Sulat Pol Ebè Yó Kem Tau Hemtahu Bè Rom 12:2 - Udél Dwata: Gna Kesfasad ne Lomi Kesfasad

² Bê ye abay lolò kul kmò yó kem tau là hemtahu le lem nim benwu ni. Hesfili ye ke Dwata yóm kehedem ye anì gtukul ye ke tedu yóm kun kóyô bélê ye, ne ke tedu yóm hyu ne yóm tedeng ne yóm mò gónón hligal.

Sulat Pol Ebè Yó Kem Tau Hemtahu Bè Rom 12:2 Referans Kwoze

1 Pitér 1:14

Hol nimón ye dé Dwata. Bê ye abay heskél yóm kmò ye bè yóm tehe tey dê nóyô ye gu laan ye là deng temngón ke Dwata he.

2 Kurin 5:17

Ke deng ssotu bè Krays yóm tau, baling lomi ne kehedemen. Kdê yó kem tehe gna kehedemen tódô gotu lana, ne hono lomi ne bud tlesen du.

Kulasi 3:10

Deng wen ne yóm lomi klowil tekuy lemwót bè Dwata. Ne yó nmò Dwata, tódô senflósen hembaling du nim lomi klowil tekuy ni efet te baling hol skél bè kun kmò, anì hol tilob kesetngón tekuy ebéléen.

Ifisus 5:17

Bê ye hungel dé. Hol hnebel ye yóm kóyóen bélê ye yóm gónó ye mogot.

Isikél 36:26

Angat wen lomi nawa blayu kuy ne suu bélê ye yóm óyô mò du yóm hyu. Kóhu bélê ye yóm nawa kembel, tlesu du yóm nawa gulit.

1 Pitér 4:2

Yó gónóm mon, lenwóten ni ne efet kukol towok ye, yake hol nô bè nawa ye mò du yóm kun kóyô bélê ye Dwata. Bê ye abay bud nmung yó kem sidek knóyô lówó tau.

Sulat Pol Ebè Yó Kem Tau Hemtahu Bè Rom 12:1

Duhen yó, kem dumuhu setwoli, ni alì nalu nawahu bélê ye lemwót bè yóm tey kkodu Dwata tekuy. Hol blay ye ke Dwata dé lówó ye mò henged dsù ye ebéléen, yóm dsù tolo mowil ne tendo gel nmò ye yóm hyu. Ne tey kehyu nawa Dwata du yóm keblay ye du yó. Ke hendem ye yóm kdê deng nmoen bélê ye, tey knóón ke ni se yóm kut nmò.

Kun Snulat Jan 15:19

Ke nmung ye yóm kul kehedem, là kô knutó nawa le kuy. Okóm ni, tólóng ne kuy kehedem lemwót bè yóm deng kéléku kuy, là bud ye gmung bélê le ne. Yó se lewót gónó le kmutó nawa kuy.

Kem Lingón 51:10

Ó Dwata, suem béléu yóm nawa laen dù belenen. Bud hnomihem dou kehedemu, ne blayem dou yóm là konol nawahu ebéléem.

Sulat Pol Ebè Yó Kem Tau Hemtahu Bè Rom 13:14

Yó dé nmò tekuy, hol dnalang tekuy yóm kun kmò yóm gónó tekuy mogot Jisas Krays. Ne bê tekuy abay tódô nmung yó kem sidek knóyô lówó tekuy.

Taytus 3:5

Là kô bè kehyu kmò du gónón lemwà kut, okóm tódô lemwót bè yóm kkoduhen kut, hlanen bè yóm Tulus Dwata. Lómón ke denyohen tu yóm Tulusen. Yóm kedyohen kut yó, yó se yóm kehbalingen kut ngà Dwata, ne blayen kut yóm lomi klowil.

Sulat Jim 4:4

Tey tau mili nawa yóm yu. Là tngón ye du kô, ke són nô bè nawa tau yóm kenbeyen nawa talak tonok, deng baling hohon Dwata ne? Ke són yó se nóyóen, mom hnohonen Dwata.

