Matyu 3:11 - Udél Dwata: Gna Kesfasad ne Lomi Kesfasad

¹¹ “Béléu do,” mon Jan, “él gel babtaysu kuy mò ilô yóm deng kehegsel ye. Okóm yóm huli do, yó kun kmò kbabtays yó kem tau mimón béléen, suen bélê le yóm Tulus Dwata. Bong yó kem tau là mimón le, ofi moen kul. Yóm tau huli do yó, tey mfasang sentahu. Là kóe knóón baluen ke heseke béléen.

Matyu 3:11 Referans Kwoze

Kun Snulat Luk 3:16

Okóm yó udél Jan ebélê le, monen, “Béléu do, él gel babtaysu kuy. Okóm wen móyón sut hol mfasang sentahu. Là kóe knóón baluen ke olohu hesek béléen. Yó kun kmò kbabtays yó kem tau mimón béléen, suen bélê le yóm Tulus Dwata. Bong yó kem tau là mimón le, ofi moen kul.

Kul Nmò 1:5

Bong ke Jan kun, él yóm gel babtaysen kem tau. Okóm tek hilu kdaw ne duen bnabtays Dwata yu bè Tulus Dwata.”

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Taytus 3:5

Là kô bè kehyu kmò du gónón lemwà kut, okóm tódô lemwót bè yóm kkoduhen kut, hlanen bè yóm Tulus Dwata. Lómón ke denyohen tu yóm Tulusen. Yóm kedyohen kut yó, yó se yóm kehbalingen kut ngà Dwata, ne blayen kut yóm lomi klowil.

1 Kurin 12:13

Lómón yó se yóm kdê tekuy lemolò ke Krays. Bè yóm tehe kehbabtays tekuy, henbalingen tekuy sotu lówó yóm Tulus Dwata, kihu ke Ju duhen ke là Ju le, ke tau klifen duhen là klifen le. Liman ke tek sotu lówó tekuy, abay se tek sotu yóm Tulus Dwata tendo nô bélê tekuy.

Matyu 3:6

Ni kem tau ni, gotu benkas tulón le ke Jan yó kem salà le, ne bnabtays Jan lu bè yóm él Jurdan.

Kul Nmò 19:4

Mon Pol se, “Yóm tehe kbabtays Jan mò ilô yóm tau ke deng knogolen yó kem sidek gel nmoen. Okóm sotu gel tulón Jan yó kem tau Israél, ke hol hentahu le yóm sut huli du, duhen Jisas.”

Kun Snulat Luk 1:17

Du se tukô gna yóm gónó ye mogot, ne tey kfasangen, hol lómón yóm tehe kfasang Ilaydya yóm sotu tugod Dwata ekni. Lemwót bè yóm ktoloken, bud gónón sulék nawa yó kem tuha ne yó kem ngà le. Kkólen bè yó kem tau là mimón ke Dwata, gotu le bud himón, baling skél kehedem le yó kem tau tedeng knawa le. Lemwót béléen gónó le eles getgama yó kem kun tau Dwata bè yóm angat ksut yóm gónó le mogot.”

Kun Snulat Jan 1:30

Du se yóm deng monu sut huli dou, okóm tey mfasang sentahu, abay se gu laanu là deng sut, deng kem sana yó ne kun.

Mark 1:4

Tahu se, wen sotu tau boluyen Jan, tódô sut bè yóm benwu laen dù tau menwu du. Yó nmoen, mabtays tau, ne hetngónen kul yóm Udél Dwata. Yó gel monen mò kul, “Hegsel ye ne, knogol ye ne yó kem sidek gel nmò ye, ne hbabtays ye, ne angat hnifót Dwata se yó kem salà ye.”

Ifisus 3:8

Ou se yóm hol glaan bè yóm kdéen tau Dwata, okóm deng mom sigang Dwata tahu nim tey hyu hmoen dou ni, duhen yóm kwitu du elem blóng yó kem tau là Ju le. Yó hol lemen nim Tulón Hyu ni, duhen yóm tey kehyuhen yóm tóbóng Krays, yóm kehyu là gbek tekuy hmingón du.

Isaya 44:3

Angat nmou él gu lem yóm benwu balù udì ke tehe wen élen. Ne wen él hlelu bè yóm tonok alì sidek kékéngen. Ne tódô suu bè yó kem ngà ye yóm dou Tulus ne tey któbóngu yó kem sfu ye.

1 Pitér 5:5

Ne yu kem tau lomi lemnok, hol nimón ye yó kem tau tuha senta ye. Ni hlauhu kuy yóm kdê ye, hol dnalang ye yóm keheglaan bè kem dumu ye. Abay se wen monen bè Sulat Dwata, yóm monen, “Tey kekbê Dwata kul yó kem tau hegmón, bede tnóbóngen yó kem tau hulung heglaan.”

Kun Snulat Jan 1:15

Nim Jan ni, wen tulónen gbak ebè yóm bnoluy le Udél yó, hgelen udélen, monen, “Ni se yóm tau tehe monu sut huli dou, okóm du he yóm geta sentahu, abay se gu laanu là deng sut, deng sana kem yó ne kun.”

Kun Snulat Luk 3:3

Yó gónó Jan tendo mógów lem blóng yó kem tau menwu tmubé yóm él boluyen Jurdan, wen hetngónen kul, monen, “Hegsel ye ne, knogol ye yó kem sidek gel nmò ye ne hbabtays ye, ne hnifót Dwata salà ye.”

Kul Nmò 8:36

Ngang le mógów efet le kól bè yóm gónón wen él, ne mon yóm tau genlal yó mò ke Filip, “Ni wen él, hyu kô ke hbabtayse kóm?”

Kul Nmò 8:38

Ominen na hdà klisahen. Kmó le elaan, ne hlós le elem él. Omin Filip mabtays du.