè Jisas Krays lemwà tekuy gu lem salà ne yóm lemwà kut gu lem hatay.

Kun Snulat Jan 8:32

Ne angat tngón ye se yóm ktahuhen. Ne yóm ktahuhen yó, yó se hewà kuy bè yóm gónó ye ghesek.”

Glasya 5:13

Bélê ye kuy, kem dumuhu setwoli, deng tnaba Dwata yu ebéléen anì là bud ye ghesek du ne yó kem hlau Musis. Okóm baluen ke là bud ye ghesek du, hol bê ye abay tódô nmung yóm sidek knóyô lówó ye. Yó dé tles nmò ye, tnóbóng ye kem dumu ye lemwót bè kesbong ye nawa.

1 Kurin 7:22

Ke deng tnaba yóm gónó tekuy mogot yóm tau klifen, là kóen bud klifen ne bè yóm ktonen du yóm gónón mogot. Senged snéen yóm tau là klifenen, ke deng tnaba Krays deng klifen béléen ne.

1 Pitér 1:9

Abay se yó nefeten yóm kehtahu ye bè Jisas, duhen yóm deng kegewà ye gu lem hatay.

Glasya 1:10

Nim udélu ni koni, yó kô udél yóm tau ke hnebelen kdóyón le du yó kem dumuhen tau? Là kô yó du. Okóm yó dé hol hnebel nawaw, duhen yóm kdóyón Dwata dou. Là kô hnebelu du ke wen tau dmóyón dou. Ke yó tô nmou, là kóe tau tóbóng lówó Krays ilóu.

Sulat Pol Ebè Yó Kem Tau Hemtahu Bè Rom 6:14

Yake bê ye bud galak du ne yóm óyô mò sidek, abay se là bud tekuy galak bè yóm hlau gnan, okóm deng tekuy gnô lem yóm kun tóbóng Dwata.

Isaya 54:17

Okóm laen kô dù ngom sfatay gembek hemsidek kuy. Sal gel wen balaem kul yó kem tau dmuón kuy hkawang. Sal gel nfihu yó kem dou tau tóbóng lówó ne sal gel hegmou lu bè hohon le.” Ni se udél yóm Dwata hol gónó mogot.

Glasya 5:22

Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesbong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm kehyu kmò, ne yóm kteneb nawa,

Sulat Pol Ebè Yó Kem Tau Hemtahu Bè Rom 7:4

Senged se bélê tekuy, kem dumuhu setwoli. Laen bud kwalisen ta tekuy ne yóm hlau tehe snulat Musis abay se bè yóm katay Krays, deng tekuy gomong matay béléen. Ne deng tekuy gomong bè yóm bud kehlowil Dwata du gu lem hatay. Ne yó uléken nim ni duhen yóm kwen gónón e kól yó kem nmò tekuy bè Dwata.

Sulat Pol Ebè Yó Kem Tau Hemtahu Bè Rom 6:21

Tulón ye do kun, wen kô ofol ye du yó kem sidek tehe nmò ye gónó ye myak? Yó nefeten yóm nmò ye yó, duhen hatay.

Matyu 25:46

Duhen yó,” mon Jisas, “tódô le gotu hlós elem yóm tafak Dwata laen dù sónen. Okóm yó kem tau tedeng kmò le, guta le yóm klowil laen dù sónen.”

Danyél 3:26

Omin Nibukadnisar tô hloni ebè bak tum tey ofi dmilóf mung du yóm tey ketgamahen, tmaba monen, “Ó Sadrak ne Misak ne Abidnigu kem tau tóbóng lówó yóm Dwata hol geta bè kdéen hewà ye edini.” Tahu se, hewà le gu lem ofi le Sadrak ne Misak ne Abidnigu.

Kem Lingón 143:12

Lemwót bè yóm là konol yóm kbong nawam do, sulék hnatayem kdê yó kem hohonu, yakà ou du yóm tau tóbóng lówóhem.

Taytus 1:1

Ou Pol gónón lemwót nim sulat ni, sotu tau tóbóng lówó Dwata, ne yóm fen gel hógów Jisas Krays. Deng néléken ou mò hógówen anì metnù kehtahu yó kem tau deng kun nélék Dwata, ne anì tngón le ktahuhen yóm deng hentahu tekuy.

Kulasi 1:10

Ni bud hni me béléen anì hol gmò ye yóm kun kóyô yóm gónó tekuy mogot, ne anì hol gmò ye yóm gónón hligal bélê ye. Ke ni se kmò ye, wen tey bunguhen yóm klowil ye, ne senflósen temnù yóm ketngón ye ke Dwata.

Flipay 4:17

Là kô yó du sen-galuhu ke hol gel wen blay ye dou, okóm yó hol sen-galuhu ke temnù yóm ofol blay Dwata kuy.

Flipay 1:11

Sotu bud hnihu anì hol hyu yóm kmò ye lemwót bè yóm gel któbóng Jisas Krays kuy. Ne bè yó se hol gónó Dwata megdóyón bélê ye.

Ifisus 5:9

Wen tey bunguhen yóm deng knô tekuy lem layag yó, duhen yóm hyu kmò tekuy bè kem dumu tekuy, ne yóm ktedeng tekuy, ne yóm kimón tekuy du yóm ktahuhen.

