Mark 13:14 - Udél Dwata: Gna Kesfasad ne Lomi Kesfasad

¹⁴ Bud mon Jisas, “Angat wen ton ye yóm alì sidek knikò, tódô mdà bè Gónô Dwata, yóm tô matù ke Dwata.” Yóm tau semfala du nim ni, hol hennagien kmò klanen. “Ke sok kól yóm kdaw yó, eles le mlóy elem bulul ne yó kem tau menwu bè prubinsya Judiya.

Mark 13:14 Referans Kwoze

Danyél 12:11

Tódô lemwóten bè yóm kdaw kwen hemseng du yóm gel kedsù ye ebè Dwata, yóm kdaw kehdà le lem yóm kun Gónô Dwata yóm dwata kéng alì sidek bè yó, yó kegen ye alì mò du glayam botong lemibu lewu latu syóm folò (1,290) kdaw.

Danyél 9:27

Yóm tau mogot benwu angat sut yó, angat wen tey senfasad le yó kem tau lem yóm benwu yó lem yóm hitu halay, hol kesfasad mget. Okóm hanà tolo sóól yóm hitu halay, nmoen sónen yóm gel kedsù le ebè Dwata yó kem tau ne yó kem dumu gel blay le du. Yóm alì sidek bè kdê yóm gel nmò yóm tau angat sut yó, mom hdaen bè yóm Gónô Dwata yóm alì sidek bè yó efet yóm kkok Dwata etahen yóm tafak mò hol gemlà du, yóm deng eles olu Dwata etahen.”

Deng Hegfan 13:18

Là kô gbek tau hemlan du nim ni ke là hulungen hedem. Okóm ke wen ketngónen, gbeken gmileb du lanen yóm lemilu yóm lóbô tanay sut yó, abay se yóm lemilu yó, hnigaden boluy tau. Yó lemiluhen, 666.

Deng Hegfan 1:3

Hligal kun yóm tau fen semfala du nim bok ni. Ne hligal le se kul yó kem tau fen hmungol du ne mimón du yóm eles tulónen ni. Là buden legen ne ksuten ni kem kdê tulónen ni.

1 Kurin 14:20

Bè ni kem tulónu kuy ni koni, kem dumuhu setwoli, bê ye abay heskél yóm kuy kehedem bè knawa ngà. Yó dé dnalang ye bélê le yóm là khulung le matul mò du yóm sidek. Okóm bè yóm kmò kehedem ye du nim toloku kuy ni, yake kehedem tau tmuha dé kehedem ye du.

Danyél 8:13

Ominu mungol yóm lewu hógów Dwata stulón. Snólók yóm sotu, “Ke deng dohò yóm hnigad ni kem deng hton Dwata ni, mò kegenen yóm ketefloken du yóm gel kedsù le ket kdaw? Kegenen se yóm kehegnok le du yóm Gónô Dwata lan le gel hemsù bè yó yóm alì sidek? Kmò kegenen yóm kdaen du e laan yóm Gónô Dwata ne yó kem tau Dwata?”

Matyu 13:51

Snólók Jisas bè yó kem gel lemolò du, monen, “Gotu glileb ye kô lanen ni kem hningónu ni?” Mon le se, “El, Sér, glileb me.”