2 Kurin 4:4

Là hentahu le du abay se nseng Seitan kehedem le. Du se kul dwata yó kem tau là hemtahuhen. Yó gónó Seitan mseng kehedem le anì là dilô le du yóm tey layag hmilol kul, yóm layag lemwót bè yóm Tulón Hyu gbak ebè yóm tey klinggel Krays. Bè Krays se hol gónó tekuy dmilô du yóm kun kmò Dwata.

Kun Snulat Jan 17:14

Deng gotu toloku kul, Mà, yóm kóm udél. Ne deng mom knutó nawa le lu yó kem tau là hemtahuhen, abay se là bud nmung le du yóm kul kehedem, lómón yóm dou là kmung du.

2 Pitér 1:4

Ni se gónón dohò yóm tehe fasaden tekuy, duhen yóm kun tóbóng alì hyu. Ne lemwót bè yóm kun tóbóng yó, gónó tekuy gewà du yó kem dê sidek knóyô tau te tonok, yóm gbeken hemsidek ktau tekuy. Ne bud lemwót bè kun tóbóng, yó gónó tekuy gomong bè yóm kun kehyu kmò Dwata.

Sulat Jim 1:27

Yóm tahu kehtahu hol kun henmóyô Dwata, yóm Mà tekuy, duhen yóm hol któbóng yó kem ngà hikit ne yó kem libun bolu bè yóm gónó le glayam. Ne ke gel tensuhen yó kem sidek gel nmò tau lem benwu.

Isikél 18:31

Tenflok ye ne yóm là gel kimón ye do, hnomi ye kehedem ye ne knawa ye. Moen de ke móyô ye kendel matay, kem tau Israél?

Kem Lingón 34:8

Tilów nimónem Dwata dé anì gnómem yóm tey kehyuhen. Bong kligal le kul yó kem tau gel hofin béléen.

1 Jan 3:13

Yó gónóm mon, kem dumuhu setwoli, bê ye hentaw ke knutó nawa le yu yó kem tau là hemtahuhen.

1 Tisalunika 4:3

Yó hol kun kóyô Dwata bélê ye ke hol ye mólós ne ke laen dù bélê ye fen mò samuk.

1 Jan 5:19

Deng tngón tekuy ne yóm kfun Dwata tekuy. Yó kem dumu tau nô lem benwu, hono kem kun tau nogot Seitan.

Ifisus 1:18

Hol hnihu bè Dwata anì hlayagen lem hendem ye anì glileb ye yóm kwen tey hendón nefet nawa ye, yó se yóm tehe tabahen kuy. Kóyóu ke hol glileb ye snéen yóm alì kehyuhen yóm deng fasaden bè yó kem kun tau,

2 Pitér 2:20

Wen se kem tau deng tebel le yó kem tehe nmò le sidek lan le temngón yóm gónó tekuy mogot Jisas Krays, yóm deng lemwà tekuy gu lem hatay. Okóm sentahen bè yó, mom bud senfulék le yóm sidek tehe gónó le gfét. Ke yó nmò le, milud he yóm kegfét le du. Deng mom ni ne yóm ksideken senta yóm là deng kehtahu le.

Ifisus 2:2

Bè yóm kdaw yó, tódô lolò ye yóm sidek kul gel nmò yó kem tau là hemtahuhen bè Dwata. Tódô nimón ye Seitan, yóm gónó le kmulu yóm kdéen mtulus gu talak kmawang. Bud du se yóm gel malak yó kem tau là mimón ke Dwata.

Kem Lingón 119:174

Hfuhu imaku mangat yóm kehewaem do, Dwata, ne són hefligal do, són yó kem hlauhem.

Glasya 1:4

Yóm Krays, deng tódô hamaen yóm kun klowil bè salà tekuy anì wen lan tekuy gewà gu lem yó kem sidek gel nmò yó kem tau là hemtahuhen ni kmoen ni. Bè yóm katayen yó, tódô nmungen yóm kun kóyô Dwata, yóm Mà tekuy.

1 Kurin 3:19

Yóm kul ketngón yó kem tau te tonok, bè kun kehedem du Dwata, ketngón laen dù muhen. Hol lómón se yóm deng monen bè Sulat Dwata, yóm monen, “Yóm tau alì snaligen yóm ketngónen, yó se henged holot gónó Dwata hebkó du.”

Kem Lingón 119:128

Lemwót bè yóm ktedeng yóm ket hlauhem, yó gónóhu meklit du yó kem sidek nmò tau.

