Matyu 12:34 - Udél Dwata: Gna Kesfasad ne Lomi Kesfasad

³⁴ Ya nim yu kem tau, knawa ye ulal. Yó gónón sidek kebkó ye, abay se hono sidek yóm nô lem hendem ye. Yó se nô lem hendem yóm tau, yó se sut bè sumóngen.

Matyu 12:34 Referans Kwoze

Kun Snulat Luk 6:45

Yóm tau hyu, hyu se kebkóhen lemwót bè yóm hyu nô lem hendemen. Yóm tau sidek, sidek se kebkóhen lemwót bè yóm sidek nô lem hendemen. Yó se gel nô lem hendem yóm tau, yó se gel lemwà bè sumóngen.”

Matyu 15:18

Okóm yóm sidek kebkó gel btang bè sumóng yóm tau, hono lemwót lem hendemen, ne yó se mit du là mólós bè Dwata.

Ifisus 4:29

Béen sidek kbak tekuy. Són yó dé olo mon tekuy yóm hyu, són yóm udél wen gónón gemtóbóng kem dumu tekuy, yóm udél hol gemduf kul, mò gónó le dmalang. Yó dé olo benkó tekuy yóm udél wen muhen bè yó kem tau hmungol tekuy.

1 Samwél 24:13

Lómón yóm gel mon le, ‘Són yóm tau sidek kehedemen yóm tau gel mò du yóm sidek.’ Duhen yó, hol hentahuhem nim monu ni, là kô gbeku du ke hensideku uu.

1 Jan 3:10

Ni se hol gónó le stólóng yó kem ngà Dwata bè yó kem ngà Seitan: Yóm tau ke là nmoen du yóm tedeng ne ke là kenbong nawahen kem dumuhen, sundu ngà Dwata du yóm tau yó.

Matyu 12:35

Yóm tau hyu, hyu kebkóhen lemwót bè yóm hyu gel suen lem hendemen. Yóm tau sidek, sidek kebkóhen lemwót bè yóm sidek gel suen lem hendemen.

Kun Snulat Jan 8:44

Seitan yóm kuy mà ne tódô lolò ye yóm kun kóyô. Du se yóm hol sana monok lemwót bè hol kbuten. Là kóen tofi bè yóm ktahuhen. Hono kéng yóm kun, abay se yó se sana kun kmò, mò kéng. Hono kéng yóm gel tulónen. Du se hol gónón gu tembul kéng.

Isaya 32:6

Yóm tau là tedengen yó, hono nungel kestulónen ne tey dê nmò sidek natulen. Kdê yó kem gel nmoen ne kdê yó kem gel udélen gónón gfan yóm là kadaten ke Dwata. Là kô henkenen kul yó kem tau bitil ne là kô hinumen kul yó kem tau meeng.

Matyu 23:33

Ya nim yu kem tau knawa ulal, hono ye semfu gu bè yó kem tau knawa ulal. Tedu kmò kegewà ye lemen du yóm deng kgolu ye elem lanaw ofi?

Isaya 59:14

Mom henseng me yóm kukum tedeng. Là kóen gehloni ebélê me yóm tedeng. Là bud gungolem du bè yó kem tau gel bemtad lem fedyan ne yóm ktahuhen. Laen kô bud tonem bè yó yóm tau laen dù kéngen.

Kem Lingón 64:3

Tey telem dilak le, hol lómón ktelem yóm sudeng sbalà bak. Yóm kdes yóm udél le, hol lómón kdes yóm bak hanak gónó matay.

Matyu 3:7

Timbow ton Jan yóm kógów le ebéléen yó kem Farisi dalang se yó kem Sadyusi na le e tô hbabtays béléen, tódô monen mò kul, “Ya nim yu, hol ye mkél bè ulal, gel henlóyen ofi. Ilóu ofo kuy ke tô ye gewà lemen yóm angat tafak Dwata tau ke olo ye hbabtays.

Kun Snulat Luk 3:7

Tey tau wen tendo mógów ebè Jan na le e hbabtays du. Okóm yó gel mon Jan mò kul, “Ya nim yu, deng ye mkél bè ulal, gel hemlóy ofi. Ilóu ofo kuy ke tô ye gewà lemen yóm angat tafak Dwata tau ke olo ye hbabtays.

Isaya 59:4

Gel ye skukum, okóm là kô ndà ye du yóm kukum tedeng mom snalig ye yóm kéng anì gemmò ye. Tey mahil bélê ye mò du bè kem dumu tau yóm sidek gel natul ye.

Kem Lingón 53:1

Yó mon nawa yó kem tau là hulung le hedem, “Laen kô dù Dwata.” Yó kem tau mon du yóm yó, hono kem tau mò sidek, nmò le yóm nmò alì kenyó. Laen dù bélê le mò du yóm tedeng, balù sotu.

Kem Lingón 64:5

Sónmò le tendo sbót mò sidek ne matul hmolot. Yó mon le, “Laen kô dù tau mton kum.”

Kem Udél Hlalak Tehe Selumun 4:23

Hol ten-gamahem bè kdéen yóm kmò kógów kehedemem, yakà bè kóm kehedem du gónón lemwót yóm kóm kmò.

Kem Udél Hlalak Tehe Selumun 16:23

Yóm tau hulung hedem tey ten-gamahen yóm kmò kudélen ne lemwót bè yóm khulungen mudél gónón gbóy tau.

Ifisus 5:4

Ne là kóen knóón bè kun tau Dwata ke là mólós ksumóngen. Bê tekuy nmò yóm kudél là madat, ne yóm hlowon sidek. Yake yóm udél gónón megdóyón Dwata yóm gel btang bè sumóng tekuy.

Sulat Jim 3:2

Kdê tekuy, sal gel wen gónó tekuy gemsalà. Okóm yóm tau laen dù salà sumóngen, deng tahu gulit ne yóm tau yó, deng hulung mit ktauhen.