Kem Udél Hlalak Tehe Selumun 17:3 - Udél Dwata: Gna Kesfasad ne Lomi Kesfasad

³ Bè ofi gónó tau tmilów du yóm tembaga futì ne yóm tahu blówón ne Dwata se fen tmilów du yóm nô lem but blutut tau.

Kem Udél Hlalak Tehe Selumun 17:3 Referans Kwoze

Jirimaya 17:10

Okóm ou se yóm sana Dwata hol gónó mogot, ou se gel hemklol du yóm nô lem hendem tau ne gotu tonu yóm nô lem but blututen. Yóm ofol blayu du sal lemwót bè yóm deng kun gel nmò.”

Kem Lingón 26:2

Tilówem ou, Dwata, hol hen-getem smisif dou. Tenngelem yóm nô lem but blututu, ne yóm nô lem hendemu.

Kem Udél Hlalak Tehe Selumun 27:21

Bè ofi gónó tau tmilów du yóm tembaga futì ne yóm tahu blówón ne yó se kun tilów yóm tau yóm kdóyón dumu tau du.

1 Pitér 1:7

Yó gónón tmilów kuy anì gfan ke hol tahu duhen yóm kehtahu ye duhen ke là. Yóm kehtahu ye, lómón ke yóm blówón gel hlan le bè ofi anì gfan yóm hol tahu duhen. Bong bè yóm blówón, olo kem hlun kimu. Okóm yó dum kehtahu ye, bong muhen senta yóm blówón. Milud he ktilów Dwata du anì tngónen ke hol tahu duhen. Ke là lanahen, tey kdóyónen kuy bè yóm kdaw bud kesfulék Jisas edini, lelen tey hegeta kuy ne tey kadaten kuy.

1 Tutul Israél 29:17

Tngónu se, Dwata, gel henklolem yóm nô lem but blutut me, ne teyi hligal ke tonem yóm kgulit me. Nim kdê blayu ni, hol lemwót lem but blututu, ne deng hol tonu bè yó kem tauhem nô bè ni yóm hol kewóten lem but blutut le se kul yó kem blay le kóm, mung du yóm tey kehligal le.

Kem Lingón 66:10

Deng tnilówem mi, Dwata. Lómón yóm blówón bukay hlan le bè ofi anì baling hol tahu duhen, lómón yó se yóm ktilówem kum.

Deng Hegfan 2:23

Tódô gotu hnatayu snéen yó kem tau gel lemolò du. Yó gónóhu mò du yóm yó anì tngón kdéen tau hemtahu béléu yóm klaen dù gebnos béléu, gotu tngónu yóm nô lem hendem le ne yóm dê tô hendeen le. Angat blayu kuy yóm mò balà yóm kuy deng gel nmò, yóm ket kuy na sotu.

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Kem Lingón 139:23

Hol henklolem o, Dwata, hol tenngelem yóm nô lem nawahu. Hol tilówem o anì tngónem yóm nô lem hendemu.

Kem Udél Hlalak Tehe Selumun 15:11

Yóm kdéen nô bè yóm gónó le nô yó kem matay gotu gfan bè Dwata, ne milud he kegfanen béléen yóm nô lem but blutut tau.

Kem Udél Hlalak Tehe Selumun 17:2

Lemwót bè yóm khulungen hedem yóm hesek, gónón mom baling kmulu béléen yó kem ngaen logi là gulit yóm amohen. Ne lemwót bè yóm khulungen hedem yó gónón gomong gumun bè kdê kendengen yóm amohen.

Dwata 8:2

Hol hentulón ye nawa yóm kmò kwit Dwata kuy bè yóm tey nógów mayuk lem yóm benwu laen hol wen tauhen lem yóm fat folò halay. Gel henwit Dwata yu tilów mgel mò gónón temngón du yóm hol nô bè nawa ye ke nimón ye yó kem kun hlau kuy duhen ke là.

Dwata 8:16

Bè yóm knô ye lem yóm benwu laen hol wen tauhen yó, wen mana blayen kuy mò ken ye, yóm ken là deng kul hnikót ton du yó kem tehe fù ye. Gel wen yóm tilów mgel hwit Dwata ebélê ye mò gónón tmilów kuy ne mò kuy kehyu.

Kem Udél Hlalak Tehe Selumun 16:2

Ofo tau hemdem du ke hono tedeng yóm kun kmò, okóm Dwata hemdeng du yóm nô lem but blututen.

Kem Udél Hlalak Tehe Selumun 21:2

Ofo tau hemdem du ke hono tedeng yóm kun kmò, okóm Dwata hemdeng du yóm nô lem but blututen.