Matyu 23:34 - Udél Dwata: Gna Kesfasad ne Lomi Kesfasad

³⁴ Tódô tulónu kuy, angat wen kem tau bud hógówu elem blóng ye, yó kem tau tugod Dwata, ne yó kem tau hulung hedem, ne yó kem tau hulung tmolok. Tódô wen bélê le hnatay ye, wen se tnutuk ye bè kros, ne wen se nfes ye lem gónô ye gel stifun, ne mom ktes ye lu ebè yó kem dumu benwu gónó le e mlóy.

Matyu 23:34 Referans Kwoze

Matyu 13:52

Bud mon Jisas, “Yóm tau gel tmolok hlau gnan, ke deng gfi bè kogot Dwata tau, hol lómón ke du yóm tau wen kimu labihen, ne wen kimu lomihen deng denfélen bè gónóen mò gónóhen gel ma yóm wen muhen du.”

Kulasi 1:28

Duhen ni, laen dù dumu tulón me bè kdéen tau, són Krays. Gel hlan me bè khulung hedem yóm kehetgama me kul, ne yóm ktolok me kul. Yó gónó me mò du anì hol le gulit yóm ket kul na sotu bè yóm kdaw kwit me kul bè solu Dwata yó kem tau deng ssotu bè Krays.

Kul Nmò 13:1

Bè yó kem tau hemtahu bè syudad Antyok, wen se bélê le tódô gel tmugod ke Dwata, ne wen se bélê le hulung tmolok. Ni se boluy le: Barnabas, Simyun (yóm niba le Hitem), Lusyus (lemwót bè syudad Sayrin), ne Menain (yóm tehe dumuhen senok Gubérnor Hirod), ne Sol.

Matyu 10:23

Ke hnayam le yu bè sotu benwu, tódô ye mlóy ebè dumu benwu. Tódô tulónu kuy ktahuhen, là kô na ye e deng gdeng du he yó kem hmou kuy bè kdê yó kem benwu bè klamangen Israél, deng sana bud kól yóm Ngà Tau.

Deng Hegfan 11:10

Ya tey kehligal yóm kdéen tau te tonok bè yóm katay le. Tey ken bong nmò le, ne lel tey kesbasa le lemwót bè yóm kligal le. Yakà bè yó du kem lewu tugod Dwata yó gónón lemwót yóm tehe tey keglayam le.

Hibru 11:37

Wen se bélê le matay bè kestudà le kul botu. Wen se bélê le tódô len-gadì le bè sóól lówóhen. Ne bud wen se matay lan le tmibó kul. Són nes lesek le, són kulit ubiha ne kulit kambing. Balù udì ke wen gónó le ma, ne tey gulé kehlayam le kul ne kehsidek le kul.

1 Kurin 3:10

Lemwót bè yóm kenhulung blay Dwata dou, gónóhen mbegel kehdau du yó kem heheken. Bede tólóng tau fen hemdeng du. Ket tau semtóbóng hemdà du yóm gónô yó, yake hol ten-gamahen yóm kmò kehdaen du.

1 Kurin 2:6

Bè yó kem tau deng mbegel kehtahu le, wen dou ketngón toloku kul. Bede là mkélen bè yóm kul ketngón yó kem tau te tonok, ne là mkélen bè yóm kul ketngón yó kem tau wen kfasang le mogot benwu. Yóm kul kfasang yó, deng sana nbuten monol.

Kul Nmò 15:32

Tey kegen le Judas lewu le Silas mudél ebélê le. Tey wen gónó le gemduf kul ne temgel kul bè kehtahu le. Yóm Judas lewu le Silas, tau le tugod Dwata se kul.

Kul Nmò 14:19

Là legenen bè yó, wen kem Ju lemwót bè yóm sotu Antyok snakuf Pisidya, ne bè Ikunyum. Yó nógów le, na le e nofong yó kem tau bè yó anì lenbut le Pol. Tahu se. Yó nmò le, deng mom sentudà le lu botu le Pol, ne tódô sendyol le lu ebè lewà yóm benwu yó, ofo kul mon du ke deng matay ne.

Kul Nmò 12:2

Yó nmoen bè Jim, yóm hol dumun setwoli Jan, hfatayen, tnibó le sudeng.

Kul Nmò 11:27

Sotu kdaw bè yó wen kem tau tugod Dwata gdek bè Antyok lemwót gu bè Jirusalim.

Kul Nmò 5:40

Tahu se, nimón yó kem dumu tau hol geta mogot kukum yóm udél Gamaliyél yó. Omin le bud htaba kul elemen yó kem hógów Jisas na le na habid hfes lu. Tey kget kmon le du mò kul hol bê le abay bud sentbong bè kem tau yóm boluy Jisas. Omin le yó hefewà kul.

Kul Nmò 1:8

Okóm ke deng sut bélê ye yóm Tulus Dwata, angat wen se kuy kfasang, ne angat sensból ye bè Jirusalim yóm deng nmou, bud senged se bè klamang prubinsya Judiya efet kól etu bè klamang prubinsya Samarya, ngangen efet lenngeben klamang benwu.”

Kun Snulat Jan 20:21

Ne bud mon Jisas mò kul, “Dwata he hol henek nawa ye. Lómón yóm tehe khógów Mà do, hol lómón yó se bud khógówu kuy.”

Kun Snulat Jan 16:2

Angat là bud hmung le kuy bè yó kem gónó ye gel stifun. Angat wen kdaw le hmatay kuy yó kem tau. Ofo kul mò du yóm yó, ke yó yóm hyu bè Dwata.

Kun Snulat Luk 24:47

Lemwót bè kun boluy, wen lan Dwata hmifót salà yó kem tau deng hegsel.’ Ni se,” monen, “yóm tulón angat hlós sensból ye bè klamangen benwu. Bè ni bè Jirusalim gónó ye mbut hból du.

Kem Udél Hlalak Tehe Selumun 11:30

Lemowil béléen kem dumu tau yóm tau tedeng kmoen ne yóm tau hulung hedem niten ebè Dwata kem dumun.

1 Tisalunika 2:16

Bud lu se hemseng kum bè yóm gel ktolok me bè yó kem dumu tau là Ju le yóm lan le gewà gu lem hatay. Bè nim nmò le ni gónón deng tmakas Dwata. Ne ni, deng nô ta le ne yóm ktafaken kul.

2 Tutul Israél 24:21

Okóm natul hnatay le Sikaraya yó kem tmuha gel malak, dalang se ke Juas yóm tau hol geta, gloken mdók kul anì sentudà le botu bè yó bè lósól yóm Gónô Dwata efet matay.

Jirimaya 26:8

Okóm tikóng deng ktulón Jirimaya du yóm kdê htugod Dwata du, lemwót yó kem tau gel blóng ebè Dwata ne yó kem tugod Dwata ne kdê yó kem dumu tau nô bè yó tódô kenfô le Jirimaya, omin le hetê, mon le, “Hnatay tekuy.

Jirimaya 36:26

Okóm mom yó nmoen, dóken Jiramil yóm ngaen logi ne Siraya yóm ngà Asril logi ne Silimaya yóm ngà Abdil logi, anì kenfô le Baruk lewu le Jirimaya. Okóm deng bnos Dwata lu.

Matyu 23:31

Lemwót bè yóm udél ye yó gónón gdilô yóm hol kesfu ye bè yó kem tau tehe mò des yó kem tehe tugod Dwata ekni.