Mark 14:21 - Udél Dwata: Gna Kesfasad ne Lomi Kesfasad

²¹ Yóm angat hfatay yóm Ngà Tau, tódô uliten bè yóm deng eles tulónen bè Sulat Dwata, bede angat tey tafaken yóm tau angat mlay du sumóng. Tumù ne ke béen tehe dog tau.”

Mark 14:21 Referans Kwoze

Kun Snulat Jan 19:28

Tódô tngón Jisas se deng gotu deng ne yóm kdéen, ne yó monen, “Meenge.” Yó gónón mon du yóm yó, mò gónón dohò yóm tehe hsulat Dwata.

Danyél 9:24

Wen fat latu bud syóm folò halay klawi yóm buteng eles htólóng Dwata mò lanen tmóbóng yó kem dumuhem tau Israél kkólen bè yóm kun syudad. Yó nmoen, angat kóhen bè yó kem tau yóm tendo katù le du ne yóm tendo kmò le salà. Angat wen lanen mayad salà le. Ominen angat wen kukum tedeng suen lem blóng le ne laen tul sónen yóm klolò le du. Yóm kmoen du ni kem ni mò gónón dohò yóm deng htonen kóm ne yóm deng tehe gel htulónen yó kem tugoden. Lelen yó he angat bud hetfingen yóm kun Gónô mò gónóhen hol nô.

Tekang Kbuten 3:15

Hlós senfohonu yu yóm libun. Yóm kun lugod ne yóm kóm lugod sónmò le tendo sfohon. Ne wen bè kun lugod yóm libun angat lemuna kuluhem. Ne yóm kóm lugod, fen mékét bè tekeden.”

Kul Nmò 4:27

Yó tendoken yóm tehe udél Dabid yó, duhen yóm lomi kestifun le bè nim benwu ni le Hirod ne Puntyus Paylét, mung kul yó kem tau là Ju le dalang se yó kem Ju. Kul atul yóm khatay le ke Jisas, yóm tau tóbóng lówóhem laen kô belenen deng hógówem elem blóng me, yóm Misaya tehe nélékem.

Kul Nmò 2:23

Lemwót bè yóm tehe olu Dwata du, yó gónón hemlus du elem tdok ye. Ne lemwót ye se kuy, tódô eted ye ebè yó kem tau là temngón ke Dwata anì hnatay le. Tahu se, hnatay le, duhen yóm le ktutuk le du bè kros.

Kul Nmò 1:25

mò hógówem, mò tles Judas, yóm tau deng tebelen yóm tehe gel nmoen, ne hlós ebè yóm benwu hol knóón béléen.”

Matyu 26:56

Okóm nim nmò ye béléu ni, deng gónón dohò yóm tehe hsulat Dwata yó kem gna tugoden.” Bè yóm kekfô le ke Jisas yó, deng mom gotu sentagak yó kem gel lemolò du, mlóy le.

Matyu 26:54

Okóm ke yó nmou, tedu se tô kdohoen du yóm deng tehe hsulat Dwata golu etahu?”

Sikaraya 13:7

Yó bud udél yóm Dwata laen dù là gbeken du, monen, “Yó ne, sudeng, hnatayem yóm tau semgyok yó kem dou ubiha, yóm tau hol fi béléu. Hnatayem yóm tau semgyok ubiha anì gotu le sekla yóm kdê ubiha le. Ne fen ou tmafak yó kem hanà lemnek.

Danyél 9:26

Kogol yóm fat latu bud tlu folò fat halay yó, omin le hmatay yóm tau deng nélék Dwata mò kmamal yóm klamangen ne balù udì ke wen tebelen. Ominen wen angat sut sotu tau alì mfasang mogot benwu ne yó angat nmò yó kem sendaluen, gotu genbà le yóm syudad ne yóm Gónô Dwata nô lemen. Yóm kmò kkól yóm hol són kdaw, hol lómón ksut dunuk. Angat wen gida efet kól bè sónen, mung du yóm tey keglayam tau lemwót bè yóm kegbà benwu le, yó se yóm tehe deng eles olu Dwata kul.

Isaya 52:14

Tódô le neb yó kem tau bè yóm tehe kton le du, là hol dilô le du lówóhen ke lówó tau.

Kem Lingón 55:15

Hol mekto sut bélê le hatay he yó kem hohonu. Hol lebeng le lu tolo mowil, yakà dengen smala bélê le yóm sidek.

Kun Snulat Luk 24:44

Omin Jisas yó bud mon du mò kul, “Yóm deng katayu lem blóng ye, ne yóm bud klowilu, ni se yóm tehe deng gel tulónu kuy bè yóm hanà tolo knóu lem blóng ye. Nan na gotu dohò etahu he kdê yó kem tehe deng snulat Musis, dalang se yóm kul tehe gel snulat yó kem dumu gna tugod Dwata kkólen bè yóm tehe snulat le bè yóm bok Lingón.”

Kun Snulat Luk 22:22

Yóm angat katay yóm Ngà Tau,” monen, “tódô uliten bè yóm deng eles kolu Dwata du. Bede nawaw tey tafaken yóm tau angat matul du ebè yó kem hmohon du.”

Mark 14:49

Igò sem ket kdawu myón tmolok lem Gónô Dwata, là sem dog kenfô ye do. Okóm nim nmò ye béléu ni, deng gónón dohò yóm tehe monen bè Sulat Dwata.”

Mark 14:20

Mon Jisas se, “Sotu bélê ye se yó kem sfolò lewu gel lemolò dou, yóm dumuhu segeng mdù yóm mambang elem sóbów, deng duhen yó se.

Mark 14:22

Yóm igò le tolo mken, nwa Jisas yóm mambang, bede nan na mni bè Dwata, ominen kembéng du, ne blayen yó kem gel lemolò du, yó monen, “Ni, ni se yóm dou lówó. Nwa ye, ne ken ye.”