Matyu 7:21 - Udél Dwata: Gna Kesfasad ne Lomi Kesfasad

²¹ “Là kô kdéen du yó kem tau mon du ou yóm gónó le mogot, angat gmung bè yó kem tau nogot Dwata,” mon Jisas. “Tek són olo gmung yó kem tau mimón yóm kun kóyô yóm Mà bè longit.

Matyu 7:21 Referans Kwoze

Sulat Pol Ebè Yó Kem Tau Hemtahu Bè Rom 2:13

Là kô bè ketngón tau yóm hlau gónón tedeng kton Dwata kul, okóm bè kimón le du gónón tedeng ktonen kul.

Kun Snulat Luk 6:46

Ne sotu bud tulón Jisas kul, monen, “Moen de ke gel mon ye ou yóm gónó ye mogot okóm là kô gel nimón ye do?

Sulat Jim 1:22

Bê ye abay olo hmungol du yóm Udél Dwata, yake hol nimón ye. Kesok là nimón ye du olo ye tmondo knô ye.

Kun Snulat Luk 11:28

Okóm yó mom balà Jisas du, monen, “Milud he kehligalen yóm tau ke hnungolen yóm udél Dwata, ne nimónen.”

Taytus 1:16

Ya mo kmon le du tngón le Dwata, okóm tódô dilóem bè yóm nmò le yóm là ktahuhen. Kem tau alì sidek nmò le, ne là hdon le. Là kô gbek le mò du yóm hyu.

Hibru 4:6

Yó kem tau tanay hmungol du yóm Tulón Hyu, là kô guta le du yóm monen yó, abay se monem, là kô le hemtahu. Yó gónóm mon, angat wen he kem dumu tau heflós Dwata edu.

Kun Snulat Jan 6:40

Yó hol kóyô Mà ke benlayen klowil laen dù sónen yó kem tau dmilô yóm kun Ngà ne hemtahu béléen. Ne yó angat nmou bélê le, gotu hlowilu lu sok kól yóm hol són kdaw.”

Deng Hegfan 3:5

Yó kem tau gel matù bè yó kem sidek gel sut, angat benlayu lu nes bukay, ne là kô kóhu du yóm kul boluy bè yóm bok lowil. Ne bè yó bè solu Mà ne yó kem gel hógówen gu bè longit gónóhu tmulón du yóm deng kfunu kul.

1 Pitér 4:2

Yó gónóm mon, lenwóten ni ne efet kukol towok ye, yake hol nô bè nawa ye mò du yóm kun kóyô bélê ye Dwata. Bê ye abay bud nmung yó kem sidek knóyô lówó tau.

Matyu 12:50

Abay se yóm tau mimón yóm kun kóyô Mà bè longit, hol lómón ke twolihu ne libunu ne yéu.”

Deng Hegfan 22:14

Bong kehligal le kul yó kem tau deng eles nfuk le yó kem nes le efet deng mólós anì wen kwalis le ghusek bè bak tikeb yóm syudad yó, ne wen kwalis le snéen mken du yóm bungu yóm koyu hlowil tau.

Kun Snulat Jan 3:5

Bud bnalà Jisas se, monen, “Tódô tulónu kóm ktahuhen, là kóen gmung bè yó kem tau nogot Dwata ke là nan na mlan bè él ne bè yóm Tulus Dwata.

Matyu 18:3

monen, “Ngem nim ngà nii, là kô ktesen du yóm kegetahen. Tódô tulónu kuy ktahuhen,” mon Jisas, “ke là tenles ye du yóm kuy kehedem lómón yóm kun kehedem nim ngà ni, là kô ye na a gmung bè kogot Dwata tau.

Kun Snulat Jan 7:17

Yó se tau móyô mimón yóm kun kóyô Dwata,” monen, “dilóen ke lemwót bè Dwata nim toloku ni duhen ke tódô lenbuu.

Sulat Pol Ebè Yó Kem Tau Hemtahu Bè Rom 12:2

Bê ye abay lolò kul kmò yó kem tau là hemtahu le lem nim benwu ni. Hesfili ye ke Dwata yóm kehedem ye anì gtukul ye ke tedu yóm kun kóyô bélê ye, ne ke tedu yóm hyu ne yóm tedeng ne yóm mò gónón hligal.

Mark 3:35

Yó se mimón yóm kun kóyô Dwata, yó se hol twolihu ne libunu ne yéu.”

1 Tisalunika 5:18

Kihu mefet bélê ye, hyu duhen ke là hyuhen, senged nóm kdóyón ye ke Dwata. Yó se yóm hol kun kóyô bélê ye Dwata bè yóm deng kessotu ye bè Krays Jisas.

Ifisus 6:6

Bê ye olo hton du ta ke wen nmò ye mò tô gónó le dmóyón kuy. Okóm hol hewót ye lem but blutut ye yóm kmò ye du yóm kun kóyô Dwata, yakà tau ye klifen bè Krays.

