Matyu 27:1 - Udél Dwata: Gna Kesfasad ne Lomi Kesfasad

¹ Timbow deng mwas bè yó, gotu le stifun yó kem geta bè yó kem gel demsù ebè Dwata ne yó kem tuha gónó le gel galak yó kem Ju, sensatul le yóm kmò khatay le ke Jisas.

Matyu 27:1 Referans Kwoze

Mark 15:1

Tikóng deng mwas bè yó, gotu le kendel stifun yó kem geta bè yó kem gel demsù ebè Dwata, ne yó kem tuha gónó le gel galak yó kem Ju, ne yó kem tau gel tmolok hlau, dalang se kdê yó kem tau gel kmukum. Yó nmò le, sensatul le yóm kmò le ke Jisas. Omin le hmengked mfét du kdina, ne nit le ebè Paylét.

Kun Snulat Jan 18:28

Hol mwas bè yó se, nit le Jisas lemwót bè gónô Kyafas mógów le ebè gónô bong yóm gubérnor. Okóm kul yó kem Ju wen glalen yó, là hyuhen bè kul hlau ke husek le bè gónô yóm tau là Juhen. Ke yó tô nmò le, là bud le mólós kun, ne là kô le gemken bè yóm mò ken le bè Kdaw Khius.

Kun Snulat Luk 22:66

Tikóng deng mwas bè yó, omin le mit ke Jisas ebè yó kem tau hol geta mogot kukum. Gotu le nô bè yó yó kem tuha gónó le gel galak yó kem Ju, ne yó kem tau hol geta bè yó kem gel demsù ebè Dwata kkólen bè yó kem tau gel tmolok hlau.

Mika 2:1

Hatay ye kuy, kem tau olo le beyen hlilil kifu là dog tungô matul mò yó kem sidek. Hlafusen bè yó, tódô kendel nmò ye yóm sidek deng eles natul ye yó, abay se gbek ye mò du.

Kem Lingón 2:2

Ne yó kem tau hol geta bélê le, deng le eles htigel mit sgida. Ne natù le Dwata ne yóm tau hol geta deng néléken.

Matyu 23:13

Bud mudél Jisas, monen, “Angat tey tafak ye yu kem tau tmolok hlau ne yu kem Farisi, yu kem tau gel hemtedeng knô. Lómón ke deng mom kendadu ye yóm bak dól bè yóm kogot Dwata tau. Là se kô ye dog gusek kuy, ne deng mom henseng ye yó kem tau móyô mung.

Kul Nmò 5:21

Tahu se, mung kwasen bè yó, bud tu lu mdà lem Gónô Dwata, bud le tmolok bè yó kem tau. Bè yóm hlafus yó, lemwót yóm tau hol geta bè yó kem gel demsù ebè Dwata dalang se yó kem dumuhen, gotu htaba le yó kem dumu tau tuha gel mogot kukum anì gotu le stifun yóm kdê le. Omin le tô hangay yó kem hógów Jisas nô lem blanggù.

1 Samwél 19:11

Bè yóm kifu yó, wen kem tau dók Sol ebè gónô Dabid mò mentey du anì tô hnatay le bè yóm kehlafusen bè yó. Okóm yó nmò Mikal yóm yehenen nseben Dabid, monen mò du, “Ke là mlóyi kifu ni, hlafus haya matayi.”

Kmukum 16:2

Timbow tngón yó kem tau bè Gasa yóm knô Samsun bè yó, yó nmò le gotu senibut le yóm benwu yó. Tódô suloy le buteng mangat du bè bak tikeben. Balù udì ke mudél le, yó hendem le, “Nangat tekuy efet kól hlafus, omin tekuy hmatay du.”

Kem Lingón 31:13

Tey dê gungolu udél le etahu, ne deng slibut dou yóm alì knikou. Deng natul le ou yó kem hohonu, natul hnatay le ou.

Kem Lingón 71:10

Yakà deng wen udél le etahu yó kem hohonu. Gotu le stifun, natul hnatay le ou.

Kun Snulat Luk 13:1

Bè yóm kdaw yó, wen kem tau sut bè Jisas fen tmulón du yóm nmò Gubérnor Paylét bè yó kem tau lemwót bè Galili. Yóm hanà tolo lel le tô demsù ebè Dwata, tódô gotu hfatay Paylét lu.