Nahum 1:7 - Udél Dwata: Gna Kesfasad ne Lomi Kesfasad

⁷ Tey hyu yóm Dwata. Ke wen hlayam sut, tek sónen du yóm gónó e mlo alì mbegel. Gotu nofinen yó kem tau smalig béléen.

Nahum 1:7 Referans Kwoze

2 Timuti 2:19

Okóm yóm ktahuhen lemwót bè Dwata, là kóen na a monol. Wen deng hsulat Dwata, yó monen, “Tngón yóm gónó tekuy mogot yó kem kun tau.” Ne sotuhen, “Ke yó udél yóm sotu tau, ke monen, Tauhe yóm gónó tekuy mogot dou, yake hol hlayuk du sen yóm sidek.”

Kun Snulat Jan 10:27

Ke yu yóm dou ubiha, kaem hnungol ye udélu. Gotu tngónu lu ne gotu lolò le ou.

Lanu Jirimaya 3:25

Tey hyu yóm Dwata bè yó kem tau hemdón du ne mebel du.

Kun Snulat Jan 10:14

Ou se,” mon Jisas, “yóm tau hyu kesegyoken ubiha. Gotu tngónu yó kem dou ubiha ne tngón le se ou kul,

Kem Lingón 100:5

Tey hyu yóm Dwata. Laen kô dù tul sónen yóm kbong nawahen tekuy. Ne là kóen monol yóm nawahen ebélê tekuy efet kól bè laen dù sónen.

Kem Lingón 27:5

Ke wen gfà sut béléu, són du gónóhu e hles. Bnosen ou lem yóm kun Gónô, lómón ke nkayen ou eta yóm léhék geta anì là gafit le dou.

Kem Udél Hlalak Tehe Selumun 18:10

Yóm Dwata mò gónó le heklung ne gónó le e mlo yó kem tau tedeng kmoen ne gónón hyu knóen.

Kem Lingón 1:6

Bong yó kem tau tedeng kmò le, tendo gel sen-galak Dwata lu ne nofinen lu. Bede yó kem tau gel mò sidek, deng le golu elem hatay ne.

Glasya 4:9

Okóm ni, deng tngón ye Dwata, o, monu dé, deng tngón Dwata yu. Ke lómón se ni kmoen, moen se ke bud ye ghesek bè yó kem dê hlolò le kuy lem nim benwu ni? Igoen laen dù kgis le tmóbóng kuy yó kem yó, balù udì.

Isaya 25:4

Yó kem tau élél ne yó kem tau laen dù genbeken deng le gotu mlo ebéléem ne laen kô hemen le bè yóm gel kesbeweg benwu le. Uu se gónó le heklung bè yóm lenos bong ne bud uu se gónó le e hgolung bè yóm tey sidek ékét kdaw. Yó kem tau alì hemsidek kum hol lómón ke lu yóm lenos bong

1 Tutul Israél 16:34

Hol dóyón tekuy Dwata lemwót bè yóm tey kehyuhen. Là kóen monol yóm kbong nawahen tekuy ne laen kô dù tul sónen.

Jirimaya 33:11

gungol ye tau hligal ne kmuli. Bud gungol ye se yóm udél le hligal yó kem tau syehen. Bud gungol ye se yóm kehligal le semngal yó kem tau bè yóm kógów le ebè yóm dou Gónô lan le mit du yóm gel dsù le ebéléu mò gónó le dmóyón do. Yó angat sngal le, mon le, ‘Hol dóyón tekuy yóm Dwata laen dù là gbeken du, abay se tey hyu kmoen. Laen kô dù nan e són yóm kbong nawahen tau.’ Yakà angat bud hen-guléku du nim benwu ni lómón yóm gnan,” mon Dwata.

Kem Lingón 86:7

Bè yóm kdaw wen gónóhu glayam, tmabahe ebéléem, abay se gel bnalaem ou.

Isaya 32:2

Kehlingónu kul, hol lómón ke lu mò seng bè lenos ne mò gónó e mlóy ke sut yóm tey kulón bong. Sotun, lómón ke lu yóm él mlel bè yóm benwu laen dù élen. Ne lómón ke lu yóm olung yóm botu semlung gónó hgolung bè yóm benwu laen dù koyuhen.

Kem Lingón 25:8

Tey hyu yóm Dwata, ne tey tedeng yó kem gel nmoen. Gel toloken yó kem tau gemsalà yóm lan mò lolò le.

Danyél 3:28

Omin Nibukadnisar mon du, “Hol dóyón tekuy yóm kul Dwata le Sadrak ne Misak ne Abidnigu. Deng wen hógówen gu bè longit mò lemwà yó kem tau tóbóng lówóhen smalig béléen. Là nimón le du yóm hlolou kul, mom hyu bélê le he ke matay le olo ke tô le tmaba ebè yó kem tólóng dwata. Tek són kul Dwata nimón le.

Kem Lingón 71:3

Hol lómón ke uu yóm botu bong tendo gónóhu e solu mò gónóhu heklung, mò gónóhu hofin. Géhéli mudél anì gewae, yakà són uu du yóm botu gónóhu heklung ne gónóhu hofin.

Kem Lingón 91:15

Ke tmaba le ebéléu, bnalau lu. Ke wen gfà le, elese nô bélê le. Tendo gel lenwau lu, ne tey kadatu kul.