1 Pitér 2:15

Yó kóyô Dwata ke lemwót bè yóm kehyu kmò ye gónón laen dù bud udél le eta ye yó kem tau là hulungen hedem, yó kem tau tódô gemsanil kuy hkawang.

Matyu 25:21

Ne monen se mò du yóm gónóhen mogot, ‘Wóyón dé. Tey hyu nim uu, teyi gulit. Lemwót bè yóm kgulitem bè yóm udì hogotu kóm, bong ne sigangu tahem. Yó ne, holi mung dou dé anì gmungi lemen yóm dou kligal.’

1 Tisalunika 4:3

Yó hol kun kóyô Dwata bélê ye ke hol ye mólós ne ke laen dù bélê ye fen mò samuk.

Kulasi 4:12

Tey gel kólóm Ipafras kuy snéen kun sotu tau lemwót dyó bélê ye, yóm sotu tóbóng lówó Krays Jisas. Tey gel knihen bélê ye bè Dwata anì hol hbegelen yóm kehtahu ye, ne anì hol gtukul ye yóm kun kóyô bélê ye Dwata ne anì hol gulit klolò ye du.

Kun Snulat Luk 13:25

Abay se angat nseng yóm fun gónô yóm bak dólen. Angat tey ktaba ye doli beng, angat mon ye, ‘Lenungkaem kum dé, Sér, nim seng bak dólem nii.’ Ne yó mom angat balaen kuy yóm fun gónô, monen, ‘Là kô tngónu du gónó ye gu lemwót.’

Kul Nmò 14:22

Ten-gel le nawa yó kem tau hemtahu, ne tey kegduf le kul anì là gkó le du yóm deng ksalig le ke Jisas. Yó mon le, “Nan dê he mgel glan tekuy ke tô tekuy gmung bè yóm kogot Dwata tau.”

Kun Snulat Luk 18:25

Mom mahil bè yóm kamél he ke hfusek tekuy bè sol dalum, olo ke yóm tau wen kendengenen, tey mgel béléen ke tô hogoten ke Dwata klowilen.”

Matyu 19:24

Bud nulitu bélê ye. Tey mgel bè yóm tau wen kendengenen ke tô hogoten ke Dwata klowilen. Mom mahil he yóm kamél ke hfusek te bè yóm sol dalum.”

Matyu 18:35

Bud mon Jisas, “Lómón sem ni ne angat nmò Mà bè longit bélê ye ket kuy ne sotu ke là tahu hnifót ye yó kem dumu ye gemsalà bélê ye.”

Kun Snulat Jan 15:23

Yóm tau kmutó nawa dou, knutó nawahen Mà snéen.

Matyu 26:42

Bud kewót Jisas bè yó bè gewuhen dulék, ne bud mni bè Dwata. Yó utóm yóm knihen, monen, “Ó Mà, ke là se hyu mkó du béléu yóm angat tey hlayamu ni, tódô henlósem sen yóm kóm kóyô.”

Matyu 16:17

Mon Jisas se mò ke Pitér, “Tey hyu kóm Simun ngà Jan, abay se là lemwóten bè tau yóm kdilóem do, okóm tódô lemwót bè Mà bè longit.

Kun Snulat Jan 14:7

Lemwót bè yóm deng ketngón ye do,” monen, “angat tngón ye se Mà. Nbuten ni ne deng ketngón ye du ne deng ton ye.”

Kun Snulat Jan 5:17

Okóm yó balà Jisas kul, monen, “Yóm Mà, senflósen mò nmò, là kóen hegnô. Senged se dou, tódô senflósu mò nmò.”

Matyu 26:39

Ominen mógów hlayuk udì, ne tódô hegluduk lemfen bè tonok, ne mni bè Dwata, monen, “Ó Mà, ke yó dum gmò, kóhem tahu dé yóm angat tey hlayamu ni. Okóm balù wen se yóm dou kóyô, tódô hendengem yóm kóm kóyô béléu.”

Matyu 18:10

“Hyu ke béen abay wen hen-gnok ye bè ni kem ngà nii. Tódô tulónu kuy, eles wen yó kem hógów Dwata tendo gel nô bè Mà bè longit fen gel semgyok kul.

Matyu 18:19

Ni mò hol sù ye bè nawa ye. Anien ke tek lewu tau mni bè Dwata, ne deng ssotu nawa le mni du yóm hni le, tódô blay Mà bè longit kul yóm hni le béléen yó.

Matyu 25:10

Kogol yóm kewót le, kól se yóm logi myehen, ne tódô hlós ebè yóm gónô gónó le mò ken bè lówóhen, ne gmung yóm limu kem libun hulung hedem. Yóm kkól le bè yó, gotu le husek elemen, ne tnikeb le beng.