Mika 6:7 - Udél Dwata: Gna Kesfasad ne Lomi Kesfasad

⁷ Hligal du Dwata kô ke mit tekuy ebéléen hilu libu ubiha mung du yóm hnolo ulib là skasen tendo molo? Hligal du kô ke dsù tekuy ebéléen yóm ngà tekuy twogu mò bayad yó kem salà tekuy?

Mika 6:7 Referans Kwoze

Kem Lingón 51:16

Là kóen gsengel nawahem du ke olohu demsù ebéléem mò bayad salau. Senged se yóm dsù gel hkekeb me ebéléem, là kóen gsengel nawahem du.

1 Samwél 15:22

Ne yó balà Samwél du, monen, “Mahi du du yóm gónó Dwata hligal, yóm dsù hkekeb te ne yóm dumu dsù te kô, duhen ke bè yóm kimón te du? Kaem kimón ke Dwata yóm bong muhen senta yóm dsù hkekeb. Kaem yóm khungol te du, bong muhen senta yóm ubiha mabù dsù te ebéléen.

Husiya 6:6

Yó hol nóyóu bélê ye ke hol tahu lemwót lem but blutut ye yóm kbong nawa ye do. Là kô yó du kem gel dsù ye yóm hnebelu. Mom hyu nawahu ke hol tngón ye o. Tey hyu yó senta bè yó kem dsù gel hkekeb ye ebéléu.

Jirimaya 7:31

Bè Sbong Hinom, deng wen gónó demsù boluyen Tufét hdà le bè yó mò gónó le hkekeb yó kem ngà udì le logi duhen libun. Nim nmò alì sidek ni, là kô hmou du kul. Balù sulék ke tô hendemu yóm nmò le yó.

Kem Lingón 50:9

Okóm là bud henmóyóu du ne yó kem safì tudu gel sen-gyok ye, ne kem kambing lemwót bè kukub ye.

2 Bok Kem Tau Hol Geta 23:10

Deng gholu Jusaya snéen yóm gónó gel demsù bè Tufét bè Datal Bin-hinum anì laen dù bud tau demsù kem ngà le logi duhen ke ngà le libun bè yó ebè yóm dwata boluyen Molék.

Isaya 40:16

Tódô klamang yóm dlag Libanun là kóen kóyów yó kem koyuhen semnuk du yóm dsù mò gónó hol madat ke Dwata. Ne yóm kdéen ógóf mò gel dsù là kóen kóyów ke mò dsù ebè Dwata.

Filimun 1:12

Ne ni bud huléku edyó ebéléem, ne tey gmung nawahu du.

Amus 5:22

Baluen ke mit ye ebéléu yó kem dsù gel hkekeb ye ne ke mit ye ebéléu yó kem halay ye, là kô henmóyóu kul. Là se henmóyóu du yó kem ógóf deng habù ye mò blay ye ebéléu.Blà ye ne hebnes semngal. Là bude móyô hmungol du ne yó kem gel kenbit ye.

Jirimaya 19:5

Deng le mom hemdà gónó demsù ebè Baal mò gónó le hkekeb ebéléen yó kem ngà le logi. Là kô hmou du kul nim ni, ne là se kô hendemu du balù sulék.

Kem Udél Hlalak Tehe Selumun 15:8

Tey keklit Dwata du yóm kedsuen ebéléen yóm tau gel mò sidek, okóm yóm kni yóm tau tedeng kmoen hnigalen.

Kem Udél Hlalak Tehe Selumun 21:3

Tey hyu nawa Dwata du yóm tedeng ne yóm là kkihu senta yóm gel dsù ebéléen.

Isaya 1:1

Nim bok ni gónón nô yóm tehe udél Dwata htugoden ke Isaya ngà Amus. Yóm nô lemen hol gbak ebè yó kem tau menwu bè benwu Juda ne bè syudad Jirusalim. Dê dulék Dwata mudél ebélê le hlanen bè Isaya, nbuten bè yóm tehe kogot Usiya kul efet kól bè yóm kdaw kul kogot benwu le Jutam ne Ahas ne Hisikaya. Hono kem tau hol geta tehe stufì mogot yóm benwu Juda.

Husiya 5:6

Nwit le kem ubiha ne kem safì mò dsù le ebè Dwata, okóm deng mom gtufì. Là bud ton le ke Dwata ne, deng tnagaken lu.

Kem Lingón 51:18

Ó Dwata, hol tnóbóngem mi kem kóm tau bè kóm benwu bè Sayun. Bud hefdaem yóm beng hmilol Jirusalim.

Jirimaya 6:20

Tedu de muhu du yóm insinsu lemwót bè benwu Siba, yóm gel ntem ye mò hboo ye ebéléu? Ne yó kem dumu alì mebtes tilob boohen lemwót bè benwu mayuk, tedu de muhu du? Yóm dsù gel hkekeb ye ebéléu là kóe móyô du. Yó kem dumu gel dsù ye, là kóe na a hligal du.”