Matyu 12:25 - Udél Dwata: Gna Kesfasad ne Lomi Kesfasad

²⁵ Tódô tngón Jisas yóm nô lem hendem le, ne yó gónón mon du mò kul, “Yóm benwu tendo mesgólól nawa tauhen, ne ke sónmò le sfatay, angat meglà. Balù yóm sotu gmónô, ke là ssotu nawa le, ne ke sónmò le sfatay, angat le tódô seglef.

Matyu 12:25 Referans Kwoze

Glasya 5:15

Okóm ke lómón knawa ógóf lem bnes yóm tendo nô bélê ye, ke sónmò ye sfatay ne sefdes, hol ten-gama ye, déke gotu ye seglà.

Jirimaya 17:10

Okóm ou se yóm sana Dwata hol gónó mogot, ou se gel hemklol du yóm nô lem hendem tau ne gotu tonu yóm nô lem but blututen. Yóm ofol blayu du sal lemwót bè yóm deng kun gel nmò.”

1 Kurin 2:11

Bélê tekuy, tek sotu temngón du yóm kehedem tekuy, són tekuy. Senged snéen bè Dwata, tek sotu temngón du yóm kun kehedem, tek són yóm kun Tulus.

Matyu 9:4

Tódô tngón Jisas yóm nô lem hendem le, yó gónón mon du mò kul, “Moen de ke sidek kmò kehedem ye ebéléu?

Deng Hegfan 16:19

Ne yóm tey syudad bong Babilun, botong tlu gónón mesdoli. Gotu gebà snéen yó kem dumu syudad talak tonok. Là kô na a klifót Dwata du yóm alì kegsalà le yó kem tau bè Babilun yó, ne hol hegnómen kul yóm tey kebuten kul, lómón ke wen ninum lóbô hinumen kul.

Hibru 4:13

Laen kô dù gebnos bè Dwata. Balù sotu bè yó kem deng dlimunen ke mone tô gebnos béléen, gotu tonen kentihen. Bè soluhen gónó tekuy angat mdà hulin kdaw, ne angat gotu benkas ebéléen kdê yó kem deng nmò tekuy.

Mark 2:8

Tódô tngón Jisas yóm nô lem hendem le, yó gónón mon du mò kul, “Moen de ke lómón yó kmò kehedem ye?

Kem Lingón 139:2

Deng gotu tngónem yóm kdê nmou, ne yó kem angat hendemu, deng eles tngónem.

Deng Hegfan 2:23

Tódô gotu hnatayu snéen yó kem tau gel lemolò du. Yó gónóhu mò du yóm yó anì tngón kdéen tau hemtahu béléu yóm klaen dù gebnos béléu, gotu tngónu yóm nô lem hendem le ne yóm dê tô hendeen le. Angat blayu kuy yóm mò balà yóm kuy deng gel nmò, yóm ket kuy na sotu.

Kun Snulat Jan 21:17

Bud mon Jisas mò ke Pitér bè getluhen dulék, monen, “Ó Simun, ngà Jan, bong nawahem dou kô?” Tô muni nawa Pitér abay se deng tlu dulék Jisas smólók du. Ne mon Simun se kun, “Tódô gotu tngónem se yóm kdéen, Sér. Tngónem se yóm kbong nawahu kóm.” Bud mon Jisas se, “Sen-gyokem dou sen ubihahu.

Amus 4:13

Yakà Dwata se mò kul yó kem bulul ne dmimun du yóm lenos. Ne eles gel hetngónen bè tau yóm gel hendemen. Gbeken hembaling du kifu yóm layag hlafus. Du se gel mógów ta yó kem tey bulul bè klamangen benwu. Yó boluyen, duhen yóm sana Dwata hol gónó mogot, yóm Dwata laen dù là gbeken du.