Matyu 5:7 - Udél Dwata: Gna Kesfasad ne Lomi Kesfasad

⁷ Tey kehyuhen bélê le kul yó kem tau ke hol knodu le kem dumu le, abay se angat bud knodu Dwata lu se kul.

Matyu 5:7 Referans Kwoze

Ifisus 4:32

Yó tles nmò ye dé yóm kehyu kmò ye ebè kem dumu ye, ne yóm keskodu ye. Hol ye gel mahil seflifót, lómón yóm tehe kehlifót Dwata yóm kuy salà hlanen bè Krays.

2 Samwél 22:26

Ó Dwata, teyi teneb bè yó kem tau teneb béléem, ne teyi hyu bè yó kem tau hyu ktonem du.

Kem Lingón 18:25

Ó Dwata, teyi teneb bè yó kem tau teneb béléem. Ne teyi hyu bè yó kem tau hyu ktonem kul.

Sulat Jim 2:13

Bè yóm angat kkukum Dwata tau, là kô nan e knodu du yóm tau tehe là knoduhen kem dumun. Okóm yóm tau tehe knoduhen kem dumuhen, laen dù knikoen bè yóm kdaw yó, abay se là kô tnafak Dwata du.

Sulat Jim 3:17

Okóm yóm tau ke lemwót bè Dwata yóm ketngónen, laen kô dù belenen. Gel nmoen yóm gónón menek bè kem dumuhen, lelen ganag nawahen ne wen khulungen mit swè. Tey gel knoduhen kem dumuhen ne lelen hyu kmoen ebélê le. Là kô ton tekuy du béléen yóm nawa kmihu ne laen se kô lafinen yóm nawahen.

Kulasi 3:12

Yu se yó kem tau Dwata, kem tau kenbong nawahen, kem tau deng néléken mò kun nfun. Duhen yó, hol dnalang ye yóm nawa skodu ne yóm nawa sbasa, ne yóm keheglaan ye bè kem dumu ye. Ne hol dnalang ye snéen yóm kganag nawa ne yóm khanay nawa.

Kun Snulat Luk 6:35

Okóm kuy du,” mon Jisas. “hol kenbong ye nawa yó kem hohon ye, hol henyu ye kmò ye ebélê le. Ke hutóng ye, bê ye bud snolò. Ke lómón se ni gel nmò ye, tey angat ofol ye, ne angat ngaen yu yóm Dwata alì geta bè kdéen. Abay se yóm Dwata, balù yó he kem tau laen dù nawa skodu bélê le ne yó kem tau sidek nmò le, ewenem sana tey kkoduhen kul.

Mika 6:8

Là kem tau, là kóen na a hligal du. Deng tulón Dwata tekuy yóm hyu béléen. Yó hol nóyóen bélê tekuy ke nmò tekuy yóm tedeng ne ke hol tekuy hulung kmodu ne ke hol tekuy heglaan béléen. Là gomongen bè nili yóm bérs 9 kól bè bérs 16. Yó tulónen bè ni kem bérs ni yóm gotu bud klista Dwata salà yó kem kun tau. Tey wen kendengen le mlan bè gel ksukat le dumu le tau. Gel le tmimbang lemugì ne là tódóen ke wen bentes le, gel gnaga nwa le kimu kem dumu le ne tey dê he dumu nmò le là hyuhen. Lemwót bè yóm nmò le yó, yó gónó Dwata eles tmulón du kul yóm angat ksulék keglaen kul dalang se yóm benwu le.

Kem Udél Hlalak Tehe Selumun 19:17

Yóm tau knoduhen yó kem tau élél lómón ke hendómen Dwata ne Dwata he hulék du yóm deng blayen.

Hibru 6:10

Tey tedeng knawahen yóm Dwata. Là kô klifóten du yóm hyu tehe gel nmò ye, ne yóm tey kbong nawa ye du. Yó gónón gfan yóm nawa ye ebéléen yó bè yóm gel któbóng ye yó kem dumu ye hemtahu. Balù ni kmoen ni, sana kmò ye du.

Danyél 4:27

Ó Nibukadnisar, ke yó dum hyu béléem, hol hnungolem ou. Hol tenflokem ne yóm kmoem sidek, tlesem du yóm nmò hyu. Knogolem ne yó kem salà gel nmoem, tlesem du yóm koduhem yó kem tau élél. Ke yó nmoem, déke hlós yóm kehyu klowilem.”

Hibru 4:16

Duhen yó, bê tekuy abay likò hloni ebè Dwata, yóm gónón hol nô yóm tóbóng. Ke hloni tekuy ebéléen, angat ton tekuy yóm tey kkoduhen tekuy ne yóm tey kun któbóng bè ket kehtóbóng tekuy béléen.

