Biblia Todo Logo
Bib sou entènèt

- Piblisite -




Sulat Pol Ebè Yó Kem Tau Hemtahu Bè Rom 4:11 - Udél Dwata: Gna Kesfasad ne Lomi Kesfasad

11 Deng gegna ne yóm kehtahu Abraham ke Dwata ominen yó he htulì. Hmò Dwata du yóm yó mò ilô yóm deng ktedeng ktonen du lemwót bè yóm deng kehtahu Abraham béléen. Ne duhen yó, lemwót bè yóm kehtahu Abraham ke Dwata, yó gónóhen baling mà kdéen tau hemtahu bè Dwata, baluen he ke là Ju le, ne baluen he ke là tnulì le. Tódô lemwót bè kehtahu le gónón tedeng kton Dwata kul.

Gade chapit la Kopi




Sulat Pol Ebè Yó Kem Tau Hemtahu Bè Rom 4:11
46 Referans Kwoze  

Yó gónón baling tedeng kton Dwata tekuy, duhen yóm kehtahu tekuy ke Jisas Krays. Tu se nmò Dwata bè kdéen tau hemtahu bè Krays, laen kô dù mtukul néléken.


Ne mon Jisas mò du, “Dengi gewà gu lem tafak Dwata ne kóm kemdaw ni, dalang se yó kem fes lówóhem. Abay se yóm kimónem ni gónón gdilô yóm kesfuhem gu bè Abraham.


Senged se ke tehe Nuwa ekni. Lemwót bè kehtahuhen gónón tódô mimón du yóm eles hetgama Dwata du bè yóm sut bélê le, balù yóm là deng ktonen du. Tódô nimónen Dwata, duhen yóm kmoen kafal bong mò gónó le nô yó kem fes lówóhen anì là matay le. Yó uléken yóm kimónen yó, gotu le megtuled yó kem dumu tau là hemtahu le. Bong ke Nuwa, tedeng kton Dwata du lemwót bè yóm kehtahuhen béléen.


ne deng blayen tekuy yóm Tulusen mò ilô yóm deng kfunen tekuy, ne mò ilô yóm angat kdohò kguta tekuy du yóm kdê deng eles hentifesen bélê tekuy.


ne anì hol me baling ssotu yóm lewu me. Là bud wen gónóhu tedeng ne ke lemwót bè klolou yóm hlau. Okóm ni, denge baling tedeng lemwót bè yóm kehtahuhu bè Krays. Nim ktedeng monu ni, tódô blay Dwata lemwót bè yóm kehtahuhu.


Bê tekuy nmò gónón blat nawa yóm Tulus Dwata. Yó gónó Dwata hemnô du bélê tekuy yóm Tulusen mò ilô yóm kfunen tekuy, ne yóm kdohò yóm kehewaen tekuy elem hulin kdaw.


Senged se kuy, deng ye baling kem kun tau Dwata lemwót bè yóm kungol ye du yóm tahu tulón, duhen yóm Tulón Hyu gónó ye temngón du yóm lan ye gewà gu lem hatay. Deng ye hemtahu bè Krays, ne yó gónó Dwata hemsù du bélê ye yóm kun Tulus tehe fasaden tekuy mò ilô yóm deng kfunen tekuy.


Yó kem tau lemolò du yóm monu yó koni, Dwata he hol tendo henek nawa le ne hol kmodu kul. Là olon lu du, yake gotu le gomong lemen snéen kul kdê yó kem kun tau Dwata.


Okóm bélê tekuy du, són ken-gel nawa tekuy yóm nmò Dwata bélê tekuy mò gónón tedeng ktonen tekuy. Kun kfasang yóm Tulus Dwata mò du nim ni, hlanen bè yóm kehtahu tekuy. Ne yó se yóm tendo nangat tekuy.


Ke deng nfunen yu Krays, henged ye deng semfu gu bè Abraham ne, ne wen se kuy du yóm tehe fasad Dwata du ekni.


Deng monen bè Sulat Dwata, tódô kdéen tau bè klamangen benwu, gotu le gmung bè yóm óyô le mò sidek. Yó gónóm mon, tek sotu gónó tekuy gmuta du yóm klowil tehe fasad Dwata tekuy, són bè kehtahu tekuy bè Jisas Krays.


Yó gónóm mon, yó kem tau hemtahu, lómón ke lu yóm hol semfu gu bè Abraham.


Sotu monen bè Sulat Dwata, yó monen, “Balù kihu tau hemtahu béléen, laen kô gónó le gsel du.”Yóm Udél Dwata yó, laen kô dù tau ke là gomongen lemen, abay se laen kô gónó le stólóng yó kem Ju bè yó kem tau là Ju le. Tek sotu se yóm gónóhen mogot yóm kdéen tau, duhen Jisas Krays. Kihu tau tmaba béléen, sal sket gel tnóbóngen lu.


Okóm bud wen monen bè Sulat Dwata gbak ebè yóm kehtahu tekuy mò gónón tedeng ktonen tekuy, yó monen, “Là bud hendem tekuy du ne ke wen tau mógów ebè longit nan e nangay Krays ete tonok.


Lemwót bè yóm deng nmò Krays, yó gónón deng tódô gesón yóm klolò tekuy yóm hlau mò gónón tedeng kton Dwata tekuy. Tek són bè yóm kehtahu bè Krays gónón baling tedeng kdéen tau.


