Matyu 11:28 - Udél Dwata: Gna Kesfasad ne Lomi Kesfasad

²⁸ Mógów ye ebéléu dé, yu kem tau miteg lemwót bè yóm keblat yóm gel nbô ye. Fen henwósu bélê ye yóm blat yó.

Matyu 11:28 Referans Kwoze

Matyu 11:29

Tles nbô ye dé yóm dou nbô, ne hol ye dmalang béléu, abay se ganag nawahu, ne là kóe hegeta knô. Ke yó se kuy nmò, là kô ye na e bud miteg.

Kun Snulat Jan 7:37

Bè yóm kmò le ken yó, alì bong muhen bélê le yóm hol són kdaw. Bè yóm kdaw yó, mdà lem blóng le Jisas, hgelen udélen, monen, “Yóm tau meeng, mógów ebéléu dé nan e minum.

Kun Snulat Jan 6:37

Kdê yó kem tau hemtahu béléu,” mon Jisas, “sal lemwót bè kun kehlan du Mà. Ne là kô naw e kenbê kul ke wen tau mógów ebéléu.

Glasya 5:1

Là bud tekuy ghesek du ne yóm hlau Musis, abay se deng lenwà Krays tekuy. Yó gónóm mon, hol tekuy hebegel anì là bud tekuy ghesek du yóm hlau yó.

Deng Hegfan 22:17

Yó udél yóm Tulus Dwata dalang se yóm libun yehen yóm Ngà Ubiha, mon le, “Géhél ye ne.” Ne yó kem tau mungol du, yake bud mon le kul, “Géhél ye ne.” Géhél le edini ne yó kem tau meeng na le e minum bè yóm él hlowil tau, yóm él là kô feng benli du. Yóm tau móyô, géhél minum ne.

Jirimaya 6:16

Yó udél Dwata ebè yó kem tauhen, monen, “Mdà ye bè yóm gónón sesyat lan. Hnebel ye yóm lan deng legen, yóm lan hol tahu duhen ne yó lolò ye. Bè yóm klolò ye du yóm lan yó, bè yó gónón menek kegnóm ye du. Okóm deng mom yó balà ye dou, mon ye, ‘Là. Là yó du yóm lan nóyô me.’

Kem Lingón 116:7

Yó gónón hol mgel nawahu, abay se tey hyu yóm nmò Dwata béléu.

Isaya 28:12

Yó tô blay Dwata kuy, yóm benwu gónó ye henek nô ne yóm udél hemyu nawa ye. Okóm là kô ye móyô hmungol du.

Matyu 23:4

Ya tey sidek keblaten yó kem hlau gel hbô le kem tau, okóm kul, balù gdù, là kô le tmóbóng mit du yóm blat gel hbô le kuy yó.

Hibru 4:1

Ne tekuy snéen nim kmoen ni yóm gónó Dwata e fmasad du yóm benwu angat gónó tekuy hlós henek nô yó. Duhen yó, hol tekuy eles temgama, kô là guta tekuy du yóm benwu fasaden yó.

Isaya 66:2

Ou se deng mò du yóm longit ne tonok ne kdéen ton. Okóm tey kehyu nawahu bélê le yó kem tau heglaan béléu ne hegsel bè salà le, yó kem tau wen klikò le do ne mimón do.” Là gomongen bè nili yóm bérs 3 efet kól bè 24. Htulón Dwata ke Isaya yóm tey kehyuhen bè yó kem tau mimón yó kem udélen. Okóm bè yó kem tau là mimón du, yó udél Dwata gbak ebélê le bè bérs 4, monen, “Angat wen tey hlayam hwitu ebélê le, duhen kdê yó kem gel knikò le. Abay se bè yóm ktabahu, là tnimul le do. Soke mudél, là hnungol le do. Tey kmò le salà igou temngel kul. Deng mom nmò le yó kem deng tngón le alì kenbéu.” Duhen yó, bè yóm kdaw kehgulék Dwata klowil yó kem tauhen ne yóm tonoken, tódô segeng bè yóm kdaw khéét kkukumen yó kem tau là hemtahuhen ne yó kem tau là mimón du bè klamang benwu. Kesok kól yóm kdaw bud kehgulék Dwata yóm benwu Jirusalim ne yóm nan e bud kwit kul mulék yó kem tauhen mò nô bè yó, tódô mekto yóm kmoen du ne wen tilob ofol blayen kul. Gotu hógów Dwata yó kem kun tau ebè yó kem benwu là deng gmungol du yóm kun boluy, yó kem là deng mton yóm kun keklóón. Mon Dwata bè bérs 19, “Gotu hetngón le yóm dou keklóón ebè kdê but tau.” Bè són nim tsapter ni tulónen yóm fasad Dwata bè yó kem kun tau. Monen bè bérs 22, “Yóm klaen tul sónen yóm lomi longit ne tonok, lómón yó se klaen dù sónen yóm ktauhu kuy, ne là se kóen lana yóm kuy boluy.”

