Matyu 9:4 - Udél Dwata: Gna Kesfasad ne Lomi Kesfasad

⁴ Tódô tngón Jisas yóm nô lem hendem le, yó gónón mon du mò kul, “Moen de ke sidek kmò kehedem ye ebéléu?

Matyu 9:4 Referans Kwoze

Kun Snulat Luk 6:8

Okóm deng eles tngón Jisas ne yóm nô lem hendem le, ewenem yó tódô monen mò yóm tau deng kimoy sigelen, “Ó Wè, mógówi edini kun béléu.” Tahu se, mógów ebè Jisas yóm tau yó.

Matyu 12:25

Tódô tngón Jisas yóm nô lem hendem le, ne yó gónón mon du mò kul, “Yóm benwu tendo mesgólól nawa tauhen, ne ke sónmò le sfatay, angat meglà. Balù yóm sotu gmónô, ke là ssotu nawa le, ne ke sónmò le sfatay, angat le tódô seglef.

Deng Hegfan 2:23

Tódô gotu hnatayu snéen yó kem tau gel lemolò du. Yó gónóhu mò du yóm yó anì tngón kdéen tau hemtahu béléu yóm klaen dù gebnos béléu, gotu tngónu yóm nô lem hendem le ne yóm dê tô hendeen le. Angat blayu kuy yóm mò balà yóm kuy deng gel nmò, yóm ket kuy na sotu.

Kun Snulat Jan 16:30

Ni ne,” mon le, “deng tngón me laen dù là tngónem du, abay se deng tódô eles tngónem yóm tô snólók me. Ni se gónó me hemtahu du yóm kewótem gu bè Dwata.”

Kun Snulat Luk 11:17

Okóm tódô tngón Jisas yóm nô lem hendem le, ne yó gónón mon du mò kul, “Yóm benwu tendo mesgólól nawa tauhen, ne ke sónmò le sfatay, angat meglà. Balù yó hem sotu gmónô, ke là ssotu nawa le, angat le tódô seglef.

Kem Lingón 139:2

Deng gotu tngónem yóm kdê nmou, ne yó kem angat hendemu, deng eles tngónem.

Kem Lingón 44:21

kaem deng tngón Dwata ne, yakà gotu tngónen du yóm kdê nô lem but blutut tau.

Kul Nmò 5:9

Ne omin Pitér bud mon du ebéléen, monen, “Tey, mò ye mom semtilów temdek du du yóm Tulus Dwata? Yó dé lu yó kem tau lembeng ke tuha logihem koni, ne ni uu bud tmufì du.”

Kun Snulat Jan 16:19

Okóm tódô tngón Jisas yóm tô snólók le béléen, yó gónón mon du mò kul, “Yó kô sentulón ye yóm monu yó koni, ‘Là buden legen ne yóm kton ye do, okóm là legenen bud ton ye o’?

Kun Snulat Jan 6:64

Okóm wen se bélê ye là hemtahu du.” (Yó gónó Jisas mon du yóm yó, abay se deng eles tódô tngónen lemwót bè kbuten yó kem tau là hemtahuhen, ne eles tngónen se yóm tau angat matul du anì gekfô yó kem hmohon du.)

Kun Snulat Jan 6:61

Bede tódô tngón Jisas yóm keslón le, yó gónón mon du mò kul, “Sidek kegnóm ye du kô lemwót bè nim toloku ni?

Kun Snulat Jan 21:17

Bud mon Jisas mò ke Pitér bè getluhen dulék, monen, “Ó Simun, ngà Jan, bong nawahem dou kô?” Tô muni nawa Pitér abay se deng tlu dulék Jisas smólók du. Ne mon Simun se kun, “Tódô gotu tngónem se yóm kdéen, Sér. Tngónem se yóm kbong nawahu kóm.” Bud mon Jisas se, “Sen-gyokem dou sen ubihahu.

Kun Snulat Luk 5:22

Tódô tngón Jisas yóm nô lem hendem le, yó gónón mon du mò kul, “Moen de ke lómón yó yóm kehedem ye ebéléu?

Mark 12:15

Okóm tódô tngón Jisas yóm tô atul le yó kem tau yó, ne yó monen mò kul, “Moen de ke tô hnolot ye ou? Mit ye dou edini kun filak mgel na tenngel.”

Mark 2:8

Tódô tngón Jisas yóm nô lem hendem le, yó gónón mon du mò kul, “Moen de ke lómón yó kmò kehedem ye?

Kun Snulat Luk 7:40

Ne tódô hebkó mudél ebéléen se Jisas, monen, “Ó Wè Simun, wen tô tulónu kóm.” Ne mon Simun se, “Tulónem dou sen, Sér.”