Sulat Pol Ebè Yó Kem Tau Hemtahu Bè Rom 16:17 - Udél Dwata: Gna Kesfasad ne Lomi Kesfasad

¹⁷ Ni hol monu mò kuy, kem dumuhu setwoli, hol ten-gama ye yó kem tau tô senkla le yóm kessotu nawa ye, ne gel senbeweg le yóm kehtahu ye, lel le gel semkuya yóm tahu tolok deng gel gungol ye. Yó kmò ye kul, tódô ye hlayuk bélê le.

Sulat Pol Ebè Yó Kem Tau Hemtahu Bè Rom 16:17 Referans Kwoze

Sulat Jud 1:19

Yó kem tau mon le yó, lu se gónón lemwót kesgólól nawa yó kem tau hemtahu. Tódô nmung le yóm kul knóyô lówó. Là kóen nô bélê le yóm kun Tulus Dwata.

2 Tisalunika 3:6

Yu kem dumu me setwoli, nim hlolò me kuy ni, hlan me bè boluy yóm gónó tekuy mogot Jisas Krays. Hol bê ye abay mung bè yó kem dumu ye hemtahu ke mduk le, ne ke kenbê le yóm tehe hlolò me kuy.

2 Timuti 3:5

Ya mo kmung le sbung bè simbahan du, okóm là kô le himón. Béi hegbool bélê le kóm.

Kulasi 2:8

Duhen ni, hol ten-gama ye anì là gfét ye bè yóm tolok lemwót bè ketngón tau te tonok, yóm laen dù lemen. Yóm kul ktolok yó, dnalang le bè tau, yóm gel hentahu yó kem tau gnan, ne dnalang le bè yó kem tulus sidek nô bè klamangen benwu. Là kóen lemwót bè Krays.

Taytus 3:10

Ke wen tau gel hesgólólen nawa kem dumuhen tau, bnólówem. Ke là himónen, bud budem mólów du. Okóm ke là hdonen, béen bud hegbool bélê ye.

Glasya 2:4

Okóm wen se móyô mò du. Lu se yó kem tau sut hlingu le tau hemtahu anì hnungol le yóm mò kmò me du ke wen tau là Ju le hemtahu bè Krays Jisas. Yó kóyô le ke hlolò me yó kem tau là Ju le yóm kum hlau kem tau Ju.

1 Timuti 1:3

Yó hol nóyóu béléem ke nam na tódô henek nô bè Ifisus, hol lómón yóm tehe tulónu kóm ekni bè yóm tehe kewótu ebè Masdunya. Yakà wen yó kem dumu tau tmolok sekban bè yó. Hol bnólówem lu anì bê le abay henfu yóm ktolok le yó.

Flipay 3:17

Yake henlel ye dmalang du yóm dou kmò, kem dumuhu setwoli, ne hol gel hnénég ye dé yó kem dumu tau deng gel lemolò du yóm kum kmò.

Matyu 18:7

Tey kodu le yó kem tau talak tonok, abay se tey dê mit kul là hemtahu. Sal gel sut bè tau se yóm yó, okóm angat tey tafaken yóm tau mò du.

1 Kurin 3:3

Abay se monem sana tolo klolò ye du yóm kul kmò yó kem tau là hemtahuhen. Yó gónóhu mon du yóm yó, abay se tolo wen bélê ye gel sélés nawa, ne gel skaf mon. Yó se gónón gfan yóm tolo klolò ye du yóm kul kmò yó kem tau là hemtahuhen.

Kul Nmò 15:24

Gungol me yóm tey kesbeweg ye bè yó lanen wen tau tmolok bélê ye lemwót dini bélê me, okóm là kô tngón me du yóm kul nmò yó.

1 Jan 2:19

Yó kem tau hmohon du yó, deng le tehe gel mung bélê tekuy snéen, okóm là tahu le hemtahu, yó gónó le tmagak tekuy. Ke tahu le hemtahu, là kô deng tnagak le tekuy. Yóm ktagak le tekuy yó, yó se gónón gfan yóm là klolò le du yóm kut lolò.

Matyu 18:17

Okóm ke là dog hnungolen kul, tódô gotu tulón ye yóm kdéen bè gónó le gel stifun yó kem Ju. Okóm ke là dogen hmungol balù yóm deng kwit ye du bè gónó le gel stifun yó kem Ju, hol lómón kmò ye ebéléen, lómón yóm kmò ye ebè yó kem tau là hemtahuhen bè Dwata, ne bè yó kem dumu tau gemsalà.”

1 Kurin 11:18

Bè hol tanayen, deng gungolu bè yóm gel ksimba ye, tey gel kesgólól nawa ye kun. Ne wen se gel hentahuhu du yóm gungolu yó.

Kun Snulat Luk 17:1

Yó bud mon Jisas ebè yó kem gel lemolò du, monen, “Laen kô gembek semya du se ke bangen sut bè tau yóm gónóhen btang elem salà. Okóm nawaw tey tafaken yóm tau hebtangen kem dumuhen.

Matyu 7:15

“Hol ten-gama ye yó kem tau tódô lembù tmugod ke Dwata. Hol lómó ktonem kul, lómón ke ubiha. Okóm bè yóm kmò le, hol le mkél bè yó kem ohu dlag.