Nihimaya 9:17 - Udél Dwata: Gna Kesfasad ne Lomi Kesfasad

¹⁷ Là móyô le hmungol, gotu klifót le yó kem dê hentaw ton deng tehe nmoem lem blóng le. Deng kenbê le uu, deng le mom mélék tau mò malak kul mulék ghesek bè Idyip. Okóm uu se yóm Dwata hulung hmifót, tey minggel nawam ne tey bong nawam yó kem tauhem, là kói mahil lembut. Tey kkoduhem kul yó kem tauhem, là kô nam e tódô bayà kul.

Nihimaya 9:17 Referans Kwoze

Kem Lingón 86:5

Tey kehyuhem, Dwata, ne mahil béléem hmifót salà, ne tey kbong nawam kul yó kem tau htóbóng béléem.

Juwél 2:13

Hol hton ye yóm klangag ye, bede béen mlan bè keksê ye nes ye. Yake bè kebà nawa ye gónó ye hton du.” Bud ye semfulék ebè yóm sana kuy Dwata hol gónó mogot abay se wen nawahen tmóbóng kuy ne tey hulung kmodu. Là kóen mahil lembut ne tey bong nawahen tau. Móyô hmifót, abay se là nóen bè nawahen ke tô tnafaken tekuy.

Kem Lingón 86:15

Okóm yóm uu, Dwata, teyi kmodu, ne tey minggel nawahem, là mahili lembut. Yóm kbong nawahem kum, là kóen monol, ne teyi teneb bélê me.

Sulat Pol Ebè Yó Kem Tau Hemtahu Bè Rom 9:15

Ngem yóm deng mon Dwata mò ke Musis ekni, monen, “Tódô lemwót bè dou kóyô mélék du yóm tau knoduhu ne yóm tau kenbong nawahu.”Yó gónóm mon, là kóen lemwót bè kun kóyô yóm tau duhen ke bè kun nmò gónón lemwót yóm kkodu Dwata du. Okóm tódô lemwót bè yóm kun kóyô Dwata kmodu du.

Kem Lingón 78:38

Okóm balù yó he, tey kkodu Dwata kul, hnifóten salà le, ne là kô genlaen kul. Tey dê duléken ne mafas du yóm kebuten kul, là hesuten du yóm alì sidek kebuten kul.

1 Bok Kem Tau Hol Geta 6:13

Lem nim Gónô hdà ye béléu ni gónóhu nô lem blóng yó kem tauhu Israél, ne là kô naw e bayà kul.”

Kem Lingón 106:7

Bè yóm tehe knô le bè Idyip yó kem tehe fù me, là hol kenmón le du yó kem hentaw ton gel nmò Dwata, là hol hendem le du yó kem tey dê nmoen gónón hegfan du yóm kbong nawahen kul. Ditu bè Mohin Hulô, deng mom natù le.

Kem Lingón 78:11

Deng klifót le yóm deng nmò Dwata, yó kem tey hentaw ton deng hegfanen bélê le.

1 Bok Kem Tau Hol Geta 8:57

Yó hem sana kut Dwata hol gónó mogot tendo nô bélê tekuy lómón yóm tehe knóen bè yó kem tehe fù tekuy ekni. Hni me béléen anì là kô nan e bayà tekuy,

Kem Lingón 106:13

Okóm là legenen bè yó, sana bud klifót le yóm deng nmoen, ne là kô hangat le du yóm hlauhen kul.

Kem Lingón 130:4

Okóm deng tódô hnifótem mi, anì yó, wen klikò me mulé kóm.

Hibru 12:25

Duhen yó, hol tekuy temgama. Hol bê tekuy là hnungol ke mudél ebélê tekuy Dwata. Ngem yó dé kem tehe tau gnan ekni, tey kegtafak le lan le là hmungol yóm udél Dwata hlanen bè Musis ekni dini te tonok. Sélét mom tekuy ne là megtafaken ke knogol tekuy yóm mudél ebélê tekuy gu bè longit.

