Malakay 2:7 - Udél Dwata: Gna Kesfasad ne Lomi Kesfasad

⁷ Yó kem tau gel blóng ebéléu, hyu ke hol tngón le yóm dou kóyô ne ke hol tolok le bè yó kem tau. Ke wen tau móyô temngón du yóm hlau Dwata bélê le gónón smólók, abay se lu hógów yóm Dwata laen dù là gbeken du.

Malakay 2:7 Referans Kwoze

2 Kurin 5:20

Ne duhen yó, mi se gel hógów Krays mò mit yóm kun tulón. Hol lómón ke Dwata fen mudél ebélê ye, okóm hlanen bélê me. Yó udél hwit Krays kum, monen, “Géhél ye mit sefyu ebè Dwata ne.”

1 Tisalunika 4:8

Duhen yó, ke wen tau kembê du nim toloku kuy ni, là kô tolok tau du yóm kenbéen, kaem Dwata yóm bemlay tekuy yóm kun Tulus.

Kul Nmò 16:17

Bè yóm igò me mógów, tódô mensag huli kum, yó udélen, monen, “Ni se kem tau tóbóng lówó yóm Dwata hol geta bè kdéen. Yó nógów le ni,” monen, “na le e tulón kuy yóm gónó ye gewà gu lem hatay.”

Isra 7:10

Nim Isra monen ni, tódô hotuhen nawahen hemnagì du yó kem hlau Dwata, lelen mimón du ne gotu toloken yó kem tau Israél yóm kdê deng hlolò Dwata kul.

2 Tutul Israél 30:22

Tey kdóyón Hisikaya kul yó kem sfu Libay bè yóm tey dê kenhulung hegfan le bè yóm kmò le nmò bè Dwata. Duhen yó, hitu kdaw le mò du yóm kehligal yó. Dsù le yóm dsù mit sefyu ebè Dwata, ne gotu benkas yó kem tau ebè Dwata yó kem salà le bè yóm Dwata yó kem tehe fù le.

Kun Snulat Jan 20:21

Ne bud mon Jisas mò kul, “Dwata he hol henek nawa ye. Lómón yóm tehe khógów Mà do, hol lómón yó se bud khógówu kuy.”

Kun Snulat Jan 13:20

Tódô tulónu kuy ktahuhen,” monen, “yó se tau hmódó yóm tau hógówu, hol lómón ke ou se yóm hnódóhen yó. Ne yó se tau hmódó dou, deng hnódóhen snéen yóm hógów do.”

Malakay 3:1

Yó balaen kul yóm Dwata laen dù là gbeken du, monen, “Ngem, angat wen hógówu elem blóng ye mò eles hemtifes yóm angat lanu. Ominen yó tódô mekto sut elem yóm kun Gónô yóm tendo nangat ye, duhen yóm Dwata hol gónó mogot. Yóm hógówu tendo gel nangat ye yó, dohò sut se kun mò hetngón du kuy yóm deng senfasad tekuy.”

Hagay 1:13

Omin Hagay tmulón du yó kem tau yóm bud udél Dwata ebélê le, yóm monen, “Elese tendo gel nô bélê ye. Ni se yóm hol fasadu kuy.”

Jirimaya 18:18

Ne yó udél yó kem tau, mon le, “Yake mebel tekuy lan anì teflok yóm gel tulón Jirimaya. Laen kô dù mu tekuy du yóm gel tulónen. Deng wen kut tau blóng ebè Dwata nô bélê tekuy ne wen se kem kut tau temngón ne wen se kem kut tugod ebè Dwata nô bè ni. Laen kô mu tekuy du yóm toloken tekuy ne ke hnauhen tekuy ne ke tô wen tulónen tekuy. Mò tekuy tulón gbak etahen, bê tekuy abay kenmón yó kem gel monen.”

Jirimaya 15:19

Yó balà Dwata do bè nim ni, monen, “Ke hegseli, henmóyóu uu ne budi baling tóbóng lówóhu. Ke tulónem yó kem udél wen muhen bélê le, budi baling tau mò tugodu. Lemwót bè udélem ebélê le, uu se mit kul yó kem tau. Là hyuhen ke lu mit kóm.

