Matyu 9:16 - Udél Dwata: Gna Kesfasad ne Lomi Kesfasad

¹⁶ Ne wen bud tulón Jisas kul bè yóm là kehyu sembool du yóm kun tolok bè yóm tolok gna, bede bud hningónen, monen, “Laen kô dù tau se ke namà kenséen yóm nes lomi mò klefengen yóm kgal bolok. Ke yó tô nmoen, ngem ke kemsong yóm nes lomi, tódô ksê yóm kgal bolok.

Matyu 9:16 Referans Kwoze

Kun Snulat Jan 16:12

Tey dê he tô nóyô tulónu kuy,” mon Jisas, “okóm là dog tulónu du ne, déke mom temnù yóm ksidek kegnóm ye du.

1 Kurin 13:13

Duhen ni, wen tlu yóm laen dù mtukul sónen, duhen yóm kehtahu tekuy bè Dwata, ne yóm hendón tekuy béléen, ne yóm kesbong tekuy nawa. Ne bè nim tlu ni, yó alì bong muhen, duhen yóm kesbong tekuy nawa.

Kem Lingón 125:3

Yó kem tau gel mò sidek, là kô senflós le du kmamal du yóm kul benwu yó kem tau tedeng. Ke yó nmò le, déke gbót le mò sidek se kul yó kem tau tedeng nmò le.

Isaya 40:11

Tey hyu yóm angat kesegyoken kul, lómón yóm tau hyu kesegyoken yó kem ubihahen. Gel sentifunen yó kem ngà ubihahen ne gel sniwihen lu. Ne hen-ganagen malak yó kem yê le.

Tekang Kbuten 33:14

Gnahi kum ne,” mon Jakub, “hganag me huli he. Tódô tógón me bè kganag kógów yó kem ógóf ne yó kem ngà efet gafitu uu bè Idom.”

Matyu 9:15

Ne bnalà Jisas lu, bede hningónen, monen, “Ke wen mò ken, là gbek le du ke là gbót le mken yó kem tau hol bak mulu yóm igoen tolo nô bélê le yóm logi myehen. Okóm angat wen kdawen tódô kwa le du bélê le yóm logi myehen. Yó he kton ye kul fasting.”

Matyu 9:17

Ne sotuhen, laen kô dù tau ke ilihen elem yóm sning kulit ógóf deng legen yóm tifas hanà lomi. Kmoen yóm tifas yó ke kmodok, ne mom btù yóm gónóhen e mili du, abay se lemtò bè yóm deng kkodoken. Ne gotu gamà yóm tifas, ne baling sidek yóm gónóhen nô. Yó dé kun yóm tifas ke hanà tolo lomi, ilihem bè yóm sning kulit ógóf hanà tolo lomi snéen. Ke yó se kmoem du, là kóen btù yóm sning kulit ne là se gamaen yóm tifas.”

Mark 2:21

Ne wen bud mon Jisas mò kul bè yóm là kehyu sembool du yóm kun tolok bè yóm tolok gna, bede bud hlanen bè hlingón, monen, “Laen kô dù tau ke klefengen bè yóm nes bolok yóm nes hanà lomi. Ke yó nmoen, ngem ke kemsong yóm nes lomi, ten-geeden heksê yóm nes bolok.

2 Kurin 9:12

Là són yó du gónón hyu yóm keblay ye ke mò tmóbóng yó kem tau Dwata. Okóm sotu gónón hyu, angat tey dê tau hol dmóyón ke Dwata.

Kun Snulat Luk 5:36

Ne wen bud tulón Jisas kul bè yóm là kehyu sembool du yóm kun tolok bè yóm tolok gna, bede bud hningónen, monen, “Laen kô dù tau se ke namà kenséen yóm nes lomi mò klefengen bè yóm nes bolok. Ke yó tô nmoen, ten-geeden mamà yóm nes lomi, blaem là kóen seklóón ebè yóm nes bolok.