Matyu 6:20 - Udél Dwata: Gna Kesfasad ne Lomi Kesfasad

²⁰ Ni dé nmò ye, henyu ye bè longit dé yóm kendengen ye. Abay se ke ditu gónó ye hemyu du, laen kô dù kaba gembek hemsidek du, ne là kóen nkê fak, ne laen dù hemnagaw du.

Matyu 6:20 Referans Kwoze

Kun Snulat Luk 12:33

Hebli ye yó kem kimu ye, ne blay ye bè yó kem tau élél yóm blihen. Ke yó nmò ye, lómón ke deng wen filak henyu ye bè longit bè yóm gónó hemyu filak là buden sidek. Ke wen ten-ginof ye bè longit, là kô wen fen mtón du ne laen se dù mnagaw du ne laen se dù kaba hemsidek du.

Matyu 19:21

Bud bnalà Jisas se, monen, “Ke móyói hol gulit, tu ne muléki nam e hbalù kdê nô béléem, ne blayem bè tu kem élél yóm blihen. Ke yó nmoem, angat wen tey kendengenem bè longit. Ne lemwót yó dum kóm, loloem ou.”

Sulat Jim 2:5

Ni hol hnungol ye, kem dumuhu sogot nawa. Mom monem yó ne kem tau élél lem nim benwu ni yóm nélék Dwata mò baling mdengen bè kehtahu le, ne gmung le bè yó kem tau nogoten, yakà yó du yóm deng tehe fasaden bè yó kem tau kembong nawa du.

1 Timuti 6:19

Ke ni se nmò le, lómón ke deng wen kul ten-ginof eles henyu bè longit, anì duhe kóm, angat guta le yóm klowil hol tahu duhen.

Kun Snulat Luk 18:22

Timbow gungol Jisas nim monen ni, monen mò du, “Sotu he duen tolo gónóhem là deng sikof. Hbaluem yóm kdê nô béléem, ne blayem bè tu kem tau élél yóm blihen. Ke yó nmoem, angat wen tey kendengenem bè longit. Lemwót yó dum kóm, loloem o.”

Deng Hegfan 2:9

“Deng tngónu se yóm alì keglayam ye lemwót bè yóm klolò ye do. Ne tngónu se yóm tey kélél ye, okóm lemwót bè kehtahu ye, wen tey kendengen ye. Ne tngónu se yóm alì gel ksidek kbak le ebélê ye yó kem tau snalig le yóm ktau le Ju. Okóm sundu kem dou tau du yó kem tau yó, hono kem tau nfun Seitan.

Hibru 11:26

Hendemen mom hyu he kun ke henwog le lemwót bè yóm kehdónen yóm Misaya, yóm deng nélék Dwata mò hkamalen yóm klamangen, olo ke tô gfunen yóm tey kendengen bè Idyip. Deng eles hendemen ne kun yóm ofolen elem hulin kdaw lemwót bè Dwata.

1 Timuti 6:17

Hol hgefetem ebè yó kem tau wen kendengen le, bê le abay hton salù, ne bê le gentud nawa yóm kendengen le, abay se là tngón le du ke gfu. Dwata dé gentud nawa le, yakà béléen du gónón lemwót yóm kdéen, ne sal gel mtungan yóm blayen tekuy mò gónó tekuy hligal.

1 Pitér 1:4

Bud nangat tekuy snéen yóm tey hyu fan Dwata bè yó kem kun tau ditu bè longit. Laen kô dù hemsidek du yóm fanen tekuy yó, ne laen se kô dù belenen sidek, ne là se monolen yóm tey kehyuhen.

1 Pitér 5:4

Ne ke bud semfulék edini Jisas, yóm semgyok ubiha hol geta bè kdéen, wen tey ofol blayen kuy, yóm ofol là kóen monol yóm alì kehyuhen.

Isaya 33:6

Tey kehbegelen yóm kbenwu le ne tendo gel nofinen yó kem tauhen. Benlayen lu khulung hedem ne ketngón. Yó hol mebtes du yóm blayen kul, duhen yóm klikò le du.

Hibru 10:34

Ne gel ye gbót glayam bè yóm kegkukub yó kem dumu ye hemtahu. Balù yó kem tau mled kimu ye, là kóen sidek kehedem ye ebélê le, mom wen he yóm kuy kehligal, abay se deng tngón ye wen yóm tey kuy kimu alì hyu laen dù sónen ditu bè longit.

Matyu 6:19

Bê ye kat alì henyu te tonok yóm kendengen ye. Ke bè yó gónó ye hemyu du, gbek kaba hemsidek du, ne nkê fak snéen yó kem dumuhen, ne gbek tau mnagaw husek elemen.

Mark 10:21

Yóm ketngel Jisas ebéléen mom gkoduhen, monen mò du, “Sotu he duen tolo gónóhem là deng sikof. Tu ne muléki, nam e hbalù yóm kdê nô béléem, ne blayem bè tu kem tau élél yóm blihen, ne angat wen tey kendengenem bè longit. Lemwót yó dum kóm, loloem o.”