Kul Nmò 7:39

Okóm yó kem tehe fù tekuy ekni,” mon Stéfén, “là kô le dog móyô mimón ke Musis, deng mom senkbê le. Sónmò le bud tô móyô mulék ebè Idyip.

Kem Udél Hlalak Tehe Selumun 1:24

Ket kiwólu deng tmaba kuy sbol tinoku yu, okóm là kô ye móyô hmungol ne là se kô kenmón ye do.

Lista 16:14

Là kô dog nwitem kum ebè yóm benwu hyu tonoken, yóm benwu tehe tulónem kum. Laen sem dù tonok blayem kum ne laen se dù gónó me mò hulu mò kum nfun. Ne ni, tô snukatem mi. Là kô me móyô mógów edyó.”

Lista 14:41

Okóm yó mon Musis mò kul, “Ke tahu yóm kehegsel ye yó, moen du ke là nimón ye du yóm khulék Dwata kuy elem yóm benwu laen hol wen tauhen? Là kô ye na a matù bè nim kundug ye ni.

Lista 14:11

Yó udél Dwata ebè Musis, monen, “Deng tódô senflós le kembê do ni kem tau ni. Tódô senflós le là smalig do igoen deng tey dê hentaw ton nmou lem blóng le.

Nihimaya 9:31

Okóm lemwót bè yóm alì kkoduhem kul, là kô dog bayaem kul ne là se dog genlaem kul. Tey minggel nawam yóm uu, Dwata, ne tey kkoduhem tau.

Jirimaya 19:15

“Ni se udél yóm Dwata laen dù là gbeken du, yóm sana kuy Dwata kem tau Israél, monen, angat wen tey heglumfaku du yóm syudad ni dalang se yó kem benwu hmilol du, hol lómón yóm deng monu mò kuy, abay se tey mgel kulu ye, là kô hnungol ye dou.”

Danyél 9:9

Okóm uu se yóm sana kum Dwata hol gónó mogot, teyi kmodu ne mahili hmifót balù yóm deng gel katù me kóm.

Nahum 1:3

Là kóen mahil lembut yóm Dwata, okóm tey kfasangen. Là gbeken du ke là tnafaken kul yó kem tau wen salaen. Yó gónón hegfan du yóm kfasangen bè yóm tey klifus ne bè yóm tey lenos bong. Yó kem lobun, olo kfung lemwót bè laan tihen.

Kehewà 32:9

Deng tngónu tey mgel kulu le ni kem tau ni.

1 Samwél 12:22

Yóm Dwata, là kô nan e tódô bayà kul yó kem kun tau deng nélék. Ke bayaen lu henyaken yóm kun boluy. Tey kehyu nawahen bè yóm kehbalingen kuy mò kun tau.

2 Tutul Israél 36:13

Sotuhen, mom natuen Nibukadnisar yóm tau hol geta bè Babilun, igoen tehe hsafà du hlanen bè boluy Dwata anì là smonolen. Tey mgel kuluhen nim Sidikaya ni, là kóen móyô semfulék ebè Dwata yóm sana kul Dwata hol gónó mogot yó kem tau Israél.

Kem Lingón 78:10

Là kô lolò le du yóm deng senfasad le Dwata, ne kenbê le yó kem kun hlau kul.

Jirimaya 7:26

Okóm balù sotu bélê ye ke wen hmungol kul duhen ke kemmón kul. Mom hgel ye kulu ye ne knogol ye o senta yóm kul kkogol do yó kem tehe fù ye.

Jirimaya 18:15

Okóm yó kem dou tau, deng klifót le ou. Gel le mtem insinsu mò hboo le bè yó kem dwata kéng laen dù muhen. Deng mom senyat le yóm lan hyu tehe hlolò Dwata kul, mom yó lolò le yóm lan hono hitok.