Mika 4:1 - Udél Dwata: Gna Kesfasad ne Lomi Kesfasad

¹ Bè yó kem hol són kdaw, angat tey tótól bè klamangen benwu yóm bulul gónón nô yóm Gónô Dwata. Bè yó gónó le tmaba Dwata yó kem tau bè klamangen benwu.

Mika 4:1 Referans Kwoze

Jirimaya 3:17

Bè yóm kdaw yó, yó angat boluy Jirusalim, Gónón Myón Kmamal Dwata. Ne angat le gotu stifun bè yó yóm kdéen but tau bè klamangen benwu mò gónó le hegfan du yóm kadat le dou. Là bud lolò le du ne yó kem sidek tehe gel nmò le lemwót bè yóm kgel kulu le.

Kem Lingón 22:27

Angat gtulón nawa le Dwata yóm kdéen tau bè klamangen benwu. Gotu le semfulék ebéléen yó kem tau lemwót bè ket benwu talak tonok, Kdéen kay but tau talak tonok, gotu le tmaba ebéléen.

Sikaraya 8:3

Ne ni bud udél Dwata, monen, Angate semfulék ebè Bulul Sayun, angate nô bè Jirusalim. Ominen yó angat taba le yóm Jirusalim, Syudad Teneb. Ne yó angat taba le yóm kun bulul yóm Dwata laen dù là gbeken du, Bulul Dwata.

Kem Lingón 86:9

Kdéen tau bè yó kem benwu deng nmoem, angat le gotu mógów ebéléem, ne heglaan le bè soluhem, Dwata. Angat dóyón le yóm kegetahen ne yóm klaen dù belen yóm kóm boluy.

Kul Nmò 2:17

‘Sok móyónen kól yóm hol són kdaw, mon Dwata, ni se angat nmou. Angat suu bè kdéen tau yóm dou Tulus. Yó kem ngà ye logi ne kem ngà ye libun, angat tugod le yóm dou udél. Ne yó kem logi lomi lemnok, angat wen gel htonu kul. Ne yó kem tuha logi, angat wen gel heknahu kul.

Husiya 3:5

Okóm kogolen bè yó angat le bud semfulék ebè yóm sana kul Dwata hol gónó mogot yó kem tau Israél. Bud le semfulék ebè yóm tau sfu Dabid mò mogot kul. Lemwót bè yóm tey klikò le ke Dwata, angat tódô setbol kkel le bè yóm bud kesfulék le ebéléen, bede angat guta le yó kem hyu angat tóbóngen kul elem hulin kdaw.

Malakay 1:11

“Okóm yó kem tólóng tau bè dumu benwu, tódô lenwóten bè yó kem benwu fi dmata kdaw kól bè yó kem benwu fi desdef, tey kadat le du yóm dou boluy. Tódô keten benwu wen gel hboo le ebéléu yóm alì tilob boohen ne dsù le ebéléu yóm dsù alì knóón béléu,” udél yóm Dwata laen dù là gbeken du.

Sikaraya 2:11

Bè yóm kdaw kkólu, angat tey dê tólóng tau lemwót bè dumu benwu mung do ne baling le mò dou tau. Nóe lem blóng ye ne bè yó gónó ye temngón du yóm khógówen do yóm Dwata laen dù là gbeken du.

Isaya 54:2

Hol bud tnugodem he yóm gónóem anì lamang ne hol hbegelem heheken.

Deng Hegfan 20:4

Ominu yó bud mton yó kem bangkù gónó le myón yó kem tau benlay le glal kmukum. Bud tonu se lóyóf yó kem tau deng tehe hnatay le lan le tmulón yóm ktahuhen tehe tolok Jisas, ne lan le tmolok Udél Dwata. Ni kem tau ni, là kô hentahu le du yóm lóbô tanay sut. Dalang se yóm lennged hmoen, là kô hentahu le du. Ne là se henmóyô le du yóm kun ilô yóm lóbô, yóm gel nmò le lem uyó le duhen ke te henmù le. Ni kem tau tehe hnatay le ni, gotu le bud mowil, ne gotu le mung kmamal bè Krays bè yóm lemibu halay.

