Mark 4:38 - Udél Dwata: Gna Kesfasad ne Lomi Kesfasad

³⁸ Okóm ke Jisas deng mom gtungô, temdanan te kama fi bè sékê yóm ówóng. Lemwót yó kem gel lemolò du, bentik le Jisas, mon le mò du, “Ó Sér, moem tlek tungô kut ni du? Móyón tekuy lemneb.”

Mark 4:38 Referans Kwoze

1 Pitér 5:7

Hbô ye ke Dwata dé yóm gel hemblat kuy, abay se tey nô bè nawahen yóm któbóngen kuy.

Hibru 4:15

Yóm gel blóng tekuy ebè Dwata yó, deng gotu tngónen yóm gónó tekuy gel lunog, ne tey kkoduhen tekuy. Abay se bè yóm tehe knóen te tonok, deng gnómen se kun yóm kdéen sindil lómón yóm tekuy, okóm là gemsalaen yó yóm kun.

Matyu 8:25

Tódô le mógów ebéléen yó kem gel lemolò du na le e bentik, mon le mò du, “Ó Sér, tnóbóngem mi. Hatay tekuy ni.”

Kun Snulat Luk 8:24

Ne bentik le Jisas, mon le, “Ó Sér, hatay tekuy ni.” Ne hboluk btik se Jisas, ne tonen yóm tey lenos ne yóm tey lewók, ne tódô monen, “Botongen ne.” Ne tahu se, tódô sen-gengen se teflok yóm lenos, ne menek gu talak lanaw.

Isaya 64:12

Ó Dwata, là dog kenmónem kul kô yó kem deng nmò le bélê me ni? Laen dù lanem tmóbóng kum kô? Henlósem hmayam kum kô efet là bud gbek me hembala du?

Hibru 2:17

Bè yóm któbóngen tau, là gbeken du ke là nan tódô hbaling tau anì mkél bélê tekuy kem dumuhen setwoli. Yó gónón na gbót bè yóm kmò tekuy anì du mò blóng tekuy ebè Dwata, ne anì là mili nawahen mò du bélê tekuy, ne anì hol knoduhen tekuy. Bè yóm keseblóngen yó, yó se gónó Dwata hmifót salà tekuy.

Kun Snulat Jan 4:6

Bè yó gónóhen nô yóm kokol tehe Jakub. Nan slob hegnô bè yó Jisas bè yóm kokol yó, abay se alì sidek klitegen bè yóm kógówen. Deng gtungu ne kdaw yóm kkólen bè yó.

Isaya 63:15

Ó Dwata, hol knudungem mi gu dyó bè yóm gónóhem nô bè longit. Tngón me yóm klaen dù belenem ne yóm tey kegetahem. Gónón nô se yóm alì kehedemem kum du? Ne yóm kfasangem, gónón nô de? Gónóhen nô se yóm kbong nawahem kum ne yóm kkoduhem kum? Hol béem tódô bayà mi sen.

Matyu 22:16

Yó nmò le, wen tau dók le ebéléen, hono kem tau gel lemolò kul, ne wen se bélê le kem kun tau Hirod. Timbow le kól bè Jisas, mon le mò du, “Ó Sér, tódô tngón me sal gel tahu yóm gel tulónem bè yóm kun kóyô Dwata bè tau. Ne laen dù klikoem tmulón du, abay se laen dù tau mtukul henlom nawahem.

Mark 4:37

Yóm igò le tolo mówóng talak lanaw, tódô mbel yóm tey lenos bong, lel tey lewók, botong tô gotu glimun lewók yóm ówóng le, tek udì duen gónó le là lemneb.

Mark 4:39

Omin Jisas yó hboluk btik ne mudél ebè yóm lenos, monen, “Botongem ne.” Ne bud monen ebè yóm lewók, “Heneki ne.” Tahu se, tódô kemnas yóm lenos ne menek te lanaw.