Sulat Pol Ebè Yó Kem Tau Hemtahu Bè Rom 10:18 - Udél Dwata: Gna Kesfasad ne Lomi Kesfasad

¹⁸ Bede wen snólóku. Là deng gungol kem tau Israél du kô nim tulón ni? Deng gungol le ne. Lómón yóm monen bè Sulat Dwata, monen, “Deng kem tehe gungol kdéen tau te tonok ne. Deng tódô gefet bè klamangen benwu yóm ktulón le du.”

Sulat Pol Ebè Yó Kem Tau Hemtahu Bè Rom 10:18 Referans Kwoze

Kem Lingón 19:4

Bede tódô lenngeben klamangen benwu yóm gel tulónen. Laen dù benwu talak tonok ke là tngónen du yóm heglalagen yó. Wen hol mdengen gónó Dwata hemsù du ditu bè longit yóm kdaw.

Sulat Pol Ebè Yó Kem Tau Hemtahu Bè Rom 1:8

Ni tanay monu mò kuy, tey kedóyónu ke Dwata bè yóm kdê ye bè yó, hlanu bè Jisas Krays, abay se deng gefet bè klamangen benwu yóm kuy kehtahu bè Jisas.

Matyu 24:14

Bede nan glalag bè kdéen tau bè klamangen benwu he yóm Tulón Hyu gbak ebè yóm kmò kogot Dwata tau anì hol tngón le, ominen yó he kól yóm hol són kdaw.”

1 Tisalunika 1:8

Là kô sónen du bè ni kem lewu benwu monu ni koni gónón deng e mból yóm gel tulón ye gbak ebè yóm gónó tekuy mogot, okóm deng mból snéen bè klamangen benwu yóm kuy deng kehtahu bè Dwata. Ke tô tulón me kul yóm kuy kehtahu, deng mom lu ne hegled tmulón du kum.

Kulasi 1:23

Song tahu eta ye nim ni ke là monol nawa ye bè yóm kehtahu ye. Yó gónóm mon, hbegel ye yóm kehtahu ye anì là sliwo kehedem ye du yóm hendón nefet nawa ye lemwót bè yóm Tulón Hyu deng gungol ye. Nim Tulón Hyu monu ni, deng gefet bè kdéen tau bè klamangen benwu ne, ne ou Pol sotu tóbóng lówó Dwata mò fen heglalag du.

Kulasi 1:6

Yóm Tulón Hyu yó, tódô senflósen tmóbóng tau ne tódô senflósen se mból ebè yó kem dumu benwu. Hol lómón se yóm deng gendengen lem blóng ye lemwót bè yóm hol tanay kdaw kungol ye du yóm kun tóbóng Dwata, ne yóm kegnóm ye yóm kehyuhen bélê ye.

Mark 16:15

Omin Jisas bud mon du mò kul, “Mógów ye do ebè klamangen benwu, na ye e tulón bè kdéen tau yóm Tulón Hyu lemwót bè Dwata.

Matyu 28:19

Yó gónóm mon, mógów ye do ebè kdéen but tau bè klamangen benwu anì baling le tau lemolò do. Bnabtays ye lu hlan ye bè boluy Dwata, yóm Mà tekuy, ne bè boluy yóm Ngaen ne bè boluy yóm Tulusen.

Matyu 26:13

Tódô tulónu kuy ktahuhen,” mon Jisas, “balù kihu gónón angat e mból bè klamangen benwu yóm Tulón Hyu lemwót bè Dwata, tendo gel gboluy snéen kun nim libun ni lemwót bè yóm deng nmoen béléu.”

Matyu 4:8

Omin Seitan bud mit ke Jisas eta tfusù yóm tey bulul geta, ne gotu toloken du kdê yó kem benwu talak tonok ne yóm tey kehyuhen.

Isaya 52:10

Angat hlan Dwata bè kfasangen yóm kehewaen yó kem tauhen. Angat kdéen benwu bè klamangen, gotu mton du.

Isaya 49:6

Bud mon Dwata mò dou, “Uu yóm mò tóbóng lówóhu, ni wen tey bong sigangu tahem mkay senta yóm gnan. Là són du yóm bud kulék kegeta yó kem dù tau Israél yóm hmou kóm, okóm nmou uu layag bè yóm kdéen tau bè klamangen benwu anì wen lan le gewà.”

Kem Lingón 98:3

Deng hendemen yóm tehe fasaden yó kem tau Israél, duhen yóm kbong nawahen kul ne yóm kteneben bélê le. Deng ton klamangen benwu yóm khewaen kum yóm kum Dwata.

Kem Lingón 22:27

Angat gtulón nawa le Dwata yóm kdéen tau bè klamangen benwu. Gotu le semfulék ebéléen yó kem tau lemwót bè ket benwu talak tonok, Kdéen kay but tau talak tonok, gotu le tmaba ebéléen.

1 Bok Kem Tau Hol Geta 18:10

Smafae mlan bè boluy Dwata yóm kóm Dwata hol gónó mogot, deng hfebel Ahab uu bè klamang benwu. Ke wen bè yó kem dumu tau hol geta mogot benwu mon du là nói bè benwuhen, yó nmò Ahab bè yóm tau hol geta yó, hsafaen ke tahu yóm là ktonen kóm.

Sulat Pol Ebè Yó Kem Tau Hemtahu Bè Rom 15:19

duhen yó kem hentaw ton gel hmoen do, ne yóm tey kfasangen bélê le yóm Tulus Dwata. Tehe lemwót bè syudad Jirusalim efete kól ditu bè yóm sotu prubinsya Ilirikum, gotu hetngónu bélê le yóm Tulón Hyu gbak ebè Krays.

Kul Nmò 28:23

Tahu se, na le na bnuteng yóm bud kesbung le ebè Pol. Timbow hto yóm buteng le yó, ya tey kwen le bud sbung ebè yóm gónô gónó Pol nô. Tódô sendaw le nô bè yó lemwót hlafus kól kifu. Gotu tulón Pol kul yóm kmò kogot Dwata tau. Ne gel wen nwahen lemwót bè yóm hlau Musis, ne wen se gel nwahen bè udél yó kem gna tugod Dwata ekni mò gónón heglileb du bélê le yóm tulónen gbak ebè Jisas.

Mark 16:20

Kewót le se kul yó kem tau gel lemolò du, hetngón le bè klamangen yóm Tulón Hyu gbak ebè Jisas. Tey tendo gel któbóng Jisas kul yóm gónó le mogot, hlanen bè yó kem hentaw ton gel nmò le mò gónón hegfan yóm hol ktahu yóm tulón gel nwit le.]

Kul Nmò 26:20

Bè syudad Damaskus yóm hol tanay benwu gónóhu tmolok, ominu bud tmolok bè Jirusalim, efet lenngebu klamangen benwu yó kem tau Israél, ngangen ne efete tmolok lem blóng yó kem tau là Ju le. Yó gel monu bè yóm ktoloku, ‘Hegsel ye ne, ne nimón ye Dwata. Hdilô ye bè kmò ye yóm deng kehegsel ye.’

Kul Nmò 1:8

Okóm ke deng sut bélê ye yóm Tulus Dwata, angat wen se kuy kfasang, ne angat sensból ye bè Jirusalim yóm deng nmou, bud senged se bè klamang prubinsya Judiya efet kól etu bè klamang prubinsya Samarya, ngangen efet lenngeben klamang benwu.”