Deng Hegfan 11:15

Ominen mféw yóm ghitu yó kem hógów Dwata, sen-gengu se mungol yóm tey udél gu bè longit, mon le, “Deng hto ne yóm kul kdaw mogot klamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.”

Hibru 1:2

Okóm tólóng ni kmoen ni. Yóm kudél Dwata ebélê tekuy, deng hlanen bè yóm Ngaen. Yóm Ngaen yó, du se yóm deng fen hedlimunen yóm kentihen, ne deng néléken mò angat mfun du snéen.

Danyél 7:27

Ominen yó lemwót yóm Dwata Hol Geta, gotu hogoten yó kem kun tau yóm kdéen benwu talak tonok, benlayen lu kegbek mung du yóm tey kegeta le. Laen kô dù sónen yóm kogot le benwu ne tey kimón le kul yó kem genlal mogot benwu dini talak tonok.”

Danyél 2:44

Bè yóm igò le tolo mogot benwu yó kem tau hol geta monu yó koni, yó nmò yóm Dwata nô bè longit, hetfingen yóm kun kogot tau ne laen dù gembek sembeweg du yóm kun kogot efet kól bè sónen ne laen se dù tau tles mogot du. Okóm yóm tau mogot yóm benwu yó, angat tódô gotu msulék genlaen yóm kul nogot, nmoen són le. Okóm yóm kun nogot, laen kô dù nan e són.

Isaya 49:6

Bud mon Dwata mò dou, “Uu yóm mò tóbóng lówóhu, ni wen tey bong sigangu tahem mkay senta yóm gnan. Là són du yóm bud kulék kegeta yó kem dù tau Israél yóm hmou kóm, okóm nmou uu layag bè yóm kdéen tau bè klamangen benwu anì wen lan le gewà.”

Deng Hegfan 15:4

Uu se yóm kum gónó mogot, laen kô dù tau ke là knikò le kóm, duhen ke là dóyón le kóm. Tek sónen uu yóm laen dù belenen. Angat le gotu mógów ebéléem yó kem tau bè klamangen benwu na le e dóyón uu, abay se deng gotu gfan bè kdéen tau ne yóm tey ktedengen yóm kóm nmò.”

Mika 3:12

Duhen yó, lemwót bélê ye angat gónó le dmadu du yóm Bulul Sayun, hol lómón kmò le du ke tonok gónó mò hulu. Ne yóm Jirusalim, sulék genbà le. Ne yóm bulul gónón mdà yóm Gónô Dwata, tódô baling bulul hono dlag.

Danyél 7:18

Okóm bè hol sónen, yó nmò yóm Hol Geta, gotu blayen ebè yó kem kun tau yóm klamangen yóm nogot le ne laen kô dù sónen yóm kogot le du.”

Danyél 7:14

Yó nmò yóm Tuha yó, benlayen kwalis ne tey kehegetahen du, mung du yóm kfasang mogot klamangen benwu anì tódô kdéen tau, balù kihu but ktau le, balù kihu benwu le, balù kihu udél le, gotu mimón du. Yóm kkamalen benwu, laen kô dù nan e són ne là kóen gbà yóm kogoten tau.

Danyél 2:35

Lemwót bè yóm gotu klusok yóm hólól tihen, tódô msulék tbó se lówóhen, tódô gotu sulék lemusok kdéen. Yóm bala tók ne tonok miket ne tembaga ne blówón bukay ne tahu blówón nô bè yóm lennged yó, gotu lemusok lómón kafa halay bè gónó kmusu, tódô gotu mung holis bè lenos, balù udì ke wen bud tebel du. Okóm yóm botu tódô te hólól tihen yó, deng mom baling bulul alì geta, tódô lenngeben klamang benwu kbongen.

Danyél 2:28

Okóm wen Dwata nô bè longit hulung hegfan du yóm gebnos ne mlan bè knahem gónón hegfan du béléem, yóm msut elem hulin kdaw. Ne ni, tulónu kóm yóm knahem ne yóm deng hton Dwata kóm bè yóm igoem hlilil bè gónóm tungô.

