Mika 5:7 - Udél Dwata: Gna Kesfasad ne Lomi Kesfasad

⁷ Ominen lemwót yó kem dù mowil bè yó kem tau Israél menwu lem blóng yó kem tólóng benwu, hol lómón kmò le ke amù hwit Dwata ebè yó kem dumu tau, duhen ke kulón mò hméfê bnes. Són Dwata snalig le, là kô le smalig bè tau.

Mika 5:7 Referans Kwoze

Mika 5:3

Yó kem tau Israél, angat tódô bayà Dwata lu elem hólól yó kem hohon le efet kól bè yóm kdaw wen libun kmuleng blututen ne mngà logi. Ominen yó lemwót yó kem tau Israél deng negef le mayuk, tódô le bud mulék ebè yóm hol kul benwu lem blóng yóm kul dumu.

Isaya 44:3

Angat nmou él gu lem yóm benwu balù udì ke tehe wen élen. Ne wen él hlelu bè yóm tonok alì sidek kékéngen. Ne tódô suu bè yó kem ngà ye yóm dou Tulus ne tey któbóngu yó kem sfu ye.

Dwata 32:2

Kehlingónu du nim toloku ni, hol lómón ke kulón gdek ete tonok, ne hol lómón ke amù te tonok. Yóm udélu ebélê ye ni, hol lómón ke blanas eta yó kem hulu ne hol lómón ke blanas eta yó kem bnes.

Husiya 14:5

Yó kmou yó kem tau Israél, lómón ke ou yóm amù gotu hnéféen kdéen. Angat le mból lómón bulók. Angat nelem kdolil le lómón kem koyu sidar bè benwu Libanun.

Kem Lingón 72:6

Ke tilob kwiten kukum yóm tau hol geta, hol lómón ke kulón demsù eta yó kem dnadu, ne lómón ke blanas etalak tonok.

Sulat Pol Ebè Yó Kem Tau Hemtahu Bè Rom 10:20

Ngem ke Isaya kun, là kóen hadà tmulón du yóm tehe mon Dwata ekni, yóm monen, “Deng mom ton le ou yó kem tau tehe là mebel dou. Ne denge hdilô bè yó kem tau tehe là smólók dou.”

Sikaraya 14:8

Bè yóm kdaw yó, wen él hlowil mlel lemwót gu bè Jirusalim. Yóm sóól yóm él yó mlel ebè Mohin Héét ne yóm sóólen mlel ebè Mohin Miditiranyan. Tódô senflósen mlel, baluen ke bulónen kinì duhen ke bulónen tnaw.

Husiya 6:3

Tey hyu dé ke hol tngón tekuy Dwata. Henlel tekuy hloni ebéléen anì hol tngón tekuy. Ke yó nmò tekuy, angat dohò yóm kehegfanen bélê tekuy lómón kdohò kebtù mata kdaw ke hlafus ne lómón kdohò yóm kulón bè bulón mò hulu.”

Jirimaya 14:22

Laen kô dù bè yó kem dwata kéng ke gbeken hkulón. Balù longit, là kô gbeken du hkulón ete tonok. Són uu, Dwata, ken-gel nawa me yóm hol kum gónó mogot. Tek són uu gembek mò du ni kem hni me béléem ni. Nangat me yóm któbóngem kum.

Kem Lingón 110:3

Bè yóm kdaw angat kwitem sgida, wen tey óyô le tmóbóng kóm yó kem tauhem. Yó kem ngà logi sendaluem alì mólós nes le, angat le sut béléem ket hlafus, hol lómón kmò le, lómón ke amù gel sut hlafus.

1 Kurin 3:6

Ke hningónu yóm nmò me lem blóng ye, lómón ke ou yóm tau fen mò hulu, ne Apulus fen temwél du él. Okóm Dwata fen htowok du.

Sulat Pol Ebè Yó Kem Tau Hemtahu Bè Rom 11:12

Bè yóm kegsalà yó kem Ju, tey któbóng Dwata yó kem dumu tau bè klamangen benwu. Bè yóm là kguta yó kem Ju du yóm tóbóng Dwata kul, yó gónó Dwata hol hemdengen tmóbóng kul yó kem tau là Ju le. Ke ni se kmò kehlan Dwata du, milud he kehyuhen bè yó kem tau là Ju le sok le deng gotu gomong hemtahu yó kem tau Ju.

Sulat Pol Ebè Yó Kem Tau Hemtahu Bè Rom 9:30

Duhen yó, yó kem tau là Ju le, là kô ktes le du yóm ktedeng kton Dwata kul, okóm guta le lan le hemtahu bè Jisas.

Kul Nmò 16:9

Bè yóm kifu yó, wen hegfan Dwata bè Pol bè knahen, yóm sotu tau lemwót bè prubinsya Masdunya. Yó henkoduhen bè Pol, monen, “Holi mifal kum edini bè Masdunya nam e tnóbóng mi.”

Kul Nmò 13:46

Okóm kul le Pol ne Barnabas, là kô wen klikò le malà kul, mon le, “Igoen hyu ke yu gna tnulón me yóm tulón nwit me, okóm mom kenbê ye. Ilóem ofo kuy mon du ke laen dù mu ye du yóm udél gónó ye gmuta klowil laen dù sónen. Tódô tnagak me yu, mógów me ebè yó ne kem tau là Ju le.

Kul Nmò 11:15

Tikóng nbutu mudél ebélê le, tódô sut bélê le se yóm Tulus Dwata, lómón se yóm tehe tanay kmò ksuten bélê tekuy.

Matyu 28:19

Yó gónóm mon, mógów ye do ebè kdéen but tau bè klamangen benwu anì baling le tau lemolò do. Bnabtays ye lu hlan ye bè boluy Dwata, yóm Mà tekuy, ne bè boluy yóm Ngaen ne bè boluy yóm Tulusen.