Kem Lingón 59:16

Okóm dou, Dwata, utómu lingón yóm tey genbekem. Lemwót bè yóm tey kbong nawam dou, tódô ketu hlafus hligal mensag. Abay se són uu gónów e mlo, gónów henek bè yóm kdawen wen hlayamu.

Kem Lingón 50:15

Ke wen gfà ye, tmaba ye ebéléu, lenwau yu mò gónó ye dmóyón dou.”

Danyél 6:23

Ya tey kligal yóm tau hol geta, ominen hewa ke Danyél lem yóm sol gónó le kmukub yó kem liyun. Lemwót bè yóm ksalig Danyél yóm kun Dwata, balù udì ke wen ton le halì bè lówóhen.

Sulat Pol Ebè Yó Kem Tau Hemtahu Bè Rom 11:22

Bè yó gónó tekuy mton du yóm tey kkodu Dwata tau, ne yóm tey ktafaken kul. Tnafaken yó kem tau là hemtahuhen. Okóm tey knoduhen yu, syan ke là monolen yóm kehtahu ye. Okóm ke snonol ye, angat bud ntoken yu snéen kuy.

2 Tutul Israél 32:21

Ominen wen hógów Dwata gu bè longit ebè yóm kul kamfù yó kem sendalù Asirya. Gotu hnatayen yó kem sendalù Asirya alì kemgis, ne yó kem kmandér le ne kem genlal bè yó kem sendalù le. Yó gónóm mon, tódô mulék ebè benwuhen Sinakirib ne tey kyaken. Bè yóm kkólen bè gónô yóm kun dwata, wen bè yó kem ngaen monok du sudeng bè yó.

Matyu 27:43

Gel smalig bè Dwata kun, ne du kun yóm Ngà Dwata. Nénég ke móyô Dwata lemwà du.”

Matyu 7:23

Okóm,” mon Jisas, “angat monu mò kul, ‘Là kô tngónu kuy. Hlayuk ye béléu, yu kem tau gel mò sidek.’ ”

Isra 3:11

Sngal le yóm sngal dmóyón ke Dwata, bud gel sensulit le yóm korosen, mon le, “Tey hyu yóm Dwata. Yóm kbong nawan yó kem tau Israél, laen kô dù nan e són.” Tódô kdê le gotu hemsag dmóyón ke Dwata, abay se deng gotu deng kmò le du begel yóm Gónô Dwata hdà le.

2 Tutul Israél 32:11

Yó deng mon Hisikaya mò kuy, ‘Angat lenwà Dwata tekuy, yóm Dwata hol gónó tekuy mogot lem hólól yóm tau hol geta bè Asirya.’ Okóm niten yu hetlas. Yóm nmoen yó, olohen hfatay kuy bè bitil ne bè kleeng.

2 Tutul Israél 32:8

Tey wen kem sendaluen, okóm olo le tau. Nô bélê tekuy yóm sana kut Dwata hol gónó mogot mò tmóbóng tekuy ne du fen sfatay bélê tekuy.” Nim udél Hisikaya ni, tey ketgelen nawa yó kem tau.

Kem Lingón 20:1

Dwata he malà kóm bè yó kem hnihem béléen ke wen gfà sut béléem. Yó hem Dwata tehe gónó Jakub hemtahu tendo gel mofin kóm.

Kem Lingón 37:39

Tólóng kul yó kem tau hyu kmò le, sal gel lenwà Dwata lu. Gel kenlungen lu ke gel wen gfà msut.

Kem Lingón 37:40

Sal gel tnóbóngen lu, ne hewaen lu lem tdok yó kem tau gel mò sidek. Yó gónón mò du bélê le yóm yó, abay se gel le heklung béléen.

Jirimaya 17:17

Ó Dwata, béem bayà ou. Tek són uu yóm nefet nawahu bè yóm kdawu glayam.

Jirimaya 24:5

“Ni se udél Dwata yóm Dwata yó kem tau Israél. Yó kem fig hyu tonem hnigaden yó kem tau Juda deng negef le ebè Babilun.

Juwél 3:16

Tey lungkulen gu bè Sayun yóm udél Dwata ne lemték gu bè Jirusalim. Tódô gotu msinsig tonok ne longit. Okóm bè yó kem kun tau Israél, Dwata se gónó le e mlo mò gónó le e heklung.”

Sifanaya 3:12

Yó kem dù tau tebelu bè Jirusalim, hono kem tau hulung heglaan, kem tau alì smalig bè yóm dou boluy.

2 Tutul Israél 13:18

Bè yóm kdaw yó, gemmò yó kem sendalù Juda, abay se snalig le Dwata, yóm Dwata yó kem tehe fù le.

Kem Lingón 9:10

Yó kem tau temngón kóm, Dwata, són uu snalig le. Abay se là kô nem e gel bayà kul yó kem tau hmebel kóm.

Kem Lingón 46:2

Duhen yó, hol bê tekuy abay hlikò, anien ke sut linol bong megsinsig klamangen benwu, ne ke gotu stunal elem mohin yó kem bulul.

Isaya 50:10

Bong bélê ye kuy, yu kem tau wen klikoen ke Dwata, yu kem gel mimón du yóm udél yóm tau tóbóng lówóhen, anien ke tey kmifu yóm lan lolò ye, hol snalig ye yóm gónó ye mogot, hol ken-gel nawa ye Dwata.