Kem Udél Hlalak Tehe Selumun 11:17

Mulék hyu knóen yóm tau hyu kmoen bè kem dumun, okóm yóm tau sidek baluhen hensideken knóen.

1 Pitér 2:10

Tehe yu ekni, là kô ye tau Dwata se kuy, okóm ni kmoen ni, deng ye baling kun tau ne. Tehe là tngón ye du yóm kkoduhen kuy, okóm ni kmoen ni deng tngón ye ne.

Mark 11:25

Bè yóm gel kni ye bè Dwata, ke tolo mokol nawa ye yóm salaen bélê ye yóm sotu tau, yake tódô hol hnifót ye. Ke yó se nmò ye, angat hnifót yóm Mà tekuy bè longit se yóm kuy salà.

Kem Udél Hlalak Tehe Selumun 14:21

Wen salaen yóm tau sendekaen yó kem dumun tau, okóm hligal yóm tau knoduhen yó kem tau élél.

Husiya 2:1

“Bè yóm kdaw yó, yó angat taba ye yó kem dumu ye setwoli logi Lo-ammi, ‘Dou tau.’ Ne yó angat taba ye yó kem dumu ye setwoli libun Lo-ruhama ‘Yó kem kenbong nawahu.’ ”

Kem Lingón 112:9

Là sgafas nawa le bemlay yó kem tau élél. Yóm kehyu nmò le laen kô dù tau kmifót du. Tey mbegel ktau le, ne tey kadat le du kem dumuhen.

Kem Lingón 112:4

Anien ke nô lem gónón kmifu yóm tau hyu kmoen, sal gel hlayag Dwata lanen. Hulung le bemlay ne hulung le kmodu, ne tedeng kmò le.

Kem Lingón 37:26

Yóm tau hyu kmoen yó, tey mahil béléen bemlay, ne là mgel mutóng béléen. Ne yó kem ngaen, tey le hulung tmóbóng se kul.

1 Timuti 1:13

Anam yó ne ekni, tey gel sidek kebkóhu ebéléen, ne gel hensideku yó kem gel lemolò du, ne tey gel kehnéu du. Ewenem yó, sana tey kkoduhen dou Dwata, abay se monem tolo là denge hemtahu he ekni, ne tódô óyóu gel mò kul yó kem tehe gel nmou.

1 Kurin 7:25

Bong bè yóm snólók ye bè yó kem tau là dengen myehen, laen dù hlau lemwót bè yóm gónó tekuy mogot ke gbak bè nim snólók ye ni. Okóm wen tulónu kuy lemwót bè yóm dou kmò kehedem du. Ne denge baling tau gsalig lemwót bè yóm kkoduhen dou yóm gónó tekuy mogot.

1 Timuti 1:16

okóm tey kkodu Dwata dou mò gónón hegfan du ebè yó kem dumu tau yóm hol kun kanay nawa Krays Jisas, igoen ou yóm tau alì gedlug kmoen salà. Yó gónó Krays Jisas mò du nim ni anì mgel nawa yó kem tau hemtahu béléen bè hulin kdaw, yó kem tau angat gmuta du yóm klowil laen dù sónen.

Husiya 2:23

Bè yóm kdaw yó, hol lómón ke huluhu lu yó kem tau Israél ta yóm dou tonok mò hol dou nfun. Yó kem tau tehe bnoluyu ‘Là kenbong nawa’ hol hegfanu bélê le yóm kbong nawahu kul. Ne yó kem tau tehe bnoluyu ‘Là dou tau du’ yó se angat monu mò kul, ‘Yu se kem dou tau.’ Ne yó se kul balà do, mon le, ‘Uu se yóm kum Dwata.’ ”

Husiya 1:6

Là legenen bè yó bud mlutut Gumér ne mngà libun. Ne yó mon Dwata mò ke Husiya, “Boluyem du Lo-ruhama yóm ngà sut yó abay se là bud knoduhu kul ne yó kem tau Israél ne là se kô hnifótu yó kem salà le.

2 Kurin 4:1

Lemwót bè yóm tey kodu Dwata kum, yó gónón smigang du ta me yóm hmoen kum ni, ne yó gónó me là tmakas mò du.

Sulat Pol Ebè Yó Kem Tau Hemtahu Bè Rom 11:30

Yu kem tau là Ju le, tehe là nimón ye ke Dwata se kuy. Okóm ni, deng knodu Dwata yu ne lan le là mimón du yó kem tau Ju.

2 Samwél 17:28

Wen kem igam nwit le ebè Dabid, ne kem kuleng, ne kem tukung. Wen ken nwit le, duhen halay wit ne barli, ne arina, ne halay senla, ne blangul, ne blotung.

Kem Udél Hlalak Tehe Selumun 11:25

Hyu klowilen yóm tau bkas nawahen ne yóm tau ten-gelen kem dumun bud wen se temgel du.