Malakay 3:3 - Udél Dwata: Gna Kesfasad ne Lomi Kesfasad

³ Yó nmoen, nan e myón kmukum. Yó kmò kkukumen, hol lómón ke yóm tau hnò blówón bukay, gotu kóhen ke wen bolen. Hol lómón yó se angat nmoen bè yó kem sfu Libay, nmoen lu tau laen dù belenen. Yó kmoen du, lómón ke lu yóm tahu blówón ne blówón bukay hnoen anì kóhen ke wen bolen, ngangen efet tódô hono tahu duhen. Ke lómón yó, gbek le bud demsù du ebè Dwata yóm dsù henmóyóen.

Malakay 3:3 Referans Kwoze

Isaya 1:25

Bnalau ne yó kem sidek gel nmò ye. Yó kmou kuy hol lómón yóm tau gel tmógó blówón anì mkó yóm bolen. Lómón yó se yóm angat nmou bélê ye anì gotu mkó yóm bolen sidek yóm gel tonu bélê ye.

Kem Udél Hlalak Tehe Selumun 17:3

Bè ofi gónó tau tmilów du yóm tembaga futì ne yóm tahu blówón ne Dwata se fen tmilów du yóm nô lem but blutut tau.

Hibru 12:10

Yóm mà tekuy te tonok, són bè yóm hanà tolo kegen tekuy udì yóm gel ktedeng le tekuy. Ne tódô nmò le bélê tekuy yóm kul ketngón du yóm hyu. Okóm tólóng yó dum ktedengen tekuy yóm Mà tekuy bè longit. Gel nmoen bélê tekuy yóm hyu bélê tekuy anì gbót tekuy bè yóm kun klaen dù belen.

Danyél 12:10

Lemwót bè yóm tey keglayam yó kem tau bè yóm kdaw yó, yó gónón dê tau baling mólós, laen dù bud belen le. Okóm yó kem tau mò sidek tódô hlós yóm kul kmò sidek, là getnef le du kul yóm deng sut lem blóng le. Tek són yó kem tau hulung hedem temngón du.

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Taytus 2:14

Deng fen hamaen yóm kun klowil bélê tekuy anì lenwaen tekuy bè kdéen sidek gónó te gel geskét, ne henbalingen tekuy kem kun tau deng mólós, anì gotu nawa tekuy mò du yóm nmò hyu.

Flipay 2:17

Yóm kehtahu ye bè Dwata, lómón ke yó yóm dsù gel blay ye ke Dwata. Bè yóm dsù ye yó, déke kóyô Dwata ke dou litô mung du mò twél ye tahen. Ke yó se kmoen, teye hligal du, gbóte hligal bélê ye bè yóm dsù gel blay ye.

Kem Lingón 66:10

Deng tnilówem mi, Dwata. Lómón yóm blówón bukay hlan le bè ofi anì baling hol tahu duhen, lómón yó se yóm ktilówem kum.

Deng Hegfan 3:18

Yó gónóm mon, wen hlauhu kuy. Bemli ye béléu dé yóm tahu blówón anì hol tahu yóm kwen kendengen ye. Ne bemli ye béléu se yóm nes bukay mò lesek ye anì là myak ye bè yóm kógów ye laen dù nes. Ne bemli ye se béléu yóm bulung mata anì bud ye mton.

1 Pitér 2:9

Okóm yu kem tau deng hemtahu béléen, deng nélék Dwata yu mò hol kun tau. Yu se yóm henged demsù ebéléen. Yu se kem tau hol kun nogot, kem tau hol nfunen. Deng néléken yu anì hol heglalag ye bè klamangen yóm tey hyu deng nmoen bélê ye. Deng tnabahen yu igò ye tolo nô lem gónón kmifu anì mili ye ebéléen bè tum gónón alì lemayag.

1 Pitér 1:7

Yó gónón tmilów kuy anì gfan ke hol tahu duhen yóm kehtahu ye duhen ke là. Yóm kehtahu ye, lómón ke yóm blówón gel hlan le bè ofi anì gfan yóm hol tahu duhen. Bong bè yóm blówón, olo kem hlun kimu. Okóm yó dum kehtahu ye, bong muhen senta yóm blówón. Milud he ktilów Dwata du anì tngónen ke hol tahu duhen. Ke là lanahen, tey kdóyónen kuy bè yóm kdaw bud kesfulék Jisas edini, lelen tey hegeta kuy ne tey kadaten kuy.

Sulat Pol Ebè Yó Kem Tau Hemtahu Bè Rom 12:1

Duhen yó, kem dumuhu setwoli, ni alì nalu nawahu bélê ye lemwót bè yóm tey kkodu Dwata tekuy. Hol blay ye ke Dwata dé lówó ye mò henged dsù ye ebéléen, yóm dsù tolo mowil ne tendo gel nmò ye yóm hyu. Ne tey kehyu nawa Dwata du yóm keblay ye du yó. Ke hendem ye yóm kdê deng nmoen bélê ye, tey knóón ke ni se yóm kut nmò.

Kun Snulat Luk 3:16

Okóm yó udél Jan ebélê le, monen, “Béléu do, él gel babtaysu kuy. Okóm wen móyón sut hol mfasang sentahu. Là kóe knóón baluen ke olohu hesek béléen. Yó kun kmò kbabtays yó kem tau mimón béléen, suen bélê le yóm Tulus Dwata. Bong yó kem tau là mimón le, ofi moen kul.

