Mika 7:10 - Udél Dwata: Gna Kesfasad ne Lomi Kesfasad

¹⁰ Ominen yó kem hohonu, angat ton le snéen kul yóm tey kfi Dwata do. Ne tey sidek kyak le bè yóm tehe gel udél le ebéléu, yóm gel kmon le du, “Nô se yóm Dwata gónóm mogot?” Tódô hol dou mata se angat mton du yóm kdà le kul elaan hol lómón hitok bè lan. Là gomongen bè nili yóm bérs 11 kól bè bérs 17. Yó tulónen bè ni kem bérs ni, kogol yóm ktafak Dwata kul yó kem kun tau, angat bud hen-guléken klowil le dalang se yóm benwu le bud hetloben. Lemwót bè yóm bud kulék le ebè Dwata yó kem kun tau, ya tey bud któtól le bè klamangen benwu. Okóm yó kem hohon le, tey ktafak Dwata kul. Okóm lemwót bè yóm kton le du yóm deng nmò Dwata bè yó kem tauhen, ya tey klikò le se kul, botong le kenkel bè yóm kadat le ke Dwata.

Mika 7:10 Referans Kwoze

Sikaraya 10:5

Yó angat gónó le mkél yó kem tau bè Juda, lómón yó kem sendalù alì kemgis bè gida, gotu sninà ndà le yó kem hohon le, lómón mdà hitok. Lemwót bè yóm knô Dwata bélê le bè yóm kesfatay le, sal le gel gemmò bè yó kem hohon le, balù bè yó kem hohon le smakay kudà.

Kem Lingón 42:10

Tey sidek kegnómu du bè yóm kehnê le dou. Sónmò le mon du mò dou, “Nô se yóm Dwata gónóm hemtahu yó du?”

Deng Hegfan 18:20

Okóm kuy du, yóm kdê ye gel nô bè longit, hol ye hligal lemwót bè yóm deng keglaen. Hligal ye ne, yu kem tau Dwata, ne yu kem tehe gel hógów Jisas, ne yu kem tehe gel tugod Dwata, abay se deng tnafak Dwata ne lemwót bè yóm tehe sidek nmoen bélê ye.

Juwél 2:17

Yó kem tau gel blóng ebè Dwata, mdà le lem blóng yó kem tau ne yóm gónó demsù ebè Dwata igò le mkik. Yó hni le, mon le, “Ó Dwata, hol knoduhem mi yó kem tauhem. Béem nmò mi tau mò sendekà yó kem tólóng tau bè dumu benwu ke mon le, ‘Na, nô se Dwata le du? Déke là gbeken tmóbóng kul.’ ”

Kem Lingón 35:26

Yó kem tau semkuli dou bè yóm kwen gfau, yake hol le bud mulék myak. Yó kem tau hegeta le knô le sentahu, hol hulékem lu myak.

Kem Lingón 18:42

Deng gotu bnibuu lu lómón kfung mung holis bè lenos. Lómón ke fól yóm kbotu kul.

2 Samwél 22:43

Gotu lenunahu lu efet le meblibù lómón kfung, gotu ndau lu elaan efet le lemuna lómón hitok bè yó kem lan.

Mika 4:11

Tahu se, deng tey dê but tau stifun mundug kuy. Yó udél le, “Hol genbà tekuy Jirusalim. Hyu ke hol mata tekuy mton du yóm deng kegbaen.”

Kem Lingón 79:10

Moen du ke bayaem lu mudél yó kem tau bè tólóng benwu, yó kem tau là temngón kóm, yó udél le, “Nô se Dwata le du?” Hegfanem bélê me yóm kbelesem kul bè yóm khatay le yó kem tóbóng lówóhem.

Matyu 27:43

Gel smalig bè Dwata kun, ne du kun yóm Ngà Dwata. Nénég ke móyô Dwata lemwà du.”

