Malakay 2:2 - Udél Dwata: Gna Kesfasad ne Lomi Kesfasad

² Ke là hnungol ye du yóm monu mò kuy ni ne ke là sù ye du bè nawa ye yóm kadat ye do, angat wen tey tafak sidek hwitu ebélê ye. Balù yó kem dsù gel nwit kem tau ebélê ye mò lowil ye, bud gomong megtafak. Bè ktahuhen, deng tlesu du tafak yóm kdê hyu gel blayu kuy abay se là nóen bè nawa ye madat do.

Malakay 2:2 Referans Kwoze

Deng Hegfan 14:7

Tódô hgelen udélen, monen, “Hol nadat ye Dwata. Hol sendóyón ye dé yóm tey kegetahen. Deng hto ne yóm butengen kmukum kem tau. Hol dóyón ye se yóm Dwata deng tehe mò yóm longit ne yóm tonok ne yóm mohin kkólen bè yóm kdéen él tembul.”

Kun Snulat Luk 17:18

Tek sónen u ne kô yóm semfulék na a dmóyón ke Dwata? Lelem là Ju he kóm.”

Kem Lingón 69:22

Hol henbalingen mò gónó le gholot yóm tey ken wen bè lemisa le. Yóm klaen dù gónó le élél, nmoem mò gónó le bkó.

1 Pitér 4:11

Ke uu yóm sotu tau wen khulungen tmolok, tódô tolokem sen yóm Udél Dwata. Ke uu sotu tau wen khulungen tmóbóng, hol hlanem bè yóm kgis deng blay Dwata kóm yóm któbóngem kem dumuhem. Ke hyu kwit ye du yóm kenhulung blayen kuy, tey megdóyón Dwata mlan bè yóm któbóngen kuy Jisas Krays. Dwata se yóm hol knóón megdóyón, ne sónen du se yóm hol mfasang. Hol bê ye abay nmò sónen yóm kdóyón kuy du.

Malakay 3:9

Deng ye gotu megtafak ne yóm kdê ye, yakà deng ye mnagaw béléu.

Isikél 3:7

Okóm hógówu uu ebè yó kem tau Israél ne là kô na le e hnungol kóm. Balù sem ou du, là kô hnungol le do, abay se hono le tau mgel kulu yóm kdê le.

Deng Hegfan 16:9

Tahu se. Gotu le mluf yó kem tau. Deng mom sónmò le hemtolo ke Dwata, abay se du yóm wen kfasangen mò du ni kem hlayam ni. Okóm là dog knogol le du yóm sidek nmò le, ne là se dog dóyón le ke Dwata.

Hagay 1:9

Tey gel kehdón ye du ke bong yóm gel tbas ye, okóm tek udì uléken. Bè yóm gel kwit ye du eta yóm gel nuta ye yó, mom nyufu hlayuk. Tngón ye kô but gónóhu mò du yóm yó? Abay se sana tolo kegbà yóm dou Gónô, mom hegna hdà ye yóm kuy gónô ne tódô ket tau tendo lala mò du yóm kun gónô.

Hagay 1:6

Tey bong bnék gel hla ye, okóm tek udì guta ye du. Wen se gel ken ye, okóm là kóen kóyów ne là kô ye gemtu du. Wen se gel ninum ye, okóm bud là se kóyówen. Wen se gel nes lesek ye, okóm sana gel ketnaw ye. Ne yóm tau gel mò nmò, là kóen kóyów yóm gel gutahen mò lowil le.

Isaya 42:25

Yó gónón hol hegnóm du tekuy yóm tey kebuten ne heglayamen tekuy lem gida. Yóm kebut Dwata, hol lómón ke ofi mken bè klamangen benwu Israél. Okóm balù udì ke tô getnef tekuy yóm nmoen yó, laen kô dog dnalang tekuy du.

Juswa 7:19

Yó mon Juswa mò du, “Tey Tò, hol tulónem ktahuhen bè ni bè solu Dwata, yóm Dwata hol gónó tekuy mogot kem tau Israél. Hol benkasem yóm deng nmoem. Tulónem dou kun, hol béem bnos béléu.”

Kem Udél Hlalak Tehe Selumun 3:33

Tnuled Dwata yó kem gmónô gel mò sidek, okóm fen nuyagen yó kem gmónô tedeng kmò le.

Malakay 2:1

“Duhen ni,” mon yóm Dwata laen dù là gbeken du, “wen hlauhu kuy, yu kem tau gel semblóng tau ebéléu.