Mika 2:12 - Udél Dwata: Gna Kesfasad ne Lomi Kesfasad

¹² Yó bud udél Dwata ebélê le, monen mò kul, “Okóm yu kem dù tebel bè yó kem tau Israél, hulin kdaw gotu bud sentifunu yu. Gotu bud nwitu yu semfulék lómón yó kem ubiha bud mulék ebè yóm hol kul gónó nô ne lómón yó kem ógóf bud mótób bè yóm hol kul gónó mótób. Yóm benwu ye, angat tey bud genged tauhen.”

Mika 2:12 Referans Kwoze

Isikél 36:37

Yó bud udél yóm sana Dwata hol dandónen geta, monen, Hyu béléu ke bud wen sotu hni le béléu yó kem tau Israél, duhen yóm kehwenu ból le lómón kwen yó kem tehe ubiha le.

Mika 7:18

Laen kô dù dumu Dwata mkél kóm. Uu se yóm Dwata hmifót salà yó kem dù tauhem mowil. Sal gel wen sónen yóm kebutem tau, abay se yó hol nô bè nawahem yóm kkoduhem kul.

Mika 5:7

Ominen lemwót yó kem dù mowil bè yó kem tau Israél menwu lem blóng yó kem tólóng benwu, hol lómón kmò le ke amù hwit Dwata ebè yó kem dumu tau, duhen ke kulón mò hméfê bnes. Són Dwata snalig le, là kô le smalig bè tau.

Amus 1:12

Yó gónóm mon angat wen tey ofi hwitu ebè syudad Timan ne gotu kenen yóm gónó gel heklung bè syudad Busra.”

Husiya 1:11

Ominen yó angat baling sotu benwu le yó kem tau bè benwu Juda ne yó kem tau bè benwu Israél ne sotu se tau nélék le mò mogot kul. Ne angat tey kból le ta yóm kul tonok. Ne angat tey kehligal bong bè yóm kdaw yó, yó se kun kdaw Jisriil.”

Isikél 37:21

Tulónem kul yóm udél yóm sana Dwata hol dandónen geta, yó monu, Gotu bud sentifunu lu yó kem tau Israél deng nô bè yó kem tólóng benwu. Bud nwitu lu mulék gu bè yó kem benwu deng gónó le e sekla, nwitu lu mulék ebè yóm hol kul benwu.

Isikél 34:31

Yu se yó kem dou ubiha, yóm tendo gel hótóbu. Hol yu se yó kem dou tau ne ou se yóm kuy Dwata, udél yóm sana Dwata hol dandónen geta.” Là gomongen bè nili yóm tsaptér 35. Yó tulónen bè yóm tsaptér ni yóm ktafak Dwata yóm benwu Idom.

Isikél 34:22

Yó gónóm mon, ou ne angat lemwà kul yó kem dou ubiha anì laen dù bud tau hemsidek kul. Ne gotu knukumu lu yóm ket kul na sotu yóm kdê ubihahu.

Isikél 34:11

“Ni se bud udél yóm sana Dwata hol dandónen geta, monen, Tódô ou ne angat mebel kul yó kem dou ubiha efet gotu tonu lu.

Jirimaya 23:3

Okóm yó angat nmou bè yó kem dou tau, gotu bud sentifunu lu yó kem dù tebel bè yó kem benwu deng tehe gónóhu e semkla kul. Gotu bud nwitu lu semfulék ebè yóm tehe kul benwu ne angat tey bud kból le bè yó.

Jirimaya 3:18

Bè yóm kdaw yó, angat le slomong mulék yó kem tau tehe lemwót bè Juda ne yó kem tau tehe lemwót bè Israél, mulék le gu bè yóm benwu fi bwak tehe gónó le e megef kul. Gotu le mulék edini eta yóm tonok tehe fasadu yó kem fù le ekni mò hlós nfun le.

Tekang Kbuten 36:33

Tikóng matay Bila, yó bud tles hol geta, duhen Jubab ngà Sira yóm tau lemwót bè Busra.

Mika 2:13

Angat hennas Dwata yóm lanen mit kul hewà gu bè yó kem benwu gónó le tehe e megef kul. Angat nwiten lu hewà gu bè yóm bak tikeb yóm syudad yó anì mulék le ebè yóm hol kul benwu. Yóm geta bélê le, duhen yóm sana Dwata hol gónó mogot, du se yóm tukô gna kul.

Mika 4:8

Ne uu Jirusalim, yóm benwu gónó Dwata tendo mentey yó kem kun tau, angat bud mulék ebéléem yóm tehe któtólem ne yóm tehe kfasangem. Ne bud uu se hol yê yó kem syudadem ne béléem gónón nô yóm tau mogot yó kem dou tau.

Mika 5:8

Yó kem dù mowil bè yó kem tau Israél menwu lem blóng yó kem tólóng benwu tey kekgis le, lómón kgis yóm liyun senta yó kem dumu ógóf nô lem dlag, tódô sut bè yóm gónó le mótób yó kem ubiha tódô kemfô bélê le, ominen msék kul ne laen kô dù gembek semkot du béléen.

Isikél 34:13

Angat bud nwahu lu gu bè yó kem tólóng benwu gónó le nô ne gotu sentifunu lu ne bud nwitu lu semfulék ebè yóm hol kul benwu bè Israél. Hótóbu lu bè yó kem bulul bè Israél ne bè yó kem kilil él gónó le gel nô yó kem tau.

Sifanaya 3:20

Bè yóm kdaw yó, angat sentifunu yu ne bud nitu yu semfulék ebè yóm sana kuy benwu. Htótólu yu bè klamang benwu talak tonok ne ya tey kdóyón le kuy bè yóm bud khuléku du ebélê ye yóm tey kehyu klowil ye. Angat hol kuy mata se mton du nim ni. Ou se Dwata nim mudél ni.”