Nihimaya 1:6 - Udél Dwata: Gna Kesfasad ne Lomi Kesfasad

⁶ Kudungi do edini, Dwata, hol hnungolem do yóm hnihu. Knoyungu kdaw ne kifu mni bè yó kem tau Israél tóbóng lówóhem. Tódô benkasu béléem, deng me gemsalà béléem mi kem tau Israél. Denge gemsalà béléem dalang se yó kem gónóhu gu semfu.

Nihimaya 1:6 Referans Kwoze

Danyél 9:20

Tódô henlelu mni bè Dwata yóm sana kum Dwata hol gónó mogot ne benkasu ebéléen yó kem salà me mi kem tau Israél ne henkoduhu béléen yóm bud ketloben Jirusalim yóm kun bulul gónó nô bè yó.

Danyél 9:4

Mnihe bè yóm sana kum Dwata hol gónó mogot, benkasu béléen yóm salà me kem tau Israél, monu mò du, “Ó Dwata yóm Dwata hol mfasang ne bang knikò. Sal gel dnohoem yóm tehe senfasad kuy, duhen yóm kbong nawahem yó kem tau kembong nawa kóm ne mimón yó kem hlauhem.

Kem Lingón 34:15

Tendo gel knudung Dwata yó kem tau tedeng kmò le. Gel hnungolen yóm ktaba le ebéléen.

Kem Lingón 106:6

Deng me gemsalà se kum, mkél me bè yó kem fù me, deng me mò sidek, ya tey sidek yó kem nmò me.

2 Tutul Israél 29:6

Yó kem fù tekuy balù udì ke nimón le Dwata, deng mom nmò le yóm alì sidek bè kton Dwata du yóm sana Dwata hol gónó tekuy mogot. Deng tebel le Dwata, dalang se yóm Gónóen deng knogol le.

2 Tutul Israél 6:40

Duhen yó, Dwata, hol kenmónem yó kem hni le béléem lemwót bè Gónóem.

Isaya 6:5

Botong monu, “Adéy, laen dù bud nefet nawahu ne. Denge golu elem hatay ne dou abay se ket udél btang bè sumóngu hono sidek. Lelen yó he nóe lem blóng yó kem tau sónmoen sidek kudél le. Blaem ni, tódô dou mata mton du yóm hol dandónen geta yóm Dwata laen dù là gbeken du.”

1 Jan 1:9

Okóm ke gotu benkas ye ebè Dwata yó kem salà ye, là gbeken du ke là hnifóten kuy, yakà wen yóm tehe fasaden tekuy. Gotu hnifóten yó kem salà tekuy, ne gotu kóhen bélê tekuy yóm kdê nmò tekuy là hyuhen.

Kun Snulat Luk 18:7

Milud he kofin Dwata yó kem kun tau tendo gel mni tóbóng béléen ket kdaw ne ket kifu. Là kô feng gnanggaen kul.

2 Timuti 1:3

Béléu do, tey kdóyónu ke Dwata, ne laen kô dù bang blóngu ebéléen yóm klawihu mò du nim hmoen dou ni. Hol lómón ni se yóm tehe kul nmò yó kem tehe fuu ekni. Tey kdóyónu ke Dwata bè yóm gel kutómu kóm béléen, tódô ketu kifu ne ketu kdaw.

1 Timuti 5:5

Yóm libun bolu tahu laen bang gónón ma, tek són Dwata dé gónón hefet nawan, ne là kóen skó tendo knihen bè Dwata, keten kifu ne keten kdaw.

Kem Lingón 130:2

Hol hnungolem o, Dwata, hnungolem yóm knihu tóbóng béléem.

Kem Lingón 55:17

Keten hlafus ne kemdaw ne kifu kgefeten bè Dwata yóm tendo ktalawu ne kdolongu, ne gel hnungolen ou.

Kem Lingón 32:5

Yó gónóm mon, deng gotu benkasu ebéléem, Dwata, yó kem salau, laen kô dù bunihu béléem. Bè yóm kebkasu du béléem yóm kdéen, deng gotu hnifótem béléu ne yó kem sidek tehe gel nmou.

Ifisus 2:3

Bè ktahuhen, lómón yó se tehe kut kmò ekni yóm kdê tekuy. Tódô nmung tekuy yóm knóyô tekuy. Balù kihu knóyô lówó tekuy ne kenbeyen nawa tekuy, tódô nmò tekuy. Yó se gónó tekuy gomong bè yóm kdéen tau deng golu elem tafak Dwata.

Kem Lingón 88:1

Ó Dwata yóm Dwata lemwà dou, tey knihu béléem, tódô senflósu kdaw ne kifu.

1 Samwél 15:11

“Tey kegselu yóm kmou ke Sol tau hol geta bélê ye. Deng knogolen o ne là bud nimónen du yó kem hlolou du.” Tey sidek kegnóm Samwél du ne tódô suloyen buteng hkodu mni bè Dwata.

1 Bok Kem Tau Hol Geta 8:30

Hol hnungolem yó kem gel hnihu béléem, dalang se kul gel hni yó kem tauhem Israél igò me smolu ebè yóm Gónóem ni. Hol hnungolem mi igoem nô dyó bè gónóem nô bè longit, ne ke deng gungolem, hol hnifótem mi.

1 Bok Kem Tau Hol Geta 8:47

okóm ke hegsel le bè yóm knô le bè yóm benwu yó, ne ke mni le béléem, ne ke gotu benkas le béléem yó kem tey salà le ne yóm tey ksideken yóm deng nmò le, Ó Dwata, hol hnungolem yóm kni le.

Nihimaya 1:11

Hol hnungolem do yóm hnihu béléem, Dwata. Bud hnungolem snéen yóm kul hni yó kem dumu tau tóbóng lówóhem, yóm wen óyô le madat kóm. Hol tnóbóngem o kemdaw ni ke wen hnihu bè yóm tau hol geta anì knoduhen ou.” Bè yó kem kdaw yó, yó dou nmò, ou fen gel mkay du bè yóm tau hol geta yóm gel ninumen.

Kem Lingón 102:17

Angat bnalaen yóm hni yó kem tau laen dù gónó le ma. Là kô nan e kenbê du yó kem hni le.

Danyél 9:5

Okóm nim mi deng me gemsalà béléem, nmò me yóm là hyuhen. Deng natù me uu ne deng knogol me yó kem hlauhem ne yó kem hloloem kum.

Danyél 9:8

Ó Dwata yóm sana Dwata hol kum gónó mogot, tey bong kyak me béléem gomong yó kem tau hol geta me ne yó kem sfu tau hol geta genlal bélê me, kkólen bè yó kem tehe fù me, lemwót bè yóm deng kegsalà me béléem.

Danyél 9:15

Ne ni Dwata, uu se yóm sana kum Dwata hol gónó mogot deng me gemsalà béléem, hono sidek yóm gel nmò me igoen tey tótól yóm boluyem efet yóm kmoen ni lanem tehe lemwà yó kem tauhem gu bè Idyip, botong kóm kegbek.