Kem Udél Hlalak Tehe Selumun 10:3 - Udél Dwata: Gna Kesfasad ne Lomi Kesfasad

³ Là kô henus Dwata kul yó kem tau tedeng kmò le, okóm yó kem tau gel mò sidek là kô hlusen du yóm kul alì nusol.

Kem Udél Hlalak Tehe Selumun 10:3 Referans Kwoze

Kem Lingón 37:25

Ni denge tey tuha ne, deng tey tahà klowilu. Là kô deng wen tonu he ke tódô bayà Dwata yóm tau hyu kmoen, duhen ke gel heslaf mni ken bè kem tau yó kem ngaen.

Kem Lingón 37:3

Holi smalig bè Dwata dé, ne nmoem yóm hyu. Tódói henek ta yóm tonok blay Dwata kóm, ne laen kô sembeweg kóm bè yó.

Sifanaya 1:18

Bè yóm kdaw alì kebut Dwata kul yó, laen kô dù lanen lemwà kul yó kem blówón bukay le ne yó kem tahu blówón le. Yóm kebut Dwata kul yó hol lómón ke ofi, angat gotu kenen yóm klamang tonok. Angat kendel nmoen són le yóm kdéen tau talak tonok.

Kem Lingón 37:19

Laen kô gónó le glayam bè klowil le anien ke sidek benwu. Ne anien ke mbel tey bitil bong, sal gel wen gónó le ma.

Kem Lingón 33:19

Hensengen ebélê le yóm hatay. Baluen ke mbel bitil bong, sal hlowilen lu.

Job 5:20

Kesok mbel bitil sal gel lenowilen uu. Ne ke mungi bè gida sal gel kenlungen u bè hatay.

Kun Snulat Luk 12:31

Ni dii hol nmò ye. Hogot ye ke Dwata klowil ye, ne du he angat bemlay du kuy ni kem wen mu ye du ni.”

Isaya 33:16

Ke ni se gel nmò ye, laen kô dù hemen ye. Hol lómón ke nô ye lem yóm gónó heklung mbegel. Laen dù gónó ye élél bè ken ne bè ninum ye.

Kem Udél Hlalak Tehe Selumun 14:32

Lemwót bè yóm sidek nmoen gónón meglà yóm tau gel mò sidek, okóm yóm tau tedeng kmoen wen gónón e mlo bè katayen.

Kem Lingón 112:10

Yóm kul kmò yó, gel ton yó kem tau gel mò sidek, deng le mom semdken beeng botong kebut le du. Okóm yó kem tau sidek nmò le yó, tódô le kendel lana lem benwu, là balingen yó kem tô atul le.

Kem Lingón 10:14

Okóm, Dwata, deng tonem se yóm alì kehlayam le tau ne yóm alì kehsidek le kul. Deng eles hendemem ne yóm ktafakem kul. Són uu snalig yó kem tau laen dù gmò le. Uu se gel tmóbóng yó kem ngà hikit.

Kem Udél Hlalak Tehe Selumun 13:25

Sal gel gsengel kkenen yóm tau tedeng kmoen, okóm yóm tau gel mò sidek són moen bitil.

Kem Udél Hlalak Tehe Selumun 28:9

Tey kenlit Dwata yóm tau kmogol yó kem hlauhen ne là kô hnungolen du yóm knihen.

Kem Udél Hlalak Tehe Selumun 28:25

Yóm keseglom tau gónón lemwót kesbólów, okóm yóm tau smalig bè Dwata hyu klowilen.