Sulat Pol Ebè Yó Kem Tau Hemtahu Bè Rom 7:22

Yóm hol nô lem hendemu, bong óyóu du yó kem hlau Dwata.

Kem Lingón 119:97

Tey kbong nawaw du yó kem hlauhem, Dwata, seflósu kdaw tendo hemdem kul.

Kem Lingón 119:72

Tey mebtes béléu yó kem hlauhem senta bè yó kem hilu katihen tahu blówón ne blówón bukay.

Kun Snulat Jan 7:7

Là kô knutó nawa le kuy yó kem tau lem benwu. Ou se yóm knutó nawa le, abay se tódô gel benkasu bélê le yóm sidek gel nmò le.

Deng Hegfan 13:8

Tódô kdéen tau te tonok gotu hemtahu béléen yóm ógóf lóbô yó. Són olo là hemtahu béléen, són yó kem tau deng gsulat boluy le bè yóm bok lowil, yóm kun bok yóm Ngà Ubiha tehe hnatay le. Deng eles gotu snulaten ne boluy yó kem tau wen klowil laen dù sónen gu laanen là deng dmimun du yóm kentihen.

1 Pitér 2:3

Lómón se yóm monen bè Sulat Dwata, yóm monen, “Deng gtób ye ne kóó yóm tey kehyuhen yóm gónó ye mogot.”

Kem Lingón 119:103

Kehlingónu du yóm gel hloloem kum, tey mi senta tneb.

Sulat Pol Ebè Yó Kem Tau Hemtahu Bè Rom 7:12

Duhen yó, yóm hlau tehe snulat Musis yó laen dù kô belenen. Tey ktedengen, lelen alì hyu.

Kulasi 4:12

Tey gel kólóm Ipafras kuy snéen kun sotu tau lemwót dyó bélê ye, yóm sotu tóbóng lówó Krays Jisas. Tey gel knihen bélê ye bè Dwata anì hol hbegelen yóm kehtahu ye, ne anì hol gtukul ye yóm kun kóyô bélê ye Dwata ne anì hol gulit klolò ye du.

1 Pitér 1:18

Tódô tngón ye se yóm tehe ksok Dwata kuy lem yó kem nmò laen dù muhen tehe dnalang ye bè yó kem tehe fù ye. Yóm ksoken kuy yó, là kô kem kimu wen són le yóm soken tekuy, lómón ke filak.

Kun Snulat Jan 14:30

Là buden hol legen ne yóm kestulón tekuy, abay se móyónen sut ne Seitan, yóm fen mogot klamangen. Laen kô dù kfasangen béléu kun.

Sulat Pol Ebè Yó Kem Tau Hemtahu Bè Rom 7:14

Tngónu yóm hlau, hono lemwót gu bè Dwata, laen kô sidek nô du. Okóm béléu yóm gónón sidek, abay se tauhe gemsalà, gféte bè yóm sidek.

Deng Hegfan 12:9

Tódô tudà le etalak tonok yóm swaga hulô yó, yóm tehe ulal là kna lemwót bè kbuten, duhen Seitan, yóm alì hulung dmelem, yóm alì hulung smukat yó kem tau bè klamangen benwu. Tódô tudà le etalak tonok, mung du yó kem gel hógówen.

Matyu 13:22

Bong yóm bnék gdek elem yóm angat gónón mfól kluon, hol lómón ke yó kem tau hmungol du yóm Udél Dwata, okóm dê bnukù nawa le bè klowil le, ne gfét nawa le bè kebel le kendengen le. Yó gónón limes yóm kehtahu le, ne laen kô dù bunguhen.

Mark 4:19

okóm dê bnukù nawa le bè klowil le, ne gfét le bè kebel le kendengen le, ne tey dê he kem dumu sen-galu nawa le. Yó gónón baling limes yóm tô kehtahu le ne laen dog bunguhen.

Kulasi 1:9

Yó gónóm mon, lemwót bè yóm kungol me du yóm kehtahu ye, là kóen skó yóm tendo gel kni me bélê ye bè Dwata. Yó gel hni me béléen anì hol hetngónen kuy yóm kun kóyô, hlanen bè yóm khulung hedem ne yóm khulung milô gel blayen tekuy yóm kun Tulus.