Kem Udél Hlalak Tehe Selumun 25:4

Ke kóhem bolen yóm tembaga futì, gbek yóm tau temwél hembaling du yóm kihu tilob nóyô nmoen.

Kem Lingón 4:5

Snaligem Dwata, ne dsuem yó kem dsù hyu.

Deng Hegfan 1:6

ne deng henbalingen tekuy kem tau mò nogoten, kem tau mò gel blóng kem dumu tau ebè Dwata, yóm Maen. Bê tekuy lensón yóm kdóyón tekuy du. Laen kô dù sónen yóm tey kegetahen ne yóm tey kfasangen kmamal yóm klamangen.

1 Pitér 2:5

Ne kdê ye yó kem tau deng hlowilen, lómón ke botu ye snéen kuy. Yu se yó kem botu wen mu Dwata du bè yóm gónô hdaen mò gónóhen gel nô. Ne bè yóm gónóen yó, hol lómón ke yu se yóm tau fen gel demsù ebéléen. Yó henged kuy dsù, duhen yóm kimón ye ke Dwata ne yóm gel kdóyón ye du, hlan ye bè yóm deng nmò Jisas bélê ye. Ni se yóm dsù hol henmóyô Dwata.

2 Timuti 4:6

Béléu dou, là holen bud té ne nim dou knô te tonok. Móyónen hto yóm dou buteng.

Sulat Pol Ebè Yó Kem Tau Hemtahu Bè Rom 15:16

Yó hmoen do, henbalingen ou tau mò hógów Jisas Krays ebè kem tau là Ju le. Bè yóm kwitu du ebélê le yóm Tulón Hyu lemwót gu bè Dwata, lómón ke ou yóm tau gel demsù ebè Dwata. Yó henged dsù blayu du, duhen yó kem tau là Ju le deng hemtahu bè Jisas. Ne henmóyô Dwata snéen yóm dsuu yó, abay se deng nfunen lu yóm Tulus Dwata.

Husiya 14:2

Semfulék ye ebè Dwata dé, ne mon ye mò du, “Hol hnifótem kum kdê yó kem sidek deng gel nmò me ne bud henmóyóem mi anì bud dóyón me u. Yóm kdóyón me kóm yó, hol lómón ke wen deng dsù me ebéléem.

Kem Lingón 116:17

Angat wen dsuu ebéléem mò gónóhu slamat béléem, hmungu du yóm tey kdóyónu kóm.

Kem Lingón 50:23

Okóm ke hol tahu yóm keslamat ye béléu, henged hol tahu dsù gónó ye madat dou. Ke lolò ye yóm dou lan, hegfanu bélê ye yóm kegewà lemwót béléu.”

Flipay 4:18

Duhen yó, ni sii mò lesibuhen yóm kdê deng blay ye do, botong wen lukasen béléu lemwót bè yóm blay ye do yó. Laen kô dù hendeenu ni kmoen ni lemwót bè yóm blay ye dou hlan ye bè Ipafruditus. Ni kem blay ye dou ni, hol lómón yóm gel dsù le alì minggel boohen gel blay le ebè Dwata, yóm dsù gel henmóyóen, ne yóm gónón gel hyu nawahen.

Isaya 61:6

Yó angat boluy le kuy, kem tau mò blóng ebè Dwata ne kem tau tóbóng lówó Dwata. Angat tey kehyu nawa ye du kuy yó kem kendengen lemwót bè dumu benwu, tey kegsengel nawa ye mfun du.

Deng Hegfan 5:10

Deng nmoem lu kem tau mò nogot Dwata, kem tau mò blóng kem dumu le tau ebè Dwata. Lu se yó kem tau angat mogot benwu te tonok.”

Kem Lingón 50:14

Yó hol hnebelu bélê ye ke tahu duhen yóm keslamat ye béléu, ne ke hol dnohò ye yóm deng fasad ye dou yóm Dwata hol dandónen geta.

Kem Lingón 51:19

Ke yó se kmoen, angat tey kehyu nawahem du ke wen gel dsù me ebéléem. Senged se yóm dsù gel hkekeb me, tey kehyu nawahem du. Ne angat wen kem safì tudu gel dsù me ebéléem snéen.

Jirimaya 9:7

Duhen yó, ni se udél yóm Dwata laen dù là gbeken du, monen, “Lemwót bè yóm nmò le ni, gotu hnou lu, lómón yóm gel kehnò le bala tók anì mkó yóm kê faken. Laen dù dumu lanu hkó du yó kem salà le.

Malakay 4:1

Yó bud udél yóm Dwata laen dù là gbeken du, monen, “Ke sut yóm kdaw kkukumu tau, lómó kmou kul lómón ofi gotu himot kenen kdéen. Yó kem tau heklabak ne yó kem tau gel mò sidek, angat le gotu mlób bè ofi lómón klób lami. Gotu ken ofi lu lómón kken ofi yóm koyu, gotu gomong dolilen ne kem hangahen laen kô dù tebel du.

Kem Lingón 4:6

Tey dê tau mon du, “Wen kô gembek mò du bélê me yóm hyu?” Ó Dwata, hegfanem bélê me yóm tey kehyuhem.