Nahum 1:6 - Udél Dwata: Gna Kesfasad ne Lomi Kesfasad

⁶ Ke wen lenbuten, tau du de gembek mdà bè soluhen? Tau du de bud mowil bè yóm tey kebuten? Yóm kebuten yó, hol lómón ke mkal yóm tey dilóf ofi, botong lemusok bè soluhen yó kem léhék.

Nahum 1:6 Referans Kwoze

Jirimaya 10:10

Okóm uu, Dwata yóm hol gónó mogot, tahuhi Dwata se kóm. Uu se yóm Dwata là matayen, uu se yóm laen dù tul són yóm kegetahen. Ke sok bangem lembut tódô megsinsig yóm klamangen tonok. Gotu le hebnos yó kem tau bè dumu benwu lemwót bè yóm kebutem.

Malakay 3:2

Okóm bè yóm ksuten, tau du se gembek hembala du? Tau du se gembek mdà bè soluhen bè yóm kdaw kegdeken? Laen duen. Abay se yóm nangat ye yó, hol mkél bè yóm tey ofi gbeken hnò bala tók, duhen ke mkél bè yóm sabun alì lóbô gbeken hbukay nes.

Nahum 1:2

Yóm sana Dwata hol gónó mogot, tey mélés nawahen ke tólóng dwata lolò yó kem tau. Gel bnelesen yó kem tau kembê du. Lemwót bè kebuten kul, gotu genlaen lu.

Kem Lingón 76:7

Teyi bong knikò, Dwata. Tau du de gembek mdà bè soluhem ke bangem lembut?

Isaya 27:4

Là bud lenbutu du yó kem huluhu. Ke wen tonu ngà koyu semnual duhen ke wen kluon semnual tô hemsidek du, tódô gotu ntemu lu he.

Isaya 10:16

Yó angat nmò yóm Dwata laen dù là gbeken du, angat wen des hwiten ebè yó kem tau mabù tilob kken le mò tmafak kul. Hol lómón ke wen ofi senflós mken lem lówó le.

Kem Lingón 90:11

Tau du de deng gemnóm du yóm alì ksidek kebutem, Dwata? Ke deng gnómen, nawaw deng tey sidek klikoen.

Kem Lingón 2:12

bè yóm keheglaan ye béléen. Déke kendel msut lebuten, ngem kà tódô ye matay mekto. Tey kehligal le kul yó kem tau tendo gel hofin béléen.

1 Bok Kem Tau Hol Geta 19:11

Yó mon Dwata mò du, “Hwai dé ne mdai bè soluhu ta bulul.” Ne igoen mdà bè yó Ilaydya, mius se Dwata, ne tódô sut se yóm tey lenos bong gónón mluy ne tbó yó kem botu. Okóm là kóen nô bè yóm lenos yó Dwata. Kogol yóm lenos, sut se yóm tey linol, okóm bud là nóen bè yóm linol yó Dwata.

Deng Hegfan 16:8

Ne lemwót yóm gfat hógów Dwata koken se kun tukung bè mata kdaw anì temnù kkinien, anì mluf yó kem tau bè alì sidek kkinì kdaw.

Deng Hegfan 16:1

Ominu bud mungol yóm tey udél bong gu lem yóm Gónô Dwata, mudél ebè yó kem hitu hógów Dwata, monen, “Lemwót ye ne. Ne ye e kok te tonok yó kem hitu tukung gónón nô yóm tey lebut Dwata kem tau.”

Deng Hegfan 6:17

Abay se deng hto ne yóm kul kdaw tmafak, ne laen kô dù tau gewà gu lemen.”

Job 40:11

Temngeli ebè yó kem tau alì hegmón kun, lusem eta le kun yóm kebutem anì hol gnóm le.

Kem Lingón 130:3

Ke nawam smolò du yó kem salà nmò me, balù sotu bélê me ke gewà gu lem tafakem.

Sifanaya 2:2

Hegsel ye dé, yóm gu laan ye là deng holis bè lenos lómón kafa halay, yóm gu laanen là deng kmukum kuy Dwata, yóm gu laanen là deng sut bélê ye bè yóm alì ksidek kebuten kuy, yóm gu laanen là deng sut bélê ye bè yóm kdaw kehtonen yóm alì kebuten.

Malakay 4:1

Yó bud udél yóm Dwata laen dù là gbeken du, monen, “Ke sut yóm kdaw kkukumu tau, lómó kmou kul lómón ofi gotu himot kenen kdéen. Yó kem tau heklabak ne yó kem tau gel mò sidek, angat le gotu mlób bè ofi lómón klób lami. Gotu ken ofi lu lómón kken ofi yóm koyu, gotu gomong dolilen ne kem hangahen laen kô dù tebel du.

Kem Lingón 76:8

Lemwót bè longit yóm kkukumem yó kem hohonem, botong le likò yó kem tau bè klamangen benwu, tódô le yem bè soluhem.

Isaya 33:14

Yó kem tau gel mò sidek bè Sayun, tey sidek kesetbol kkel le lemwót bè yóm tey alì klikò le. Yó udél le, “Yóm kkukum Dwata tekuy hol lómón ke dilóf ofi laen dù tul katayen. Laen kô dù bélê tekuy bud mowil du yóm ofi lómónen yó.”