Ne bud mon Jisas mò kul, bede hningónen, “Ou se yóm ken hlowil tau. Yó se tau mógów ebéléu, laen kô dù tul kbitilen. Yó se tau hemtahu béléu, laen se kô dù tul kleengen.


Okóm là hlus Dwata du kul ke hensidek le yó kem bnes ne yó kem koyu ne yó kem hulu. Són olo hlusen kul, són yó kem tau laen dù kun ilô Dwata lem uyó le.


Bud ou se Simun Pitér gónón lemwót nim sulat ni, yóm sotu gel tóbóng lówó Jisas Krays, yóm gel hógówen. Bude smulat ebélê ye yu kem tau deng hemtahu bè Jisas Krays, yóm Dwata tekuy, yóm deng lemwà tekuy gu lem hatay. Lemwót bè yóm ktedeng nawahen, yó gónón hembaling kuy tau hemtahu béléen hol lómón yóm tehe kehbalingen kum tau hemtahu béléen.


Duhen yó, yó kem tau là Ju le, là kô ktes le du yóm ktedeng kton Dwata kul, okóm guta le lan le hemtahu bè Jisas.


Bè yóm tehe fasad Dwata kul yó, là monu du dé là dohoen. Okóm yó monu, là kdéen du tau semfu gu bè Israél ke hol kun tau Dwata.


Okóm ni kmoen ni, là gbeken du ke là tnafaken du yóm salà. Yó gónóm mon, umuen Jisas fen megtafak. Bè yóm ktafaken salà, yó gónó Dwata hegfan du yóm tey ktedengen. Ne yóm tau hemtahu bè Jisas, baling tedeng kton Dwata du yóm tau yó.


Bnalà le Jisas yó kem dumu tau bè yó, mon le, “Semfu me gu bè Abraham se kum, là kô me kesfu hesek. Tedu se lanem mon du yó dum monem, ‘Angat ye gewà bè yóm gónó ye ghesek?’ ”


Tódô tulónu kuy ktahuhen,” mon Jisas, “yó se tau hemtahu béléu, deng wen ne kun klowil laen dù sónen.


Yó hol kóyô Mà ke benlayen klowil laen dù sónen yó kem tau dmilô yóm kun Ngà ne hemtahu béléen. Ne yó angat nmou bélê le, gotu hlowilu lu sok kól yóm hol són kdaw.”


Yó se hemtahu bè yóm Ngà Dwata, gutahen yóm klowil laen dù tul sónen. Yó se là mimón du yóm Ngà Dwata, là se kô gutahen du yóm klowil yó, tódô hlós gbóen yóm tafak Dwata du.”


Fen bnalà Simun Pitér, monen, “Uu se yóm Misaya, yóm Ngà yóm Dwata laen kô dù tul katayen.”


Ni tódô tulónu kuy. Bè yóm mò ken bong angat nmò Dwata bè longit bè yó kem tau nogoten, angat tey dê tau là Ju le lemwót fi gu dmata kdaw ne fi gu desdef, angat le gotu na a seyón mken bè tu kem tehe fù me Abraham ne Isak ne Jakub.


Wen óyô mimón angat blay Dwata kuy dalang se yó kem angat semfu gu bélê ye anì hol lemwót bè nawa ye yóm kbong nawa ye du ne mowil ye.


ne laen kô dù sónen yóm ilô yó. Tehe nem kdawu mò du yóm longit ne tonok ne bè yóm ghituhen kdaw laen dù bud nmou, tódóe hegnô.”


tulónem yó kem tau Israél, monen, “Hol hetfing ye yóm Kdaw Kehegnô, yó se yóm dou kdaw yakà yó du yóm mò ilô yóm klaen dù sónen yóm kesfasad tekuy mò gónó ye hemtulón du nawa, ou se yóm hol gónó mogot yóm gel hólós kuy.


Yóm litô nô bè hehek yóm bak dól ye mò ilô yóm gónô gónó ye nô. Bè yóm kógówu, ke tonu yóm litô yó tódóe mius. Là kô naw e hensidek kuy bè yóm ktafaku yó kem tau Idyip.”


yóm tehe tulónen bè sulaten, yóm monen, “Ngem deng wen botu suu lem blóng le bè syudad Sayun. Yó se yóm botu geslob yó kem tau, ne hlós le glokob du. Okóm yóm tau hemtahu béléen, là kô wen gónón gsel du.”


Deng syóm folò syóm ne halay Abraham bè yóm kehtulien


Gotu le stifun yó kem dumu tau hol geta mogot benwu, mung le bélê tekuy kem kun tau Dwata, yóm Dwata tehe Abraham. Dwata se hol geta senta yóm kdê tau mogot benwu. Laen kô dù bud geta sentahen.


Okóm yó se tau hemmóyô du, bud du se hemblat du yóm hol ktahuhen yóm mon Dwata.


Tek sotu se yóm Dwata. Ne tek sotu gónón tedeng kton Dwata yóm kdéen tau, són bè yóm kehtahu tekuy bè Jisas, tau Ju duhen ke tau là Ju le.


Kilón de kmò Dwata du bè Abraham nim ni? Yó kmoen du, là deng blayen du he yóm hlau bè kehtulì yó. Deng sana tedeng ne kton Dwata ke Abraham.


Swiv nou:

Piblisite


Piblisite