Matyu 24:15 - Udél Dwata: Gna Kesfasad ne Lomi Kesfasad

¹⁵ Bud mon Jisas, “Bè tehe kegenen du Danyél ekni, yóm sotu tau tehe gna tugod Dwata, eles tulónen yóm angat mdà bè Gónô Dwata yóm alì sidek knikò, yóm natuen Dwata. Yóm tau semfala du yóm ni, hol hennagien kmò klanen.

Matyu 24:15 Referans Kwoze

Danyél 9:27

Yóm tau mogot benwu angat sut yó, angat wen tey senfasad le yó kem tau lem yóm benwu yó lem yóm hitu halay, hol kesfasad mget. Okóm hanà tolo sóól yóm hitu halay, nmoen sónen yóm gel kedsù le ebè Dwata yó kem tau ne yó kem dumu gel blay le du. Yóm alì sidek bè kdê yóm gel nmò yóm tau angat sut yó, mom hdaen bè yóm Gónô Dwata yóm alì sidek bè yó efet yóm kkok Dwata etahen yóm tafak mò hol gemlà du, yóm deng eles olu Dwata etahen.”

Danyél 12:11

Tódô lemwóten bè yóm kdaw kwen hemseng du yóm gel kedsù ye ebè Dwata, yóm kdaw kehdà le lem yóm kun Gónô Dwata yóm dwata kéng alì sidek bè yó, yó kegen ye alì mò du glayam botong lemibu lewu latu syóm folò (1,290) kdaw.

Mark 13:14

Bud mon Jisas, “Angat wen ton ye yóm alì sidek knikò, tódô mdà bè Gónô Dwata, yóm tô matù ke Dwata.” Yóm tau semfala du nim ni, hol hennagien kmò klanen. “Ke sok kól yóm kdaw yó, eles le mlóy elem bulul ne yó kem tau menwu bè prubinsya Judiya.

Kun Snulat Luk 21:20

Ne yó bud mon Jisas, “Ke sok deng ton ye senibut kem sendalù nim syudad Jirusalim ni, là hewuhem du deng kdawen meglà ne.

Deng Hegfan 1:3

Hligal kun yóm tau fen semfala du nim bok ni. Ne hligal le se kul yó kem tau fen hmungol du ne mimón du yóm eles tulónen ni. Là buden legen ne ksuten ni kem kdê tulónen ni.

Kun Snulat Luk 19:43

Angat kól yóm kdaw,” monen, “tódô senibut le yu yó kem hohon ye, wen tey seng nmò le anì laen dù bud lan ye gewà.

Danyél 9:23

Hanà tolo nbutem mni bè Dwata, deng sana bnalaen u ne ni se nógówu naw e tulón kóm, abay se tey bong nawahen kóm Dwata. Yó gónóm mon, hnungolem ni anì hol getnefem yóm hton Dwata kóm.

Danyél 9:25

Hol hnungolem yóm tulónu kóm ni anì hol getnefem. Lenwóten bè yóm kdaw ksulat le yóm udin bud ketlob le yóm benwu Jirusalim efet kól bè yóm kdaw ksut yóm sotu tau deng nélék Dwata mò kmamal yóm klamangen, yó kegenen fat folò syóm halay, ominen bud temnù fat latu tlu folò fat halay. Bud hdà le Jirusalim, wen kem lan bud nmò le bè yó ne tey mbegel yóm beng hdà le hilolen, okóm tey sbeweg kbenwu le lem ni kem halay ni.

Hibru 2:1

Ke lómónen yó kegetahen yóm gónó tekuy mogot, hol sù tekuy bè nawa tekuy sen yóm ktahuhen deng gungol tekuy anì là snonol tekuy du.

Kul Nmò 6:13

Omin le hudél yó kem tau tmifù du kéng, yó mon le, “Nim tau ni, sónmoen gel sidek kudélen ebè yóm Gónô Dwata dalang se ebè yóm hlau Musis.

Deng Hegfan 3:22

Duhen yó, yóm tau wen klinguhen, hol hnungolen dé yóm tulón yóm Tulus Dwata bè yó kem tau bè ket simbahan.”

Kul Nmò 21:28

“Ó kem dumu me tau Israél, tnóbóng ye mi. Ni se yóm tau tendo tmolok bè yó kem dumu benwu. Yóm toloken yó, hen-gnoken tekuy kem tau Israél, dalang se yóm hlau Musis, kkólen bè nim Gónô Dwata nii. Lelen yó he hgolu yóm Gónô Dwata bè yóm kwiten elemen yóm tau là Juhen. Deng nuléhen yóm hlau bè Gónô Dwata yóm nmoen yó.”

Kun Snulat Jan 11:48

Ke tódô bayà tekuy, kdéen tau angat hemtahu béléen, hnénég ye ke là angat lenbuten tekuy yóm tau hol geta bè Rom. Ngem kà angat genbà le yóm Gónô Dwata, ne angat gotu hensidek le tekuy kem Ju.”

Danyél 1:6

Yó kem ngà logi nélék le yó, wen fat bélê le lemwót bè ból Juda, duhen Danyél ne Hananiya ne Misyél ne Asariya.

Matyu 24:16

Ke sok kól yóm kdaw yó, eles le tódô mlóy elem bulul ne yó kem tau menwu bè prubinsya Judiya.