Matyu 8:15 - Udél Dwata: Gna Kesfasad ne Lomi Kesfasad

¹⁵ Omin Jisas na a mogot bè sigelen, ne tódô sen-gengen se mkó yóm tey des kinien. Ominen hlingas btik, ne tódô kendel mò ken bè le Jisas.

Matyu 8:15 Referans Kwoze

2 Bok Kem Tau Hol Geta 13:21

Sotu kdaw bè yó, yóm igò le lembeng yó kem tau Israél, ton le yóm sotu lumbuk gel hmékét bè lan yó. Uni le mton kul, tódô bot le yóm lówó yóm tau lebeng le elem yóm kilib gónó le tehe lembeng ke Ilaysa. Bè yóm kegdeken bè yó kem tiol Ilaysa yóm lówó tau matay bot le yó, tódô bud mowil ne mdà.

Kun Snulat Luk 8:54

Tikóng kól klohok yóm ngà matay Jisas, ominen mogot bè sigelen, ne tnabahen, monen, “Ó Bun, btiki ne.”

Mark 1:41

Tey kkodu Jisas du yóm tau yó, tódô nan e nenok, monen, “Móyóe tmóbóng kóm. Hol mkó he yóm desem.”

Matyu 20:34

Ya tey kkodu Jisas kul yó kem tau yó, ominen mnok bè mata le. Tódô sen-gengen se yóm bud kton le, ne tódô henmung lolò le Jisas.

Matyu 14:36

Henkodu le béléen baluen ke olo le gemdù kilil nesen yó kem tau gemnóm des. Tahu se, tódô kdéen tau gotu mdù nesen, tódô le gotu bud hyu.

Matyu 9:29

Omin Jisas mnok bè mata le, monen, “Yó ne, guta ye balaen ne yóm deng kehtahu ye yó.”

Matyu 9:20

Yóm igò le mógów mulit lan, wen sotu libun gemnóm des tenbalung mógów huli ke Jisas, ten-gafit nduen nesen. Abay se deng sfolò lewu halayen kegenen gemnóm du yóm desen.

Matyu 8:3

Tahu se, na e nenok Jisas yóm tau yó, monen, “Móyóe tmóbóng kóm. Mkó ne desem.” Ne tahu se, tódô sen-gengen se mkó béléen yóm des mifù yóm tau yó.

Isaya 6:7

Lemwót yóm bala ofi nwiten, duen bè sumóngu ne yó udélen ebéléu, monen, “Lemwót bè yóm kduu bè sumóngem ni deng mkó tahem ne yóm hen-gselem yó. Ne deng gotu hnifót Dwata ne yó kem salaem.”

Matyu 8:14

Kewót Jisas bè yó, hlós ebè gónô Pitér. Kól bè yó, tódô glohen tuón Pitér libun gemnóm des kinì là lembó.

Matyu 8:16

Timbow deng sdef kdaw, tey dê tau lengel mata nwit le ebè Jisas. Hanà tek olo udél Jisas ebélê le deng le sana gotu mdó yó kem tulus seitan malak kul. Kkólen bè yó kem des yó kem dumu tau, gotu hkó Jisas.

Mark 1:29

Timbow le hewà gu lem gónó le gel stifun yó kem Ju le Jisas, tódô le hlós ebè gónô le Simun lewu le Andru, mung kul Jim ne Jan.