Kem Udél Hlalak Tehe Selumun 27:6 - Udél Dwata: Gna Kesfasad ne Lomi Kesfasad

⁶ Mom hyu bè yóm tau ke ween semtódô du abay se gsaligen olo ke hohonen hmingón mit du swè abay se olohen smukat du.

Kem Udél Hlalak Tehe Selumun 27:6 Referans Kwoze

Kem Lingón 141:5

Mom hyu he ke yó dmofì do yóm tau tedeng kmoen. Wen gónón hyu béléu se yó. Ke wen bnólów le béléu, hol lómón ke henged bulung bè lówóhu. Hol tnóbóngem o anì là gekbéu du. Okóm sónmou gel mni du bè Dwata anì hensengen yóm sidek gel nmò le, ne anì hensengen se yó kem tau mò du.

Deng Hegfan 3:19

Yó kem tau kenbong nawahu, sal gel bnólówu ne tnafaku lu anì gulit le. Duhen ni, hol knogol ye ne yó kem salà gel nmò ye.

Hibru 12:10

Yóm mà tekuy te tonok, són bè yóm hanà tolo kegen tekuy udì yóm gel ktedeng le tekuy. Ne tódô nmò le bélê tekuy yóm kul ketngón du yóm hyu. Okóm tólóng yó dum ktedengen tekuy yóm Mà tekuy bè longit. Gel nmoen bélê tekuy yóm hyu bélê tekuy anì gbót tekuy bè yóm kun klaen dù belen.

Kem Udél Hlalak Tehe Selumun 10:18

Mò kéng yóm tau hnalaen yóm kutó nawahen ke dumun. Ne yóm tau hensideken boluy kem dumun, book.

Kem Udél Hlalak Tehe Selumun 20:30

Yóm lebened lemwót bè kestódô gónón mkó yóm nmò sidek ne bè yóm kboug gónón sfili yóm kehedem tau.

Kem Udél Hlalak Tehe Selumun 27:7

Yóm tau ke deng gemtu balù yóm tneb sana kbéen du, okóm ke bitil balù yóm ken héét sana knómen béléen.

Kem Udél Hlalak Tehe Selumun 28:23

Yóm tau ke bnólówen kdumun, tonen kogolen se yóm tey kehyu nawahen ebéléen yóm tau yó senta yóm tau olon smalù là tahuhen.