2 Kurin 3:17

Yóm gónó mogot monen yó, du se yóm Tulus Dwata. Ne ke deng nô bélê tekuy yóm kun Tulus yóm gónó tekuy mogot, là bud tekuy gfét du ne yóm hlau gnan.

Sulat Pol Ebè Yó Kem Tau Hemtahu Bè Rom 7:25

Yó gónóm mon, tey kdóyónu ke Dwata, abay se wen yóm gembek tmóbóng dou, duhen yóm gónóhu mogot Jisas Krays. Ni se yóm mò kmoen béléu. Ke són ou du, olohu beyen hemdem du yóm tô kimónu du yó kem hlau Dwata. Mom yó mlom kimónu du yóm sidek knóyô lówóhu.

Kun Snulat Jan 15:16

Là kô yu du mélék do, ou se fen mélék kuy. Yó gónóhu mélék kuy mò hógówu anì hol ye mungu, yóm kbungu laen kô dù tul sónen. Ke ni se nmò ye, balù kihu hni ye bè Mà mlan bè dou boluy, tódô blayen kuy.

Kun Snulat Jan 15:2

Ket hangahu là munguhen, sal ntoken. Ne ket hangahu mungu, sal gel hen-gifaten anì hol temnù kbunguhen.

Kun Snulat Jan 4:36

Yóm tau muta, wen ofol blay Dwata du. Ne yó kem nutahen, angat guta le se kul yóm klowil laen dù sónen. Yó gónóm mon, gotu le hligal yó kem tau mehek ne yó kem tau muta.

Matyu 19:29

Ket tau, ke gloken gemtagak gónóen, ne yó kem dumuhen setwoli, ne yó kem tuhahen, kkólen bè yó kem ngaen, duhen ke tonoken lanen lemolò do, lematu dulék Dwata he bud hulék du ebéléen yóm deng gtebelen yó. Ne lelen yó he angat gmuta du yóm klowil laen dù sónen.

Matyu 13:43

Okóm kul yó du kem kun tau Dwata, hol lómó angat keslinang le mata kdaw ke sok le deng kól ditu bè yóm benwu nogot Mà le bè longit. Yóm tau wen klinguhen, hol hmungol.”

Matyu 13:40

Bè yóm kekdut le yó kem kluon gbol lemen, ne yóm ktem le kul, hol lómón yó se yóm angat kmoen bè yóm hol són kdaw.

Kem Lingón 92:14

Balù yóm deng ktuha le, sana kbungu le. Là kóen monol kgis le bè yóm kmò le nmò.

Job 1:8

Mon Dwata se, “Tonem Job kô, yóm tau tóbóng lówóhu? Laen dù tau talak tonok ke mkél béléen. Laen dù gónó le gemsanil du kem dumu tau. Tau gulit knawahen, lelen bong klikoen do ne tendo hetsik bè yóm sidek.”

Lista 23:10

Yóm kul sfu yó kem tau Israél, hol lómón kwen le kfung. Tey kwen le, botong là gbekem msó kul. Ke hgesónem yóm dou klowil, Dwata, yake heskélem bè kgesón klowil yó kem kóm tau. Uu he hol bemlay do kenek nawa bè yóm katayu lómón yóm katay yó kem tau tedeng nmò le.”

Tekang Kbuten 50:17

wen tinoken béléem, yó udélen, monen, ‘Ó Jusif, béem bud snolò ne yóm tey sidek tehe nmò le béléem yó kem twoguhem.’ Ne ni udél me ebéléem, hol hnifótem mi bè yóm tey sidek deng nmò me béléem, mi kem tóbóng lówó Dwata yóm Dwata tehe maem.” Botong mkik Jusif bè yóm kungolen du yóm udél hwit le yó.

Deng Hegfan 7:13

Ominen mudél ebéléu yóm sotu bè yó kem tau tuha, monen mò do, “Tngónem kô mau kul yó kem mnes bukay yóó? Tngónem gónó le gu lemwót kô?”

Sulat Jim 1:1

Ou se Jim gónón gu lemwót nim sulat ni. Ou se sotu tóbóng lówó Dwata ne yóm gónó tekuy mogot Jisas Krays. Smulate ebè yóm kdéen tau Dwata deng sekla bè klamangen benwu.

Danyél 6:20

Timbow kól bè yó, ominen tmaba ke Danyél igò yóm tey ktafa nawan, monen, “Ó Danyél yóm tóbóng lówó yóm Dwata là matayen, gbeken lemwà kóm bè yó kem liyun kô yóm kóm Dwata tendo nimón?”

Kem Lingón 86:2

Nofinem ou, yakà gotu nawaw kóm. Lenwaem ou, yóm tau tóbóng lówóhem, yóm tau smalig kóm. Uu se yóm dou Dwata.

Kulasi 4:12

Tey gel kólóm Ipafras kuy snéen kun sotu tau lemwót dyó bélê ye, yóm sotu tóbóng lówó Krays Jisas. Tey gel knihen bélê ye bè Dwata anì hol hbegelen yóm kehtahu ye, ne anì hol gtukul ye yóm kun kóyô bélê ye Dwata ne anì hol gulit klolò ye du.

Hibru 12:14

Hol tilów ye són gel ye mit kenek nawa bè kem dumu ye. Hotu ye nawa ye mò du yóm hyu anì laen dù belenen yóm gel nmò ye. Ke tlek wen belenen yóm gel kmò tekuy, sélét mom tô angat ton tekuy ne yóm gónó tekuy mogot.