Mika 2:12

Yó bud udél Dwata ebélê le, monen mò kul, “Okóm yu kem dù tebel bè yó kem tau Israél, hulin kdaw gotu bud sentifunu yu. Gotu bud nwitu yu semfulék lómón yó kem ubiha bud mulék ebè yóm hol kul gónó nô ne lómón yó kem ógóf bud mótób bè yóm hol kul gónó mótób. Yóm benwu ye, angat tey bud genged tauhen.”

Amus 5:15

Hol kenbê ye yóm sidek, ne hol henlom ye nawa yóm tedeng. Ne hol hentedeng ye kukum bè gónô skukum. Ngem, déke bud mulék kodu Dwata yó kem dù tauhen tolo mowil bè nim benwu ni, yóm Dwata laen dù là gbeken du.

Juwél 2:32

Yó se htóbóng bè boluy yóm sana Dwata hol gónó mogot angat gewà. Angat wen gewà bè yó kem tau nô bè Bulul Sayun bè Jirusalim, lómón yóm deng tehe mon Dwata. Yó kem tau gewà yó, lu se yó kem tau deng kun nélék Dwata.”

Isikél 47:1

Lemwót yóm tau hógów Dwata mit do yó, bud nwiten ou semfulék ebè bak dól yóm Gónô Dwata. Wen él tonu bè yó mlel laan yóm bak dól bè Gónô Dwata, bede mlel fi leged yóm bak dól yó ne hlós mlel etu fi dmata kdaw, loloen yóm gónón e smolu yóm Gónô Dwata. Niusen yóm gónó demsù, bede mlel fi legeden.

Isaya 55:10

“Yóm udélu,” mon Dwata, “hol lómón yóm kulón ne snu lemwót gu bè longit. Tódô henek te tonok, htowoken yó kem hulu anì wen mò bud gel hulu ne wen se mò ken.

Isaya 32:15

Bede angat bud hwit Dwata elem blóng tekuy yóm kun Tulus. Yó kem tonok là bud hyu mò hulu tahen, angat bud baling tonok hyu ne angat tey bong nuta le du.

Kmukum 6:36

Omin Gidyun mon du mò ke Dwata, “Ke tahu ou se yóm hógówem mò lemwà yó kem tau Israél

Kul Nmò 9:15

Bud mon yóm gónóhen mogot mò du, “Lemwóti etu ne, abay se deng néléku nim tau ni mò angat hógówu elem blóng yó kem tau là Juhen, ne ebè yó kem tau hol geta, ne ebè yó kem tau Israél snéen. Du se angat heglalag du yóm dou boluy lem blóng le.

Sifanaya 3:13

Yó kem dù tau Israél tebel yó, là kô le mò sidek bè kem dumu le, là kô le mò kéng ne là kô le smukat. Tey menek klowil le ne menek ktungô le ne laen kô dù bud tau hmikò kul.”

Mika 5:8

Yó kem dù mowil bè yó kem tau Israél menwu lem blóng yó kem tólóng benwu tey kekgis le, lómón kgis yóm liyun senta yó kem dumu ógóf nô lem dlag, tódô sut bè yóm gónó le mótób yó kem ubiha tódô kemfô bélê le, ominen msék kul ne laen kô dù gembek semkot du béléen.

2 Samwél 17:12

Omin tekuy mebel ke Dabid balù kihu gónón nô, sulék tekuy tbó etahen gu laanen là deng temngón du, lómón ketbó amù ete tonok, là kô tngón tau du. Ke ni se nmò tekuy, kaem matay Dabid dalang se yó kem tauhen, balù sotu ke wen tebel.

Kem Lingón 133:3

Yóm kessotu nawa, lómón kehyuhen lómón yóm amù hméfê yóm bulul Hérmun, ne yóm amù hméfê yó kem bulul bè Sayun. Bè yó kem tau ssotu nawa le yó, bélê le gónó Dwata fmasad du yóm hol hyu, duhen yóm klowil laen dù tul sónen.

Kem Udél Hlalak Tehe Selumun 19:12

Yóm klikò tau du yóm alì ksidek kebut yóm tau hol geta hol lómón klikoen du yóm ngel yóm gel mon le liyun. Okóm yóm kun kehyu nawa ebéléen yóm tau hol geta lómón kehyuhen bè bnes yóm amù.

Mika 4:7

Yó kem tau tugô tehe negef le yó, angat nmou lu kem tau dù tebel. Angat tey kehbólu kul, lelu bud hbegel kbenwu le. Ominen ou yóm angat mogot kul bè Bulul Sayun ne laen kô dù tul sónen yóm kogotu kul.”

Mika 7:18

Laen kô dù dumu Dwata mkél kóm. Uu se yóm Dwata hmifót salà yó kem dù tauhem mowil. Sal gel wen sónen yóm kebutem tau, abay se yó hol nô bè nawahem yóm kkoduhem kul.

Mika 4:13

Yó udél Dwata, monen, “Ó kem tau bè Jirusalim, htigel ye ne gotu knusu ye lu yó kem hohon ye. Yó nmou bélê ye, hekgisu yu lómón kekgis safì tudu hmanga bala tók ne kmasingen tembaga futì anì gbek ye lemusok mdà kul yó kem benwu hmohon kuy. Omin ye yó mit du ebéléu yóm kdê kendengen deng tehe negef le mò blay ye do, blay ye ebè yóm Dwata kmamal yóm klamangen benwu.”

Sikaraya 9:13

Yóm benwu Juda, lómón ke bohohu. Yó hanaku, duhen Israél ne yó sudengu, duhen Jirusalim. Lu se hesfatayu ebè yó kem tau Grik.”