Malakay 4:3

Sok deng hto yóm dou buteng tmóbóng kuy, laen dù bud gmò le bélê ye yó kem tau mò sidek, lómón ke olo le kfung demket laan hólól ti ye,” udél yóm Dwata laen dù là gbeken du.

Malakay 1:5

Yó bud udél Dwata ebè yó kem tau Israél, monen, “Angat hol kuy mata se mton du yóm kegbau yóm benwu Idom. Bè yóm kton ye du, botong mon ye, ‘Tey bong mfasang yóm sana kut Dwata hol gónó mogot, tódô gefet sentu benwu tekuy yóm tey kfasangen.’ ”

Ubadaya 1:10

“Yó gónó le mò du bélê ye yóm yó, lemwót bè yóm alì kehsidek ye yó kem dumu ye setwoli sfu Jakub. Yó mò kuy angat tey sidek kyak ye, tódô ye sulék meglà ne laen kô dù tul sónen.

Danyél 3:15

Okóm ni, benlayu yu sulék duen. Ke bud gungol ye yóm tey uni féw sguyun mung du yóm kdê dumu huni le ne ke mtud ye uyó bè tonok, laen kô dù gfà ye. Okóm ke là mimón ye, tódô henmung tudà le yu elem tey dilóf ofi tuu. Ke lómón yó, dwata du de tô gembek lemwà kuy lem hólólu?”

Kem Lingón 115:2

Moen de ke gel snólók le mi yó kem tau bè dumu benwu hmilol, gel mon le, “Gónón nô se kuy Dwata du?”

Kem Lingón 109:29

Hol hegfanem bè kdéen tau yóm sidek kyak yó kem hohonu, hol hegfanem lómón yóm nes eles nô bè lówó le.

Kem Lingón 58:10

Bong yó kem tau tedeng, angat tey kehligal le kul ke ton le yóm kbeles Dwata kul yó kem tau là tedeng kwit le kukum. Angat nolob le ti le bè litô yó kem tau gel mò sidek deng hnatay le.

Kem Lingón 42:3

Tey tendo kkiku kemdaw ne kifu, hol lómón ke yó henged kenu. Lel ni kem hohonu, tendo gel smólók dou, “Nô se yóm Dwata gónóm hemtahu yó du?”

Ubadaya 1:12

Yake béen lómón yó dé nmò ye. Béen dê udél ye bè yóm kdaw kegef le yó kem dumu ye ebè tólóng benwu mayuk. Bê ye mom fen hligal bè yóm kdaw keglà le. Bê ye mom heklabak bè yóm kdaw le alì tmalaw.

Mika 7:8

Laen kô dù lan le kmuli do yó kem dou hohon. Denge tlokob, okóm angate bud mdà. Balù yóm deng knóu lem gónón kmifu, okóm Dwata se hlayag do.

Juswa 7:9

Ke deng gotu glalag bè kem tau Kanan ne bè yó kem dumu tau bè klamangen benwu nim gfà me ni, angat gotu snibut le mi ne angat gotu hnatay le mi yóm kdê me. Ke yó se nmò le bélê me yó kem hohon me, tedu se tô kmoem du du anì là lanahen yóm klikò le kóm?”

Kem Lingón 92:12

Okóm kul yó kem tau mimón ke Dwata, tey hyu klowil le hol lómón ke lefò tey tilob ktowoken. Ne tey kbegel le, hol lómón kbegel yóm koyu sidar bè Libanun.

Isaya 26:11

Là kô tngón kem hohonem du yóm angat ktafakem kul. Hol henyakem lu dé, Dwata, ne hol hnayamem lu. Hol hlayamem kul yóm tafak deng eles tgamahem bélê le. Ne hegfanem bè yó kem kóm tau yóm tey kbong nawahem kul.

Sifanaya 3:15

Deng nmò Dwata sónen ne yóm ktafaken kuy ne gotu lohen yó kem hohon ye. Tódô nô bélê ye ne Dwata yóm hol geta bè Israél ne laen kô bang bud knikò ye ne.”