Kem Lingón 38:4

Denge kmifus lem salà, ne là bud gbeku mbô du yóm alì ksidek keblaten.

2 Tisalunika 1:7

ne kóhen ta ye yóm gel keglayam ye, dalang se yóm kum gel keglayam. Yó he kmò Dwata du nim ni sok kól yóm gónó tekuy mogot Jisas gu bè longit, mung du yó kem gel hógówen alì mfasang.

Kem Lingón 94:13

Bè yóm kdawen wen gel gfà le, sal gel henwósem ta le, efet hokolem yóm tey sol nelem mò gónóm hebtang yó kem tau gel mò sidek.

Isaya 61:3

Yó kem tau alì wen kenangag le bè benwu Sayun, tles benlayu lu kligal ne kehyu nawa. Yó kem tau wen kenblat nawa le, tles blayu kul yóm sngal mò dmóyón ke Dwata. Hol lómón angat kmò le, lómón yó kem koyu kun hulu Dwata. Tódô kdê le gotu mò du yóm tedeng. Ne tey megdóyón Dwata bè yóm deng nmoen bélê le.

Kul Nmò 15:10

Duhen yó, moen de ke tô tilów ye Dwata bè yóm blat tô hbô ye kul ni? Yóm tô hlolò ye kul, balù yó kem tehe fù tekuy ekni, là kô gbek le lemolò du kul, sélét mom tekuy ne.

Job 5:7

Bè ktahuhen, yóm tau sal gel wen hlayam msut bè klowilen. Lómón se yóm ofi sal gel wen kutuhen.

Kem Lingón 32:4

Yóm ktafakem dou, Dwata, senflósen kdaw ne kifu efet lana béléu kgisu. Lómón kegnómu du, lómón ke él kti bè yóm alì ékét kdaw.

Isaya 1:4

Yu kem tau Israél, deng ye golu elem hatay ne yóm kdê ye lemwót bè yóm alì kmò ye sidek. Laen kô dù hyu du yóm gel nmò ye. Deng bong blat yóm salà nô ta ye. Deng mom kenbê ye yóm gónó ye mogot yóm Dwata yó kem tau Israél ne yóm Dwata laen dù belenen. Deng mom knogol ye ne.

Job 14:1

Yó udél Job ebè Dwata, monen, “Yóm klowil tau là mbegelen. Ne tey ukol klowilen lelen sbeweg.

Jirimaya 31:25

Yakà angat kóhu du bè yó kem tau yóm alì kliteg le ne benlayu kligal yó kem langag.”

Kul Nmò 20:35

Deng hdalangu kuy se bè yóm kmò tekuy nmò, sal gel wen gónó tekuy ma mò tóbóng yó kem dumu tekuy wen gónó le élél. Hol hentulón ye nawa dé yóm sotu tehe mon Jisas, yóm monen, ‘Bong kligalen he kun yóm tau bemlay senta yóm tau benlay.’ ”

Jirimaya 35:16

Yó kem semfu gu bè Rikab, tey kimón le yóm tehe fù le. Okóm kuy, là kô hnungol ye dou.’