Isaya 43:6

Angat dóku yó kem benwu fi debwak anì hulék le lu. Senged se yó kem benwu tofi leged anì là nali le kul. Angat dóku yó kem tau bè benwu mayuk anì hulék le lu yó kem dou tau lemwót le gu bè kdéen benwu talak tonok.

Kem Lingón 110:3

Bè yóm kdaw angat kwitem sgida, wen tey óyô le tmóbóng kóm yó kem tauhem. Yó kem ngà logi sendaluem alì mólós nes le, angat le sut béléem ket hlafus, hol lómón kmò le, lómón ke amù gel sut hlafus.

Tekang Kbuten 49:10

Yóm tuged gel nogot yóm tau hol geta mò ilô yóm kfasangen mogot tau, là kóen lana bè kun ból Juda efet kól yóm sotu sfuhen hol mfun du mogot yóm klamangen. Bè yóm kkólen, gotu nimón yó kem tau bè klamangen benwu.

Tekang Kbuten 49:1

Timbow deng kudél Jakub ebè Jusif, ominen gotu htaba yó kem ngaen logi, monen mò kul, “Sbung ye e klohoku, eles tulónu kuy yóm angat kmò ye elem hulin kdaw.

2 Pitér 3:3

Ni hol tanay hegtulónu bè nawa ye. Ke móyón moni yóm hol són kdaw, wen tau sut lem blóng ye són lolò le kul knóyô lówó. Hnowon le yu,

Danyél 10:14

Ni nógówu edini naw e tulón kóm yóm angat sut bè yó kem dumuhem tau Israél e lem hulin kdaw, abay se gbak e lem hulin kdaw yó kem hton Dwata kóm ni.”

Danyél 7:22

efet kkólen bè yó yóm Tuha Laen Dù Buten nan e kmukum lem blóng le. Bè yóm kkukumen kul, nfihen yó kem kun tau yóm Dwata hol dandónen geta. Ominen yó he sut yóm kdaw khogoten du kul yóm klamangen benwu.

Kem Lingón 48:1

Tey geta yóm Dwata, knóón hol sendóyón bè yóm kun syudad yóm Dwata tekuy ta yóm kun bulul.

Jirimaya 26:18

“Bè yóm kdaw tehe kogot Hisikaya yóm benwu Juda, wen sotu tugod Dwata boluyen Mika lemwót bè Murisit. Wen tulónen yó kem tau bè Juda, monen, ‘Ni se udél yóm Dwata laen dù là gbeken du, monen, yóm Bulul Sayun, angat dnadu le hol lómón kdadu le yóm tonok gónó le gel mò hulu. Ne yóm syudad Jirusalim, angat gotu gbà. Yóm tfusù bulul gónón mteg yóm Gónô Dwata nim kmoen ni, angat baling dlag.’

Jirimaya 31:12

Angat le semfulék ebè benwu le ne tey kehligal le semngal ta yóm bulul bè Jirusalim gónó le tmaba ebéléu. Tey kehligal le lemwót bè yó kem deng basahu kul. Wen halay ne tifas grép le ne hnolo ulib ne wen tey ngà ubiha le ne kem ngà safì le. Yóm kmò klowil le hol mkél bè yóm tonok tendo wen élen. Laen kô dù bud gónó le élél. Ne laen dù bud knangag le.

Sikaraya 14:10

Yóm klamangen tonok lenwóten bè Giba fi bwak Juda efet kól bè Rimun fi leged Jirusalim, angat gotu sendatalen. Okóm yóm syudad Jirusalim, sana kdaen bè yóm kun gónó mdà malù geta. Yó klamangen, lenwóten bè Tikeb Bindyamin efet kól ditu bè yóm tehe gna tikeb ne efet kól ditu bè Tikeb Sokok ne bud lenwóten bè Gónô Tahà Hananél efet kól ditu bè gónó le gel mò tifas grép bè gónô yóm tau hol geta.