Isaya 44:26

Okóm yóm dou tóbóng lówó, ke wen eles gel tulónen angat hdohou se yó. Ke wen tau hógówu mò tmulón yóm angat atulu, hol lemwót béléu se yóm tulónen yó ne angat hdohou. Ni udélu ebè yóm benwu Jirusalim, angat le bud mulék menwu bè yó, yó kem tauhen. Ne yó bud udélu ebè yó kem syudad bè benwu Juda, angat wen bud hmomi hemdà kul. Balù yóm deng tey kegbà le, botong bud baling lomi.

Glasya 4:14

Balù yóm tey keglala ye béléu bè yóm tehe kwen desu dyó, là kô hnisik ye dou, là kô kenbê ye do. Mom yó nmò ye, tey khódó ye do, hol lómón ke ou yóm hógów Dwata gu bè longit, ne lómón ke ou Krays Jisas.

Isaya 42:19

Tey butô yóm tau dou tóbóng lówó. Tey bokong yóm tau dou gel hógów.

Lista 27:21

Bè yóm angat kalaken tau, ke móyô temngón du yóm dou kóyô nan hol mlan bè Ilisar yóm tau gel blóng ebéléu, yóm fen gel temngón du yóm dou kóyô mlan bè ketngelen du yóm Urim ne Tumim. Bè nim nmò Juswa ni, Ilisar fen gel tmulón du ne bè yó kem tau Israél yóm mò gel nmò le.”

1 Samwél 2:17

Ni se yóm salà yó kem ngà Ili logi alì sidek bè solu Dwata abay se là kô dog nadat le du yóm dsù le ebè Dwata.

2 Tutul Israél 31:4

Bud hlolò yóm tau hol geta yó kem tau bè Jirusalim anì hol blay le bè yó kem tau gel blóng ebè Dwata ne bè yó kem sfu Libay yóm bad le bè yó kem gel ton le, anì yó hol hotu le nawa le lemolò du yóm hlau Dwata kul.

Isra 7:25

Ne uu, Isra, lemwót bè yóm tey khulung hedem blayen kóm yóm kóm Dwata, uu fen mélék kul yó kem tau mò fen mogot du yó kem fsinà ye ne mò fen kmukum yóm kdê ye nô fi desdef Él Yufratis. Nélékem yó kem tau temngón du yó kem kun Hlau yóm kuy Dwata. Hol bud tolokem yó kem Hlau Dwata yó bè yó kem tau là deng temngón du he.

Kem Udél Hlalak Tehe Selumun 5:2

anì hulungi mit du hyu yóm kmoem ne dilô bè kudélem yóm ketngónem.

Jirimaya 2:8

Yó kem tau gel blóng ebéléu balù udì se ke mon le, ‘Nô se Dwata du?’ Yó kem tau gel kmukum là kô bud tngón le dou. Yó kem tau mogot benwu deng mom knogol le ou. Ne yó kem tau gel tugodu deng le mom tmugod bè Baal. Tmaba le ebè yó kem dwata lenbù nmò le, yóm laen dù muhen.

Husiya 4:6

Yó gónó le gotu meglà yó kem tauhu abay se là kô tngón le do. Kuy salà se yó yu kem tau gel blóng ebéléu, abay se deng mom yu kembê do. Duhen ni, kenbéu yu se kuy ke tô ye bud semblóng tau ebéléu. Lemwót bè yóm deng kekbê ye yó kem hlauhu kuy, angat bud kenbéu lu se do yó kem ngà ye.

Sifanaya 3:4

Yó kem tugod dwata le, tey keheklabak le, là tahuhen yóm gel tulón le. Yó kem tau gel blóng le ebè Dwata, mom nmò le yóm gónón gholu yóm kun Gónô Dwata ne nulé le yóm hlolò Dwata bè yó.

Sikaraya 7:3

Ne wen snólók le bè yó kem tau gel blóng ebè yóm sana Dwata laen dù là gbeken du ne bè yó kem tugod Dwata bè yó. Yó snólók le, “Tódô henlel me kô langag ne fasting bè yóm glimuhen bulón bud kehtulón du nawa yóm tehe kegbà yóm Gónô Dwata, lómón yóm deng gel nmò me lem yóm hilu halay?”